1 Uni Jesuse tucu ejemplu lubee beneꞌnu para nú seteꞌnu liꞌibeella nu uninu rquiꞌña nú nacuꞌ beella lu Diose, nu la llacaꞌ beella. 2 Che uninu nú lu beella:
―Tucu bene enu unga juece tucu eyeche nu la lliquilla Diose nu la riꞌi casolla bee bene. 3 Nu leꞌca eyeche zeꞌe nzucu tucu unaꞌa enu unguti niyuꞌ, nu nzanchu lu juece zeꞌe rnacuꞌnchu nú riꞌi juece zeꞌe elietsa lunchu para nú deteꞌlla castiya lu bene enu rlee lunchu. 4 Pero xee né riꞌi caso juece zeꞌe unaꞌa zeꞌe, nu chu uriꞌi juece zeꞌe elliebacuꞌ nú unilla: “Añinzuca nú la lliquia Diose nu la riꞌi casoa bee bene, 5 pero unaꞌa quieꞌ la tsuxenchu nú rriꞌi xiꞌinchu lua, mejora riꞌá elietsa lunchu para nú la yeꞌtaꞌnchu ante nú laxu paciencia.”
6 Nu chu uni Jesuse lubeella:
―Scua uni juece enu necha neca zeꞌe. 7 Enzeꞌe, ¿xieꞌ la riꞌi caso Diose bee beneꞌnu enu ucañinu chenu rnacuꞌ beella lunu bichia si rulaꞌ la? Nu, ¿xieꞌ leꞌnu para nú riꞌinu elietsa lubeella la? 8 Liꞌá nia luhua nú riꞌinu elietsa lubeella sin nú leꞌnu. Pero chenu riña zeca liꞌá Bene enu uxeꞌla Diose, la riꞌá beyaꞌ tunu llelá bee bene enu nzeli arquiꞌ Diose lu iliulabe.
Ejempluꞌ tucu fariseo cuna bene enu uriꞌi cubre impuesto
9 Uni Jesuse stucu ejemplu para bee bene enu siꞌ nú neca beei bene nzeꞌca, nu rluachu beei beelá bee bene, nu uninu:
10 ―Uya chiucu niyu liñi Indu llene Jerusalén unacuꞌ beei lu Diose: tucui neca fariseo, nu stucui neca enu rriꞌi cubre impuestos. 11 Nu nzulí fariseo zeꞌe rnacuꞌi lu Diose nú uni: “Cheꞌtsalu Diose Pa liñibe, xne la necaa xi neca stucu bee bene, xi neca bee bene enu rriꞌi eluhuanaꞌ, xi neca bee bene enu necha rriꞌi, xi neca bee bene enu rluꞌcu stucu unaꞌa, nu la necaa niꞌ xi neca benequieꞌ enu rriꞌi cubre impuesto. 12 Chiucu bese liñi tucu xmana rdetea bichia nú la acua equie nú rluꞌcua ulaꞌna lulu Diose, leꞌca rdetea diezmo equie dimi nú rriꞌá ana.” 13 Pero bene enu rriꞌi cubre impuesto istu utsui nu né riꞌi nú aletsai lui enza liñibe, nu xutse tsiai yai latsai nu uni: “¡Diose Pa liñibe uhuaꞌa arquiꞌ liꞌá, xne neca bene enu rluꞌcu dula!” 14 Liꞌá nia luhua nú bene enu rriꞌi cubre bee impuesto uriꞌila Diose perdona liꞌilla chenu nzialla niꞌlla, pero fariseo zeꞌe né riꞌi Diose perdona liꞌilla, xne bene enu sucuꞌ aya leꞌcatsia liꞌi lecati neca nzeꞌe lu Diose. Pero bene enu reca lleꞌna arquiꞌ, liꞌilla necalla enu máse seca lu Diose.
Uriꞌileꞌya Jesuse bee enduꞌ
(Mt. 19:13-15; Mr. 10:13-16)
15 Leꞌca uyayu bee bene bee enduꞌ elu nzu Jesuse para nú ricuꞌnu yanu equie beei. Pero chenu ulañiꞌ bee beneꞌnu nucuaꞌ, uriꞌi beella nú uquiꞌyaꞌ bee bene enu uyayu bee enduꞌ zeꞌe lunu. 16 Pero ubixia Jesuse liꞌibeella nu uninu lubeella:
―Uzelahua nú yeꞌta bee enduꞌ lua nu la cáhua nucuaꞌ, xne lunú rnibiyaꞌ Diose neca para bee bene enu neca xi neca bee enduꞌ quieꞌ. 17 Xne liꞌá nia luhua nú bene enu la chili arquiꞌ lunú rnibiyaꞌ Diose xi neca tucu enduꞌ, leca modo nú chuꞌulla elurnibiyaꞌ Diose.
Uni tucu bene xene lu Jesuse
(Mt. 19:16-30; Mr. 10:17-31)
18 Tucu bene enu rnibiyaꞌ unidichiaꞌ lu Jesuse nú unilla:
―Maestro, enu neca bene nzeꞌca, ¿xi rquiꞌña riꞌá para nú lucua elunehuañi nú leca xunga laxu liñibe?
