Widi'zh nazhon che'n Jesukrist kwa'n mizobni' San Luk

Mixë'l Luk tu yech lo Tioj

1 Nayax men, xa' nak men che'n Jesukrist, mizuxkwa' la bixa' kwent che'n kwa'n mile' Dios xid be, 2 no nela xmod milu' ka men dizde or galo, rë xa' kwa'n une kure' kun zalo bixa', no nu rë xa' kwa'n milu' widi'zh che'n Jesukrist lo men. 3 Kuze', nu ska da mile xigab kë'n rë kure' lo yech, or milox mina'b dizha, miwi'n wena-wen, xmod ngok kwent che'n Jesukrist, dizde or nagat gal Me, O Tioj, lu xa' dox tsak, 4 par ganel, walika widi'zh kwa'n milu' men lol, kwent che'n Jesukrist.

Midi'zh tu ganj che'n Dios lë' Juan gal, xa' lilëi' Krist le'n nits

5 No or nak Herodes rey lo rë men Judea, nzho tu ngulëi' xa' lë Zacarías, tu xa' nzë ben che'n Abías, tu xa' tiemp. No una' che'n xa' lë Sabel, una' re' nzë ben che'n ngulëi' Aarón. 6 No wen nikizë bixa' lo Dios, mbaino nzhon bixa' ro' Dios, nile' bixa' rë kwa'n nzhab Señor. 7 Per gat kinut bixa' xin bixa', porke lë' Sabel nagakt gap më'd, mbaino rop bixa' ya ngwagal la.

8 Per ngol tu ngubizh, lë' ben tsa' ngulëi' Zacarías ngol, le' zhi'n lo Dios, orze' Zacarías ngol xa' le' zhi'n lo Dios. 9 Le'n rë ngubizh ze', se' nak kostumbr che'n rë ngulëi', lë' Zacarías ngol yo le'n yado', par lazh ya'l lo Dios. 10 No dub kilazhya'l xa' lo biko', lë' nayax men nzhin tich, kina'b bixa' lo Dios. 11 Lë'chi ngurulo tu ganj che'n Dios lo Zacarías, al nez lad direch che'n biko' plo nilazhya'l rë ngulëi'. 12 No or une Zacarías ganj re', net xa' kwan le' xa', dox mizheb xa'. 13 Orze' nzhab ganj:

―Zacarías, nazhebtal, porke lë' kwa'n guna'bal lo Dios, lë' Me mbin kai, lë' una' che'nal Sabel gap tu xmë'dal, mbaino ku'lël më'd Juan, 14 no dox zak laxto'l, mbaino zak laxto' rë men, or gal më'd re', 15 porke lë' më'd re', dox tu miyi' gak xa' lo Dios, no nayot go xa' kwa'n nile' nizuzh men, mbaino dub naga gal më'd re', lë' Sprit che'n Dios nzho la laxto' më'd. 16 No lë' më'd re', le' nayax men Israel, lë' bixa' la' kwa'n gat lë't nile' bixa', mbaino yëk bixa' lo Dios che'n bixa'. 17 Juan re' yi'd galo laka lo Señor kun mis poder kwa'n miza' Sprit che'n Dios nka' Li, tu xa' tiemp, par kwin xuz men wen kun xin xa', mbaino par rë men nayi' lazh, tse'd bixa' gon bixa' ro' rë xa' nile' kwa'n ñal, nes par zobyek men widi'zh che'n Dios, Me yë'd re'.

18 Orze' minabdi'zh Zacarías lo ganj ze':

―¿Xmod nen chi walika rë kwa'n kinel lon? Porke na dadgol la, no nu ska una' da mengol la.

19 Orze' nzhab ganj:

―Na lë Gabriel, no nzon lo Dios par len mandad che'n Dios. Lë' Dios mixë'l da par dizha kulu, nzadnin tu widi'zh wen kwa'n le' zak laxto'l. 20 No biwi', por nangayilal kwa'n nin lol, lë'l ya'n mud, nagaktra' di'zhal, haxta ke zhin zhë gak rë kure'.

21 No dub kiyak rë kure', no lë' rë men nzhin al tich kimbëz bixa' ro' Zacarías, no kile' bixa' xigab: “¿Chon zhe'b xche nzho xa' re' le'n yado'?” 22 No or nguro' Zacarías le'n yado', nangaktra' ngadi'zh xa' lo rë men. Orze' ngwanu laxto' rë men, lë' Dios milu' tu kwa'n lo xa' le'n yado', mbaino maska ya' Zacarías nzhak, kidi'zh xa' kun pura señ, orze' mia'n xa' mud.

