Abahebrania 3

Yeézu ni mukúlu kuchila Musa

1 Mbwéenu, íimwe beekiliza bazeenzi baanze, áabo Múungu akabatóoza hamo neechwe kuba abaantu boómwe abatakatíifu, muteekuze habwa Yeézu, óogwo ali Entumwa ya Múungu káandi no Omugabe Omukúlu óogwo tulikumwiíkiliza. 2 Weényini akaba ali omweésigwa ahali Múungu óogwo akamutooza, nko óokwo Musa* náwe akaba ali omweébeembezi omweésigwa wa abaantu bóona be éenzu ya Múungu, tugaámbe Abaiziraeli.[b] 3 Omwoómbeki ahaabwa ikuzo kuchila éenzu éezo yaáyoómbeka. Bityo nyini Yeézu náwe naayeéndelwa kuhaabwa ikuzo bwooli kuchila Musa. 4 Buli nzu eyoombekwa no omwoómbeki bunaanka, náho Múungu niwe Omwoómbeki Mukúlu we ebiintu byóona.

5 Musa akaba ali omuhálila omweésigwa aha baantu bóona be éenzu ya Múungu. Emilimo yoómwe ekaba eli echisusano cha amagaambo áago Múungu yakubasululiile abaantu ahaliíza. 6 Náho Kristu, weényini no Omutábani omweésigwa óogwo alikweémeelelela abaantu be éenzu ya Múungu. Neechwe nibo abo baantu be éenzu ya Múungu, katulaaba nituzeendelela kuhika aha muhélo kuba abagimi no kweébuga omuli áago tulikutegeza.

Ebikaamo habwo kuleka kwiikiliza

7 Ha bwéecho, nitweendélwa kuhuliiliza áago Omwooyo Mutakatíifu alikugaamba aáti,

“Leélo, kamulikuhulila iláka lya Múungu,

8 mutaákukola emiganya yáanyu kuba egumile,

nko óokwo besiimwe enkúlu bakaba nibaánga kweébeembelelwa neenye,

obuchilo baabeele nibaandeengesa omu nsi yo obwoóma.

9 Omu nsi yo obwoóma okwo niho besiimwe enkúlu baabeele nibaandeengesa,

no óobu nkabakolela amahano méenzi ha myáaka makúmi aána.

10 Ha bwéecho nkasaayila abaantu abo naágaamba nka nikwo,

‘Abaantu aba nibaánga kuungomookela ebilo byóona,

tibakweenda kusoombookelwa no kukulaatila emiháanda yaanze.’

11 Bityo nkanigahala no kulahila, naágaamba nka nikwo,

‘Tiíndibakuúndila nakáti áabo baantu kutaaha ahaantu ho kuhuúmula,

áaho ndoongize habwa boónyini.’ ”[c]

12 Íimwe beekiliza bazeenzi baanze, mube méeso, kuba ataákwiiza akabaho omuuntu weéna wéena omuli íimwe óogwo ayina omuganya gwo obuzilwa, atakwiikiliza, mále alikwaanga kumukulaatila Múungu óogwo ali omulame. 13 Kwoónka mweegumye omuuntu na muzeenzíwe buli chilo éecho tulikwéeta túti “Leélo,” kuba ataákwiiza akabaho omuli íimwe omuuntu weéna wéena owo muganya gugumile habwo kuba abeéhilwe ne ebiheno. 14 Habwo kuba nitukobana na Kristu katulaaba nituzeendelela kumweésiga kuhika aha muhélo, nko óokwo tukaba nitumweesiga aha bubaandizo. 15 Mwiizuke áago agaándikilwe omu Maandiko Matakatíifu gáti,

“Leélo, kamulikuhulila iláka lya Múungu,

mutaákukola emiganya yáanyu kuba egumile,

nko óokwo besiimwe enkúlu bakaba nibaánga kweébeembelelwa neenye.”[d]

16 Mbwéenu, ni baantu chi áabo baáhuliile iláka lya Múungu, náho baáyaanga kweébeembelelwa náze? Ngási, tibo bóona áabo abaabeele nibeebeembelelwa na Musa kuluga omu nsi ya Miísiri? 17 Káandi, ni baantu chi áabo Múungu yaásayiile ha myáaka makúmi aána? Ngási, tibo áabo bakakola ebiheno, bakáfwa omu nsi yo obwoóma? 18 Káandi, ni baantu chi áabo Múungu yaalahíile nka nikwo talibakuundila nakáti kuza ahaantu ho kuhuúmula áaho yaaloongize habwa boónyini? Ngási, tibo áabo bakáanga kumukoondookela? 19 Bityo nitusoomboókelwa nka nikwo abo baantu bakalemwa kuza ahaantu ho kuhuúmula, habwo kuba bakáanga kumwiíkiliza Múungu.

<- Abahebrania 2 Abahebrania 4 ->