San Marcos 6

Che guyu' Jesús Nazare't

(Mt. 13:53‑58; Lc. 4:16‑30)

1 Dxejcru birii Jesús ro'c, huijni lajdxni, sanäzani rexpejṉpacni. 2 Che bidzujṉ sabd, dxej nani rusilajz rexpejṉ Israel, gusloj caguluiini neṉ xquidobäz rexpejṉ Israel. Bidxeloj xhidajl bejṉ nani biejn diajg rextiidxni, räjpreni:

―¿Caro bisieed niguiire guiraa recosre? ¿Xhi yäḻnajnre cua'ni ni'c rajc rujnni rextzunduxh Dios con ṉaani? 3 ¿La xhet laadi carpinteer, xi'n Marii, bejtz Jacoob, näj José, näj Judas, näjza Simón dee, ä? ¿La xhet reedi rbäjz rebisianhuinni?

Luxh bidxechlajzreni lojni. 4 Dxejc räjp Jesús lojreni:

―Catis rinälajzreni te ni rnii xtidx Dios. Lajdxtisni, lagajc loj resa'ni, rolijztisni, ro'c rut rinälajzdini.

5 Luxh di niajcdi niujn Jesús xhidajl milaagwr ro'c. Tiopchoṉtis beṉracxhuu basiajcni, bazujni ṉaani yejcreni. 6 Bidxelo Jesús sa'csi di lajzreni nilii. Caguluiitini neṉ guiraa reguejdxe' ni ria'n gajxh nejzga.

Baxhaḻ Jesús tzubitio'p bejṉ ni rinajlni chaluiireni xtidx Dios

(Mt. 10:5‑15; Lc. 9:1‑6)

7 Dxejcru gurejdxni guitzubitio'p xpejṉpacni. Gusloj caguxhaḻni tiopgajreni; badeedzani yäḻrnibee lojreni te guinibeereni loj rebeṉdxab. 8 Gunibeeni xhet chanädireni lo nejz, ganaxhtis te yajg te sanäjreni. Di nungäjḻ chanäreni nicla bisiuud, nicla yätxtiil, niclaza meel neṉ dobdäjl. 9 Nungäjḻza xcaj gura'ch ni'reni, nägajc ga'preni tejtis gamangw, xhet tio'pdini. 10 Dxejcti räjpni lojreni:

―Cadrotis jiu'tu neṉ te guejdx, coḻjia'n neṉ tejtis yu' guiraa redxej ni chutu guejdxga. 11 Palga yu' te guejdx cadro direni gusaan jiu'tu luxh di rlajzreni cuadiajgreni diidx ni sanätu, coḻṟii guejdxga, coḻcuijb guxhuj ni'tu si'c te seen te gacbeereni xhet laadi bejnreni. Rniliä́pac lojtu, guxiiru trabajw ted rebeṉ Sodoma näj rebeṉ Gomorra quela rebejṉ ni yu' guejdx cadro direni gusaan jiu'tu.

12 Dxejc biriireni, sääreni. Cayäbgajcreni nanabpac gusiejch lajz rebejṉ. 13 Gulääzareni xhidajl beṉdxab dxejcti gudääbreni se't yejc xhidajl beṉracxhuu, luxh biajcreni.

Xcäḻgujt Juan ni rutiobnis

(Mt. 14:1‑12; Lc. 9:7‑9)

14 Herodes najc nani rnibee dxejc. Biejn diajgni xpala'n Jesús, sa'csi guiralii rebejṉ calä'p xpala'nni. Dxejc räjp Herodes:

―Juan nani rutiobnis ahuäjs loj rebeṉgut, ni'c rajc rujnni remilagwre.

15 Sgaii bejṉ räjp:

―Laa Elías ni gunii xtidx Diosni.

Sgaiireni räjp:

―Laa te bejṉ ni rnii xtidx Dios, o sa' te rebejṉ ni gunii xtidx Dios agujc xchero.

16 Che biejn diajg Herodes si'c, räjpni:

―Laa Juan dee, nani gunibeä biru' yejcni, luxh ṉaj agubaṉsacni loj rebeṉgut.