23 No or milox mitsa Zacarías rë ngubizh che'n xa' kwa'n nile' xa' zhi'n le'n yado', orze' ña xa' lizh xa'. 24 No or nded rë ngubizh ze', lë' Sabel, una' che'n xa' nak xin la, no nangaro't una' lizh una' dub gai' mbëo', kile' una' xigab re': 25 “Lë' Dios mile' kure' kuda, par naxizhnu ra' men da, por nagapa më'd.”

Tu ganj ngwayab lo Mari, lë' Jesús gal

26 Nzha xo'p mbëo' di ngok kure', orze' mixë'l Dios ganj Gabriel tu yezh kwa'n lë Nazaret, kwa'n ña'n lazh men Galilea, 27 plo nzho tu una' ye'n lë Mari, nzo xti'zh par ban kun tu miyi' lë Che; miyi' re' nzë ben che'n rey Dabi. 28 Nguio ganj le'n yo' plo nzho Mari, orze' nzhab ganj:

―¿Mal Mari? ¡Dios niwi' wen lol, no Dios nzo kun lu!

29 No or mbin Mari widi'zh re', net Mari xmod le' Mari, mile' Mari xigab: “¿Chon ne xa' ba' kure' lon?” 30 Orze' nzhab ganj:

―Mari, nazhebtal, porke nazhon nzhal, lë' Dios niwi' lol. 31 Nal biwi', lë'l wei'xin, lë'l gap tu më'd xibyi', mbaino ku'lël më'd JESÚS. 32 Dox tu miyi' tsak gak më'd re' lo Dios, mbaino lë' më'd re' rulë Xmë'd pa' Dios, Me nzho lo yibë', no lë' Señor Dios le', gak më'd re' rey, nela ngok Dabi ga', tu xa' kwa'n ngok mis ben më'd re'; 33 par le' më'd re' mandad par dubta' lo rë men Israel, no nayot lox le' më'd re' mandad.

34 Orze' nzhab Mari lo ganj:

―¿Xmod gak kure', porke gat kinuta' miyi'?

35 Orze' nzhab ganj:

―Lë' Sprit che'n Dios yi'd lol, mbaino kun poder che'n Dios, dubal yao' kun xkal che'n Me, kuze' lë' më'd gapal ba', rulë Xmë'd pa' Dios, më'd nazhon kwa'n le' rë tsa kwa'n nzhakla Dios. 36 No biwi', nu ska tu bël ye'nal, xa' lë Sabel, nzha la xo'p mbëo' nakxin xa', no ter mengol la xa', xa' kwa'n nidi'zh men nagakt gap më'd, 37 porke par Dios, yent kwan nagak le' Dios.

38 Orze' nzhab Mari:

―Biwi' go, Dios nak Me nile' mandad da; le' Dios kuna nela xmod nel lon ba'.

Orze' ña ganj.

Ngwatsi' Mari ma Sabel

39 No le'n rë ngubizh ze', nayen nzha Mari plo nzho Sabel, tu yezh kwa'n nzhin le'n rë yi', kwa'n ña'n lazh men Judea. 40 No or nguio Mari lizh Zacarías, nzhab Mari:

―¿Mal, Sabel?

41-42 No or mbin Sabel widi'zh che'n Mari, tuli miwin më'd laxto' Sabel, orze' mile' Sprit che'n Dios naye midi'zh Sabel lo Mari, nzhab una':

―Nazhon nzhal mile' Dios, más ke lo rë una' nzho yizhyuo; mbaino nu nazhon nzha xmë'dal lo Dios. 43 ¿Cho da, par yi'dtswi' xna' Señor da, ma da?, 44 porke biwi', or mbina midi'zhal, miwin xmë'da laxto'n di tanta nizak laxto' më'd. 45 Nazhon nzhal, por ngwayilal gak rë widi'zh che'n Dios, kwa'n ne ganj lol.

46 Orze' nzhab Mari:

Kun dub laxto'n, zan xkix lo Dios por nazhon Me,

47 no nizak laxto'n por Dios da, Me kwa'n ngulo' da lo rë kwa'n nzë'b xkin,

48 porke Dios miwi' lon,

ter nak da nela tu mos nado ga' lo Dios, tu men kwa'n natsakt tuli.

Per biwi', dizde nal ra', rë men kwa'n yo yizhyuo, di'zh nazhon nzhan,

49 porke lë' Dios Me kwa'n nzhak nile' rë kwa'n, mile' kwa'n dox kwa'ro kuda,

no nazhon lë Me.

50 No nilats laxto' Dios rë xa' nzhon ro' Dios,

dizde xmë'd xa' haxta rë xa' gak ben che'n xa'.

