1 Pues bichaꞌ, benꞌ nedyëꞌëdaꞌ, canaꞌ naca diꞌidzaꞌ begaꞌnlë Diuzi raꞌo huenëꞌ quiero. Quie lenaꞌ reyaꞌalaꞌ gaparo cuidado bihuero xquia. Naca xquia ca quie tu nidyiꞌ udyiaguiꞌn bëꞌëlaꞌ z̃ubaꞌ quiero len pensari quiero. Lëscanꞌ biusanro huero Diuzi balaꞌana, biusanro naoro xnezëꞌ du guicho du laꞌ adyiꞌro.
5 Desde dza cati bdyindoꞌ yu nebaba Macedonia, bibi yelaꞌ huezilaꞌadyiꞌ gutaꞌ quiendoꞌ, dechanꞌ gutaꞌ tazëdi con gatiꞌtezi uyondoꞌ. Raca huedila ga rdandoꞌ, rutëbin nëtoꞌ rdzebindoꞌ. 6 Pero reyuez̃elaꞌadyiꞌ Diuzi benꞌ raca bayëchiꞌ quie. Lenaꞌ beyuez̃elaꞌadyiꞌ Diuzi nëtoꞌ, useꞌelaꞌnëꞌ Tito bedenaꞌnëꞌ nëtoꞌ redaohuendoꞌ. 7 Pero cala tuzi redaohuendoꞌ nun quie bedenaꞌ Tito nëtoꞌ, lëscanꞌ redaohuendoꞌ como danꞌ leꞌe beyuez̃elaꞌadyiꞌle Tito. Una Tito nëtoꞌ cabëꞌ reꞌenle ilëꞌële nëtoꞌ. Lëscanꞌ una Tito cabëꞌ raquele bayëchiꞌ rdëbile bi raca quiaꞌ. Danꞌ rdëbile bi raca quiaꞌ, lenaꞌ reyuez̃elaꞌadyiꞌle nëꞌëdiꞌ mazara.
8 Laꞌacazi bzuaꞌ leꞌe bayëchiꞌ nun quie guichi useꞌelaꞌ laole dza naꞌ, biraquedaꞌn ziꞌ naꞌa. Pero chi guquedaꞌn ziꞌ dza naꞌte nun quie bzuaꞌ leꞌe bayëchiꞌ tu chiꞌzi, 9 redaohuedaꞌ naꞌa como danꞌ nun quie lenaꞌ, betzaꞌle pensari quiele bayuꞌule pensari huen. Lenaꞌ redaohue Diuzi cabëꞌ bële. Lenaꞌ cala tamala bëndoꞌ quiele bzundoꞌ bayëchiꞌ quiele. 10 Porque cati ruzu Diuzi raꞌo bayëchiꞌ, lenaꞌ gacalën raꞌo ta yetzaꞌro pensari quiero, yuꞌuro pensari quie Diuzi, gaque quiero yelaꞌ neban tuzioli. Lëpensari bayëchiꞌ nacan pensari quie Diuzi, bireyaꞌalaꞌ gaqueroꞌn ziꞌ. Pero ca naca pensari bayëchiꞌ raca lao yedyi layu, lëpensari naꞌ bihuen quie ja benëꞌ tadyaꞌa. Huen quiejëꞌ ta gatijëꞌ tuzioli yeyojëꞌ lao guiꞌ gabila. 11 Pero leꞌe bële tahuen caora bzu Diuzi bayëchiꞌ quiele. Ulenaꞌ cabëꞌ guca quiele. Dyëꞌëdi bële casa cabëꞌ tamala guca quiele entre leꞌe. Du guicho du laꞌadyiꞌle udixogueꞌle cabëꞌ guca quiele. Bdzaꞌle bdzebile cabëꞌ tamala guca entre leꞌe. Laguꞌuntele guidaꞌ ideyubaꞌ leꞌe. Laozutele dispuesto huele castigo benꞌ bë tamala. Lenaꞌ ruluꞌen quiele gabi dulaꞌ napale tanun quie benꞌ bë tamala. 12 Caora useꞌelaꞌ guichi quiaꞌ laole dza naꞌ, bipseꞌelaꞌn nun quie tuzi benꞌ bë tamala, ni quele quie tuzi benꞌ begaꞌn yelaꞌ stuꞌ quie tanun quie benꞌ bë tamala, dechanꞌ useꞌelaꞌ guichi quiaꞌ laole ta inezile cabëꞌ rdëbindoꞌ raquendoꞌ quiele lao Diuzi. 13 Pero nun quie cabëꞌ bële, bële tahuen redaohuendoꞌ.