San Lucas 4

Che biricaj beṉdxab loj Jesús

(Mt. 4:1‑11; Mr. 1:12‑13)

1 Jesús, sa'csi rbäjz Sprit Dxan xten Dios lastooni, biunejzni gueu Jordán, dxejc huinä Sprit Dxan xten Diosni lo reyubijdz. 2 Ro'c bia'nni tiuu gubijdx, tiuu guxhijṉ. Ro'c bidzujṉ beṉdxab ni rnibee te rlajzni gunni gusoob Jesús xtiidxni. Luxh calaan Jesús, sa'csi gajdni gau guiraa neṉ redxejga. 3 Dxejc räjp beṉdxab lojni:

―Palga guliilu Xi'n Dioslu, gunibee gac reguijre yätxtiil.

4 Badzu' Jesús diidx lojni räjpni:

―Acaj loj reguijtz xcuent Dios: “Xhet ganaxdi yätxtiil gun sajc guibajṉ bejṉ, näjza guiraa diidx nani rnii Dios sujn guibajṉ bejṉ.”

5 Dxejcti huinä beṉdxab Jesús jiaa yejc te dajn. Teratbäztis baluilojni guiraa reguedxro ni tre' lo guedxliuj. 6 Dxejc räjp beṉdxab lojni:

―Narä sunidxä guiraa yäḻrnibee näjza reyäḻnasa'c ni yu' loj reguejdxga sa'csi xtenä guiraareni, luxh sajc gudedäni lo chutis ni rlazä. 7 Palga luj suzuxhijblu loä, guiliä'plu xpala'nä, guiraani sajc xtenlu.

8 Dxejc Jesús badzu' diidx, räjpni lojni:

―Acaj loj xquijtz Dios: “Dad Xtiostislu gaṉlu, luxh lojtisni chulu gunlu dzuun.”

9 Dxejcti huinä beṉdxabni lo guedx Jerusalén, huinänini jiaa yejc xques guidoro. Dxejc räjp beṉdxab lojni:

―Palga guliilu najclu Xi'n Dios, gutiäjs lo yuj 10 sa'csi si'c caj loj rexquijtz Dios:

Suxhaḻ Dios rexanglni te ga'preni luj,

11 guiniaazreni luj didi jiajblu lo guij.

12 Badzu' Jesús diidx lojni, räjpni:

―Cajza lo rexquijtz Dios: “Na'c faḻlu Dad ni najc Xtioozlu.”

13 Che baluux beṉdxab rextiidxni, gubicajni lo Jesús sa'csi dini niujn gaan nusoob Jesús xtiidxni. Guläjzni guidzujṉ stee dxej te gusacsíruni Jesús.

Gusloj Jesús cayujn xtzuunni

(Mt. 4:12‑17; Mr. 1:14‑15)

14 Dxejc gubi' Jesús lo rexyuj Galilee räjpni yäḻrnibee xten Sprit Dxan. Bire'ch diidx xcuentni guiraa neṉ reguejdx ni tre' nejzga. 15 Ruluiini neṉ reguidobäz luxh guiraa rebejṉ rliä'p xpala'nni.

Jesús guyu' guedx Nazare't

(Mt. 13:53‑58; Mr. 6:1‑6)

16 Dxejcti huij Jesús guedx Nazare't cadro gulaani. Che gojl dxej ni rusilajz rexpejṉ Israel, biu'ni neṉ guidobäz sigajc ni rujnpacni, dxejc huisuliini te biḻni 17 reguijtz xten Dios. Badeedreni lojni guijtz ni bacuaa Isaías; cheni baxhalni guijtzga, bidxälni cadro rnii scree:

18 Sprit Dxan xten Dios suganäj narä,

sa'csi agule Dios narä te gusule'ä xtidxcoobni lo rebeṉproob.

Baxhaḻni narä te gusiacä lastoo renani di lastooreni cuedxi,

te gusule'ä yäḻrusḻaa lo rebejṉ ni yu' lo dojḻ,

te gusiacä baloj rebeṉ lotiä'p, te gusḻaä́ rebeṉ ni cadejd trabajw,

19 te gusule'ä abiu' ijzsa'c che rulaslajz Dios rebejṉ.

20 Dxejc basäu Jesús reguijtzga, badeednini loj bejṉ ni cayacnäj neṉ guidooga, dxejc gurejni. Sa'csi guiraa rebejṉ ni sobga' neṉ guidooga cahuidzu'tzreni lojni, 21 gusloj guniini, räjpni lojreni:

―Lagajc nadxej guzojb rediidx ni caj lo reguijtzre nez loj guiraatu.

22 Guiraareni sarú guniireni xcuent Jesús, bedxeloduxhzareni redidxsaruduxh ni guniini lojreni. Gunabdiidxreni loj sa'reni, räjpreni:

―¿La et xi'ndi José dade're, ä?

23 Dxejc räjp Jesús lojreni:

―Siniipactu rediidxre loä: “Doctoor, basiajc lagajc luj”; siniizatu loä: “Recos ni biejn diajgnu bejnlu nez guedx Capernaum, lagajc recosga bejn nez ree cadro najc lajdxlu.”