19 Nu uni Jesuse lui:
―¿Xinu rnilu nú neca bene nzeꞌca? Leca niꞌ tucu bene nzeꞌca, tucutsia Diose neca bene nzeꞌca. 20 Nediyaꞌláꞌlu bee mandamiento: “La útilu bene, nu la luꞌculu stucu unaꞌa, nu la riꞌilu eluhuanaꞌ, nu la taꞌlu eluquichiaꞌ stucu bene, uluꞌcu ulaꞌna lu paꞌlu cuna lu naꞌlu.”
21 Che uni bene zeꞌe lu Jesuse:
―Ye bee nucuaꞌ sucua hasta chenu lleꞌna.
22 Chenu ubeneꞌ Jesuse nucuaꞌ, uninu lui:
―Pero rriꞌi tucu nú riꞌilu nee. Uti ye bee steneꞌlu, nu udeꞌteꞌ dimi cuaꞌ lubee bene enu seca elitsi. Scua luꞌculu eluxene liñibe. Nu chu yeꞌta quieelu liꞌá.
23 Pero chenu ubeneꞌ bene zeꞌe nucuaꞌ, chiquiꞌ nehuana utsuu arquiꞌi, xne chiquiꞌ xenei. 24 Chenu ulañiꞌ Jesuse nú chiquiꞌ nehuana nzu arquiꞌi, che uninu:
―¡Chiquiꞌ neriñaꞌ nú chuꞌu bee bene xene elurnibiyaꞌ Diose! 25 Máse facil nú dete tucu camello iꞌchiuꞌ echedicu, luquela nú chuꞌu bee bene xene elurnibiyaꞌ Diose.
26 Pero bee bene enu ubeneꞌ nú uni Jesuse scua, unibeei lunu:
―¿Ti nuꞌ modo tsilaꞌa che?
27 Nu ucuaqui Jesuse lubeei:
―Nuꞌ nú neriñaꞌ neca para bee bene iliulabe, pero para Diose leca niꞌ tucu nú neriñaꞌ.
28 Chequie necachi uni Pedro lunu:
―Liꞌiru utsaꞌnaru ye beenú rluꞌcuru para nú nzela quieeru liꞌilu.
29 Nu ucuaqui Jesuse nú uninu:
―Liꞌá nia luhua nú titse bene enu tsaꞌna niꞌi, urre unaꞌa, urre bichi, urre paꞌ, urre na, urre lliꞌñi, para nú riꞌilla lunú rnibiyaꞌ Diose, 30 liꞌilla másela yuculla nú liquiꞌ Diose lulla lu iliulabe quieꞌ nu leꞌca luculla elunehuañi nú leca xunga laxu liñibe.
Udixiuleꞌe Jesuse bese rriuna nú úti bee bene liꞌinu
―Nee chaꞌahua Jerusalén elu yalu tucu nú uquieꞌe bee profeta lu cuendaꞌ liꞌá Bene enu uxeꞌla Diose. 32 Deteꞌ cuenda bee bene liꞌá lubee bene rene, nu tsequichiaꞌ beei liꞌá, ni beei huaxi bedichiaꞌ nú necha neca lua nu tsúxene beei lua. 33 Iñi beei liꞌá nu úti beei liꞌá, pero bichia rriuna huañi zecaa.
34 La riꞌilí bee beneꞌnu beyaꞌ lunú uninu, nu la riꞌi beella beyaꞌ xa neca nú rninu, xne uninu tucu nú leca modo riꞌi beella beyaꞌ.
Uriꞌiyeca Jesuse tucu bene enu niquieꞌlu eyeche Jericó
(Mt. 20:29-34; Mr. 10:46-52)
35 Chenu nze riña Jesuse axu eyeche Jericó, nzucu tucu niyu enu niquieꞌlu ruꞌu inziu rnacuꞌ carida, 36 chenu ubeneꞌi nú rdete huaxi bee bene inziu zeꞌe unidichiaꞌi xi reca. 37 Che uni bee bene lui nú Jesuse bene eyeche Nazaret rdete lu inziu zeꞌe, 38 nu ubixialí nú uni:
―¡Jesuse lliꞌñi David uhuaꞌa arquiꞌ liꞌá!
39 Bee bene enu nzuculu rquiꞌyalla rriꞌi beei para nú zacalla, pero másela ubixialilla nú unilla:
―¡Lliꞌñi David uhuaꞌa arquiꞌ liꞌá!
40 Chequie utsuxee Jesuse nu unibiyaꞌnu nú yeꞌtayuu bee bene liꞌilla lunu. Chenu uriñalla axu lunu unidichiaꞌnu lulla:
41 ―¿Xi niarquiꞌlu nú riꞌá lulu?
Nu ucuaqui niyu enu niquieꞌlu zeꞌe nu necachi unilla lunu:
―Niarquia nú yeꞌe iꞌculua nu biꞌya zecaa.
42 Nu uni Jesuse lulla:
―Riꞌyalálu nee, nu uyecaꞌlaꞌlu xne uchili arquiꞌlu liꞌá.
43 Hora zeꞌe chu uyeꞌe iꞌculu niyu zeꞌe, nu nzequiei Jesuse nu uni bedichiaꞌ nzeꞌca lu Diose. Nu ye bee bene enu ulañiꞌ nú unga scua, leꞌca unibeei bedichiaꞌ nzeꞌca lu Diose.
