1 Chenu udete xuꞌcu bichia, che uyanu Jesuse Pedro, Jacobo nu cuna Juan enu neca bichi Jacobo uya beella equie tucu dañi elu aya, 2 zeꞌe ucheꞌe nú xa rnaa Jesuse lubeella. Nu chiquiꞌ rulu siquiꞌ lunu xi rulu ellieꞌe bichia, nu unga niquichuaꞌquieꞌ xucunu nu rulu siquiꞌi. 3 Hora zeꞌe ulañiꞌ beella nú rdichiaꞌnu Jesuse Moisés cuna Elías. 4 Che uni Pedro lu Jesuse:
―Detá, ¡neca nzeꞌca nú nelluaꞌanuru liꞌilu caꞌa! Tunu niarquiꞌlu recheꞌru chuna ranchu: tucue para liꞌilu, stucue para Moisés nu stucue para Elías.
5 Diqui nú rniscaꞌ Pedro, hora zeꞌe ulaca tucu xcabe nú rulusiquiꞌ utsacuꞌ equie Jesuse cuna bee bene zeꞌe. Nu liñi xcabe zeꞌe ubeneꞌ beella tucu chii nú uni:
―Neca ninguieꞌ Lliꞌñia enu chiquiꞌ seꞌcaa. Nu ñia nzu arquialu, uzuꞌcuꞌhua nú rninu.
6 Chenu ubeneꞌ bee beneꞌ Jesuse chi cuaꞌ, uzucu lliqui beella nu hasta luyuu uziꞌquindiqui beella, nu chiquiꞌ ulliqui beella. 7 Che uyabica Jesuse lubeella, nu utiꞌyanu liꞌibeella nu uninu lubeella:
―Utsulíhua, nu la lliquihua.
8 Nu chenu uletsa beella lubeella ulañiꞌ beella nú lecaꞌ tinuꞌ zeꞌe, stucutsia Jesuse nzulá zeꞌe.
9 Chenu enta laca beella dañi zeꞌe, uni Jesuse lubeella:
―La ixiuleꞌehua lu niꞌtucu bee bene lunú ulañiꞌhua, hasta bichia nú huañi zeca Liꞌá Bene enu uxeꞌla Diose.
10 Chequie unedichiaꞌ bee beneꞌnu lunu nú uni beella:
―¿Xiquie nú rni bee ulaxcuela enu reca ley nú rluti Elías rquiꞌña nú riña?
11 Che ucuaquinu lubeella:
―Neli nú nzeꞌta rluti Elías para nú tsucheꞌlla yeene. 12 Pero Liꞌá nia luhua nú ubeꞌtala Elías, nu né chulu bee bene liꞌilla tucu nú riala nú a chulu beei liꞌilla, nu xitse uriꞌinu ye bee bene liꞌilla. Nu leꞌca scua nehuana riꞌinu bee bene Liꞌá Bene enu uxeꞌla Diose.
13 Che uriꞌi bee beneꞌnu beyaꞌ nú rninu lu cuendaꞌ Juan Bautista.
Uriꞌiyeca Jesuse tucu enduꞌ enu seca ichia ziñia
(Mr. 9:14-29; Lc. 9:37-43)
14 Chequie chenu uriña beella elu nucuaꞌa bee bene, uyabica tucu bene lu Jesuse nu utsulliquii lunu nú uni:
15 ―Detá, uhuaꞌa arquiꞌ endua xne secai ichia ziña nu chiquiꞌ nehuana secai, nu huaxi bese sanaꞌi lu quii, cuna lu inza. 16 Uriñayua endua lubee beneꞌlu, pero lá aca beella riyeca beella liꞌi.
17 Chequie ucuaqui Jesuse nú uninu:
―¡Cueꞌhua bee bene enu rluꞌcu dula núla chili arquiꞌhua liꞌá! ¿Se xala tiembu rquiꞌña nú tsunua liꞌihua?, nu ¿se xalalá tiembu riquilá liꞌihua? Uteyuhua enduꞌcuaꞌ caꞌa.
18 Che uquiꞌyaꞌ benechiquiꞌ uriꞌi Jesuse nu unibiyaꞌnu nú chiuꞌui arquiꞌ enduꞌ zeꞌe, nu hora zeꞌe uyecaꞌ enduꞌ zeꞌe.
19 Chenu nucuaꞌa liꞌitsia Jesuse cuna bee beneꞌnu unedichiaꞌ beella lunu nú uni beella:
―¿Xiquie nú né acaru ahuaru benechiquiꞌ arquiꞌ enduꞌ zeꞌe?
20 Che uni Jesuse lubeella:
―Xne lleꞌnatsia nzeli arquiꞌhua Liꞌá. Liꞌá nia luhua nú tunu neli nzeli arquiꞌhua masia xi lleꞌna ebichi mestasa, neca lunú nzeli arquiꞌhua Liꞌá, nuꞌ modo nihua lu dañiquieꞌ: “Ullunaꞌ caꞌa nu uquia stucu luhuare”; nu zucuꞌ dañi nú nihua. Lecaxi aca neriñaꞌ para liꞌihua tunu neli nzeli arquiꞌhua. 21 Pero para nú chiuꞌu clasiaꞌ bee benechiquiꞌ cuaꞌ, rquiꞌña nú deteꞌhua bichia núla acuhua, nu nacuꞌhua lu Diose.
Udixiuleꞌe Jesuse bese rrucu nú atinu
(Mr. 9:30-32; Lc. 9:43-45)
22 Chenu nucuaꞌa beella lu iliu Galilea, uni Jesuse lubee beneꞌnu:
―Liꞌá Bene enu uxeꞌla Diose deteꞌ cuenda bene liꞌá lubee bene, 23 nu uti beei liꞌá, pero bichia rriuna huañi zecaa. Chenu ubeneꞌ bee beneꞌnu nú uninu scua chiquiꞌ nehuana utsu arquiꞌbeella.
Udixiu Jesuse impuestoꞌ indu
24 Chenu uriña Jesuse cuna bee beneꞌnu eyeche Capernaum, uya bee bene enu rriꞌi cubre impuesto para indu llene Jerusalén lu Pedro nu unidichiaꞌ beei lulla, nu unibeei:
―¿Rixiu maestroꞌlu impuestoꞌ indu la?
25 Che ucuaqui Pedro lubeei:
―Aahuaꞌ rixiunue.
Nu chenu uyuꞌu Pedro liñi niꞌi elu nzu Jesuse, rlutilánu uninu lu Pedro:
―¿Xa nilu, Simón? ¿Ti riala ixiu impuesto lubee arre iliulabequieꞌ: bee bene lachilla la, o bee bene rene la?
26 Nu ucuaqui Pedro nú unilla lunu:
―Bee bene rene.
Nu uni Jesuse lu Pedro:
―La quiꞌña nú ixiu bee bene lachilla impuesto. 27 Pero para nú lecati lee luaꞌahua, mejora uquia ruꞌu inzatuꞌ, nu duꞌlu anzueluꞌlu lue, nu bela rluti enu uculu. Liñi ruꞌí ulua tucu melu nú riquiꞌ chetixiulu equie impuesto, cuendaa cuna cuendaꞌlu, uyaꞌe nu uquia tixiu.
<- San Mateo 16San Mateo 18 ->