24 Dxejc huinuu xtiidxni, räjpni lojreni:

―Rniliä́pac lojtu, nicla tej redade' ni rnii xtidx Dios, di rebeṉ lajdxreni jiu xtiidxni. 25 Luxh rniliä lojtu, che gubajṉ Elías lo guedxliuj, guyu' xhidajl gunabiuud guedx Israel che di nisguij niajb choṉ ijz garol, dxejc guyu' yäḻrlianduxh guideb guejdxga. 26 Luxh di Dios nuxhaḻ Elías rolijz nicla tej regunabiuud ni guläjz guedx Israel, alga baxhaḻnini lo beṉzijt, rolijz te gunabiuud ni rbäjz Sarepta, gajxh guedx Sidón. 27 Sigajcza che gubajṉ Eliseo lo guedxliuj, guyu' xhidajl beṉ racxhuu ni raḻ tiejxhreni guedx Israel, luxh dini nusiajc nicla tejreni, alga basiajcni dade' ni laa Naamán, ni siääd te guedxzijt ni laa Siria.

28 Che biejn diajg reni sobga' neṉ guidoo rextidx Jesús, bidxechduxhreni, 29 huisuliireni, guläärenini neṉ guejdxga. Dxejc huinärenini yejc dajn cadro tre' guejdxga cadro yu' te balaro, te ro'c rlajzreni nustejbrenini. 30 Dxejc Jesús sigaj gudejdni galäiireni, sä'tini ste'ca lajt.

Gulää Jesús beṉdxab lastoo te dade'

(Mr. 1:21‑28)

31 Dxejc huij Jesús guedx Capernaum, te guejdx xten Galilee. Ro'c gusloj cagusule'ni diidx loj rebejṉ che gojl dxej ni rusilajz rexpejṉ Israel. 32 Bidxeloduxhreni xtiidxni sa'csi rusule'ni si'c te beṉnajn, si'c te ni rnibee.

33 Neṉ guidooga suga' te dade' ni rbäjz te beṉdxab neṉ lastooni. Guredxa'ni 34 räjpni:

―¡Aii! ¡Basaan nurnu! ¿Xhicuent riädchu'lu loonu Jesús ni siääd Nasare't? ¿La siäädlu te gunitlojlu nuurnu, ä? Narä numbeälu, nanä najclu Xin Dxan Dios.

35 Gudidxa' Jesús lo beṉdxabga, räjpni lojni:

―Basäu ro'lu, birii lastoo niguiire.

Dxejcti beṉdxabre basäḻ niguiiga lo yuj nez loj guiraareni, dxejc biriini neṉ lastoo dade'ga, per xhet bejndini dade'ga. 36 Bidxeloduxh rebejṉga, dxejc gusloj caniireni lo sa'reni, räjpreni:

―¿Xhi diidx najc redee? Bahuii xho rnibee dade're rebeṉdxab con yäḻrnibee, luxh rusoob rebeṉdxab xtiidxni, ṟiireni lastoo bejṉ.

37 Dxejc gusääb xtidx Jesús lo guiraa reguejdx ni tre' guideb gabi guejdxga.

Rusiajc Jesús xnan xueerg Pedr

(Mt. 8:14‑15; Mr. 1:29‑31)

38 Birii Jesús guidobäz, huijni rolijz Simón. Dxejc naga' xnan sueerg Simón, cayacxhuuni, yu'ni xliaduxh. Sas gunabduxhreni lojni te gusiajcnini. 39 Gubig Jesús loj nane'ga, gudidxa'ni xliaaga, luxh lagajc oṟga biriini xliaa. Dxejc huistiegajcni, gusloj cayujnni mandaad, cahuiinireni.

Rusiajc Jesús xhidajl yäḻracxhuu

(Mt. 8:16‑17; Mr. 1:32‑34)

40 Laḻ ni cayääz gubijdx, guiraa reni rajp beṉracxhuu ni rajc garen garen yäḻracxhuu biädnäreni rebejṉga lo Jesús. Dxejc laani batzuubni ṉaani yejc tejgareni, dxejc biajc rebeṉracxhuuga. 41 Loj rebeṉracxhuuga, yu'reni birii rebeṉdxab neṉ lastooreni, rbedxa'reni räjpreni:

―Luj najclu Xi'n Dios.

Luxh Jesús gudiḻnäjni rebeṉdxab, dini nusaa niniireni sa'csi laareni najnreni najcni Crist ni cabäjzreni.

Rusule' Jesús xtidx Dios

(Mr. 1:35‑39)

42 Che bianij, biriini lo guejdx, huijni te lajt cadro rut rbäjzdi. Niluxh gudiil rebejṉni, dxejc bidzujṉreni cadro suga'ni. Rlajzreni nuscuääzrenini te di nuiini. 43 Dxejc Jesús räjp lojreni:

―Nanab cha'a chasule'ä rextidx xcuent xcäḻrnibee Dios xhidajlruza guejdx, ni'cni baxhaḻpac Dios narä.

44 Dxejc si'ctis cuanzaj Jesús basule'ni xtidx Dios neṉ guiraa reguidobäz neṉ reguejdx xten Galilee.

<- San Lucas 3 San Lucas 5 ->