Apocalipsis 5

Te guijtz näj te ni najc Xiil xten Dios

1 Dxejcru narä Juan bahuiä lo nani sobga' lo yagxhilroga. N̲aani ladbee ca'ni te libr, najcni si'c te biliu guijtz. Caj diidx nez lojni caj diidx nez dejtzni, nadxe'ni, caj gajdz seii lojni. 2 Dxejcti bahuiä lo te xangl Dios ni nadipduxh, dip guniini, najni:

―¿Chuni'c riäjḻ guxhal guijtzre? ¿Chuni'c riäjḻ gutiäjs reseiire?

3 Niluxh nicla tej bejṉ di nidxäjl ni riäjḻ gutiäjs reseiiga te guxhalni guijtzga; nicla xhaguibaa, nicla lo guedxliujre, nicla xhajiät nez neṉ guedxliuj. Niclaza nidxäjl chu niajc nuhuii lo guijtzga. 4 Narä ronduxhä sa'csi nicla tej rut riäjḻdi gutiäjs reseiiga, niclaza ni riäjḻ goḻ guijtzga, niclaza ni riäjḻ fiitis lo guijtzga. 5 Dxejcti gunii te beṉgool loä, najni:

―Na'cru goonlu. Bahuii gan, niguii ni rniireni Lioṉ, xagdoo toJudá, xagdoo toDavid, abejnni gaan lo yäḻgujt ni'c ṉaj riäjḻ guxhalni guijtzga, gutiäjszani guigajdz reseiiga.

6 Dxejc bahuiä nez cadro suga' yagxhilroga näj guidap remanga, näj cadro suga' guiraa rebeṉgool luxh te galäiiga suga' tej ni najc Xiil xten Dios, astoo abagu'trenini. Sojb gajdz xca'chni näjza gajdz balojni, ni najc gajdz Sprit xten Dios nani ruxhaḻni guiraa nez lo guedxliuj. 7 Laani gubigni, cua'ni guijtzga, guläänini ṉaa ladbee xten nani sobga' lo yagxhilroga canibee. 8 Che cua'ni guijtzga, guidap remanga näjza guigaḻbitap rebeṉgool bazuxhijbreni nez loj Xiilga. Tejga rebeṉgoolga ca' te arp, ca'zareni taz oor guidxa te ni najc si'c yaal. Yaalga najc guiraa reyäḻrbejdx, yäḻrniab xten rexpejṉ Dios. 9 Cayoḻzareni te dicoob ni najc scree:

Guejblu sacduxh,

riäjḻpac xca' Guejblu guijtzga,

gutiäjs Guejblu reseiiga, sa'csi bagu't rebejṉlu,

näjza xtiejnlu gudijx xcuent bejṉ lo Dios.

Gudijxlu xcuent bejṉ ni najc garen-garen ṟaz,

ni rnii garen-garen didxsaj,

ni siääd garen-garen guejdx lo garen-garen ladxbejṉ.

10 Badeedlu gacreni ṟeii näjza bixhojz lo Dios.

Laareni sinibeereni rebeṉ guedxliuj.

11 Che bahuiä, biejn diagä xse' xhidalduxh xangl Dios ni suga' guideb gabi yagxhilro cadro rbej nani rnibee, näjza xse' guidap reman, näjza xse' guiraa rebeṉgool. Luxh di gacdi guigab xangl Dios ni tre' ro'c sa'csi xhidalduxhtej najcreni, xhidalduxh miyoṉ najcreni. 12 Dipduxh najc xse'reni, caniireni scree:

Sacduxh Xiil nani bagu'treni,

ni'c riäjḻ xca'ni yäḻrnibeduxh, yäḻrapduxh, yäḻnanduxh, yäḻmilagwr.

Riäjlza guiliä'pnu xpala'nni, guzuxhijbnu lojni gaṉnuni, gudeednu xquixtios lojni.

13 Dxejcti biejn diagä xse' guiragajcreni, guiraa reni benchee Dios ni yu' xhaguibaa, näj guiraa reni yu' loj guedxliujre, näjza guiraa reni yu' xhajiät nez neṉ guedxliuj näj lo nisdoo, biejn diagä caniireni scree:

Loj nani sobga' lo yagxhilro cadro rnibeeni,

näjza loj ni najc Xiil xten Dios, laatisni sacduxhni,

guiliä'pnu xpala'nni, guzuxhijbnu nez lojni gaṉnuni,

gäbzanu rinibeeni par tejpas.

14 Dxejcti guidap remanga rnigajcreni scree:

―Sugacni si'c.

Dxejcti guigaḻbitap rebeṉgool bazuxhijbreni nez loj nani nabajṉ par tejpas, gojṉrenini.

<- Apocalipsis 4 Apocalipsis 6 ->