17 Sa'csi lagajc Herodes gunibee biga' Juan, dxejc bacuaduurenini con cadeṉguiib neṉ latzguiib, xcäḻnasa'c Herodías. Herodías gujc chääl Lib, bejtz Herodes, dxejc cua' Herodes gunaaga si'c chäälni. 18 Räjp Juan loj Herodes:

―Xhet laadi rbäznäjlu chääl bejtzlu.

19 Ni'cni rdxechlajz Herodías loj Juan, luxh rlajzni ju'tnini, luxh di niajcdini 20 sa'csi rdxejb Herodes Juan, sa'csi najnni beṉsa'c, beṉdxan najc Juan, ni'cni dini nusaan niujn Herodías latsiajni. Mase dini gacbesa'c ni rnii Juan, rucuadiagsa'cni xtiidxni. 21 Niluxh guyu' xmood Herodías. Che gojḻ laj Herodes, bayaanni rexpejṉni ni rnibee, näjza rebejṉ nani sajc nez región Galilee. 22 Dxejcti biu' xindxa'p Herodías cadro cayajwreni, baya'ni nez lojreni. Bidxaglazduxh Herodes näjza rexpioozni baya' gunaaga, xindxa'p Herodías. Dxejc räjp Herodes lo gunaaga:

―Gunab ni rlajztislu loä, narä sunidxäni.

23 Dxejcru räplii Herodes lojni:

―Sunidxä xhitis ni guiniablu. Mase gala' yuj ni rnibeä.

24 Biriitini neṉ yu', huiye'tzni loj xnanni, räjpni:

―¿Xhini'c guiniabä lojni?

Dxejc räjp xnanni lojni:

―Gunab yejc Juan ni rutiobnis lojni.

25 Huigajcni loj ṟeii, sas gunabni lojni, räjpni:

―Rlazä gunidxgajclu loä yejc Juan ni rutiobnis. Neṉ te pla't baniidx yejcni.

26 Dxejcti guc-huinduxh lajz Herodes, sa'csi abadeedni xtiidxni lojni, luxh sa'csi abiejn diajg renani sobganäjni lo xmexni, ni'c dipac rlajzni nudxojnni nani gunab gunaaga lojni. 27 Baxhaḻgajc ṟeii te soldaad ni rcanäj ro'c, baxhaḻnini, te chaxiini yejc Juan. 28 Ni'c huij, dxejcti bagu'tni Juan neṉ latzguiib, biädnätini yejc Juan neṉ te pla't. Badeedtinini loj gunaaga. Dxejcti gunaaga badeednini loj xnanni.

29 Che biejn diajg rexpejṉpac Juan si'c, biädläsreni togoolga. Dxejcti bacua'tzrenini neṉ te baa.

Bayaan Jesús gaii mil bejṉ

(Mt. 14:13‑21; Lc. 9:10‑17; Jn. 6:1‑14)

30 Che gubi' renani baxhaḻ Jesús, bijreni diidx guiraa ni bejnreni näjza ni baluiireni. 31 Dxejc räjp Jesús lojreni:

―Coḻtaa, xtebnu choṉnu cadro rut rbäjzdi, guisilaaznu tudxe'n.

Räjp Jesús si'c sa'csi yu' xhidajl bejṉ ni sää, ni siääd, nicla gaḻ gauureni. 32 Dxejcti sääreni neṉ te canuu cadro rut rbäjzdi. 33 Bahuii xhidajl bejṉ sääreni, biembeereni Jesús. Dxejc xhidajlreni huini' ro'c, xhidajl guejdx biriireni, ganidreni bidzujṉreni loj Jesús näjza rexpejṉpacni, dxejcti bidojpreni lojni. 34 Birii Jesús neṉ canuu, bahuiini loj beṉxhidaalga. Dxejc balazlajznireni, sa'csi najcreni si'c rexiil ni ruti baxtoor xtenreni. Dxejc gusloj caguluiinireni guiraloj. 35 Che gojḻ gudxej, gubig rexpejṉpacni lojni, räjpreni:

―Rut rbäjzdi ree, luxh agudxej ṉaj. 36 Baxhaḻ rebejṉ te chääreni lo reguejdx, näjza reṟench, te chasiireni yätxtiil gauureni sa'csi xheti xhi gauureni ree.