51 Mile' Dios kwa'n nazhon kun poder che'n Dios.

Mika'n Dios lo rë xigab che'n rë men nizi dox tsak,

52 no ngulutin Dios rë xa' nile' mandad,

par ngulo Dios rë men nado' xlugar bixa'.

53 No miza' Dios nayax kwa'n wen ka' rë men prob,

no lë' men rrik, mile' Dios mia'n bixa' se'tsa.

54 Ngoknu Dios rë men che'n Dios, rë men Israel;

nangaya'lt laxto' Dios, lë' Dios nilats laxto' bixa',

55 nela xmod mila' ka Dios di'zh lo rë xuz be, xa' tiemp;

lo Abraham, no lo rë xa' nzë ben che'n xa'.

56 No como chon mbëo' mia'n Mari lizh Sabel, orze' nguiubre Mari, ña Mari lizh Mari.

Ngol Juan, xa' mililëi' Krist le'n nits

57 No or ngol ngubizh gal xin Sabel, orze' ngol xin xa' tu më'd xibyi'. 58 Or mbin rë xa' kwa'n nzho gax kun lë' una', no rë melizh una', lë' Dios milats laxto' una', orze' nu bixa' nizak laxto' kun lë' una'. 59 No or nded xon ngubizh, ngwa bixa' lo më'd, mikë' bixa' señ kwa'n lë circuncisión ze' më'd, no nzhakla bixa' ngarolë më'd nela lë xuz më'd, Zacarías. 60 Orze' nzhab xna' më'd:

―Narulët më'd sa', lë' më'd rulë Juan.

61 Orze' nzhab bixa':

―Per yent cho melizhal lë Juan.

62 Orze' minabdi'zh bixa' kun pura señ lo xuz më'd, par gab xuz më'd xmod rulë më'd. 63 Orze' mina'b xuz më'd tlë' tab win, mizobni' xa': “Lë' më'd lë Juan.” Orze' xe mia'n rë men tuli.

64 Haxta orze', ngok midi'zh Zacarías, tuli ka nzhab xa': “¡Dox nazhon Dios!” 65 Orze' rë xa' nzhin xa' gax kun lë', mizheb bixa' tuli, no rë xa' nzho rë yezh kwa'n nzhin le'n rë yi' lazh men Judea, mbin bixa' rë kure'. 66 No rë xa' ze', mile' bixa' xigab: “¿Kwan le' më'd re' or ro'b më'd?”, porke dox nazhon kwa'n mile' Dios kun lë' më'd.

Kant kwa'n mikë' Zacarías lo Dios

67 Orze' mile' Sprit che'n Dios midi'zh Zacarías, nzhab xa':

68 Dox nazhon Dios che'n rë men Israel,

yi'dgo' Me be, lo rë kwa'n nzë'b xki be.

69 Lë' Dios xë'l tu xa' dox kinu poder xa' ko' be lo kwa'n nazhe'b.

Xa' re' yi'd ben che'n rey Dabi.

70 Lë'i gak nela xmod midi'zh Dios lo rë men che'n be, xa' ngok profet,

71 par lat Me be lo rë xa' nidil be,

mbaino par ko' xa' be ya' rë xa' kwa'n niyi' nine be,

72 par ne be, lë' Dios se'gaka nilats laxto' rë xuz be, xa' tiemp,

mbaino par lu' Dios, lë' Me se'gaka nitsila kwa'n mila' Me di'zh lo bixa'.

73 Se' mila' Dios di'zh lo xuz be Abraham, xa' tiemp.

74 Lë' Dios lat be ya' rë men xa' niyi' nine be,

par niyentra' kwan zheb be, le' be kwa'n nzhakla Dios,

75 dub nambe laxto' be lo Dios,

dub tiemp kwa'n naban be nali yizhyuo re'.

76 No lu, xmë'da, lë'l rulë xa' nidi'zh por Dios, Me kwa'n nzho lo yibë',

porke lo Señor yal,

par xa'lal nez che'n Señor,

77 par le'l ne men che'n Dios, xmod nak nabantra' bixa' lo kwa'n gat lë',

par ro' bixa' lo rë kwa'n nzë'b xki bixa',

78 porke por nazhi' Dios men no nizine laxto' Me men.

Kuze', dizde al ya' lo yibë' yi'd Me,

par yani laxto' men, nela or ñanilyuo xtu zhë ga',

79 par zini Me lo rë xa' naban lo yalzi che'n xki bixa',

mbaino zini Me lo rë xa' nazubxax yalgut tich,

par ku'nez Me be plo zi be chul.

80 No nzharo'b më'd, no nzharo'b nu më'd rë jwers, par nile' më'd gan lo rë kwa'n gat lë', no pura rë plo yent men nguio xa', haxta zhë or ngurulo xa' lo rë men Israel.

San Lucas 2 ->