37 Dxejc räjp Jesús lojreni:

―La'tu coḻdeed xhi gauureni.

Dxejc räjpreni loj Jesús:

―¿Xhixh sajl tiop gayuu meel yätxtiil chosiinu gauu guiraa rebeṉxhidajlre?

38 Dxejcti räjp Jesús lojreni:

―¿Bal yätxtiil rajptu? Coḻchahuii.

Che gojnreni balni dxejc räjpreni:

―Gaii yätxtiil, näjza tiop bäjl.

39 Dxejcru gunibee Jesús räjpreni loj guiraa rebejṉ:

―Coḻcuej xcua-xcuaatu loj guixhaya'.

40 Sas gurej xcua-xcuaareni. Yu' lajt gurej tegayuureni, yu' lajt gurej garol gayuureni. 41 Dxejcti cua' Jesús guigaii yätxtiilga näjza guiro'p bäjlga, bahuiini xhaguibaa, badeedni xquixhtios loj Dios. Dxejcti gula'ni yätxtiil näjza guiro'p bäjl, badeednini loj rexpejṉpacni te badeedrenini loj guiraa rebeṉxhidaalga. 42 Dxejc gudajw guiraareni, gudxaj xque'reni. 43 Dxejcru batojpreni tzubitiop dxijm̲ guidxadoo yätxtiil näjza bäjl ni bia'n. 44 Luxh loj guiraa rebejṉ ni gudajw yu' si'cti gaii mil niguii.

Guzaj Jesús loj nis

(Mt. 14:22‑27; Jn. 6:16‑21)

45 Gunibee Jesús jiu' rexpejṉpacni neṉ canuu, chägajcreni Betsaida, ni tre' dejtz nis stelaad, laḻni cagusadiidxni rebejṉ. 46 Che gulujx basadiidxnireni, sääni neṉ redane', sanabni lo Dios. 47 Cheni acayu' guxhijṉ, yu' rexpejṉpacni neṉ canuu galäii nis laḻ ni suga' Jesús xtebni ro' nis. 48 Dxejcti bahuii Jesús abadxajgreni cagusajreni xcanuureni, sa'csi säbduxh bej. Bejga rulanaareni nez dejtzreni stehuält. Dxejcru che acara yääl, gusaj Jesús loj nis, huijni cadro sasajreni, rlajzni ninijdni lojreni. 49 Dxejc che bahuiireni sasaj Jesús loj nis, naareni pet te beṉmalni, ni'c guredxa'reni. 50 Guiraareni bahuiireni lojni, bidxebduxhreni. Sas gunigajcni lojreni, räjpni:

―Coḻsutijp lajztu. Laa naräni. Na'c guidxejbtu.

51 Dxejcti huä'p Jesús neṉ canuu cadro yu'reni. Lagajc dxejc biacdxi bej, luxh laareni bidxeloduxhreni, 52 sa'csi direni niacbee xhini'c bennäj Jesús reyätxtiil. Guc najd lajzreni, ni'c direni niacbee.

Basiajc Jesús rebeṉracxhuu neṉ guedx Genesare't

(Mt. 14:34‑36)

53 Gudejdreni lo nis, bidzujṉreni lo yuj xten Genesare't. Ro'c bacuaduureni canuu ro' nis. 54 Che biriireni neṉ canuu, biembegajc rebejṉ Jesús, 55 dxejcti birii rebejṉ guideb nejzga. Guslojti siädnäreni beṉracxhuu loj Jesús, naga' rebeṉracxhuuga lo da'. Cadrotis riejn diajgreni yu' Jesús riädnäreni rebeṉracxhuu. 56 Niluxh cadrotis rij Jesús, neṉ reguedxbäz, neṉ reguedxro, näjza loj reṟench, rguixhreni rebeṉracxhuu cadro rajc guii. Dxejcti rniabreni loj Jesús te gac caanreni xhajbni, niluxh biajc guiralii renani gudajn xhajb Jesús.

<- San Marcos 5 San Marcos 7 ->