1 Gudé na' ble'eda' betaj xetú gubáz chee̱ xabáa, nápale̱'e̱ xel-la' dxenná bea, na' bsení' xel-la' szren chee̱' lu xe̱zr la xu. 2 Na' gunné̱' zizraj:
―Ba guzría xi'. Ba guzría xi' Babilonia, xe̱zre zrentau' na', ne ba bexaca na lataj naga zaj zra' da xriwe̱' ca', ne lataj naga zaj zra' xúgute̱ cue' be' xriwe̱' ca', ne lataj naga zaj zra' be̱ zua xrila, be̱ schanni' ca', ne be̱ sgute ca'. 3 Xúgute̱ bénneache zaj zre̱'e̱ tu tu cue' xe̱zr la xu zaj naque̱' ca benne' dxelezuzre', lawe' da dxelune̱' da sban da dxaca xe̱zre na', na' benne' wenná bea ca' zaj zre̱'e̱ xe̱zr la xu belune̱' da sban da dxaca xe̱zre na', na' benne' ca' dxelúti'e gulaque̱' benne' gunní'a ne̱ chee̱ da zante̱ da gulezá lazre' benne' ca' zaj zre̱'e̱ xe̱zre na'.
4 Nadxa benda' chi'i xetú benne' da za xabáa, dxenné̱':
―Le dxuaj xe̱zre na', le'e, nácale chia', chee̱ quebe gácale benne' ca' tuze lu dul-la da dxelune̱', ne chee̱ quebe tele lu da ba xa' da xelezaca benne' ca'. 5 Dul-la chee̱ benne' ca' ba guxán na, na' zaj naca na ca tu da ba bgula, da ba bzrinte̱ na zran xabáa, na' Dios ba xeajsá lazre̱' ca naca da zrinnaj da dxelún benne' ca'. 6 Dios gunézruje̱' chee̱ benne' ca' cáte̱ze da bulunézruje̱' chee̱ benne' xula, ne xunézruje̱' le̱' chupa cuenla ca da zrinnaj da belune̱'. Ba nucueze̱' da xelezaque̱' da nácale̱'e̱dxa zi' ca da bulusaque̱' benne' xula. 7 Gudée̱' benne' ca' lu da ba xa', ne gudée̱' le̱' xel-la' zi' cáte̱ze na' belune̱'. Buluzúa cuine̱' lu xel-la' szren, ne gulezúe̱' lu xel-la' dxelexezaca ba lazre' chee̱', lawe' da dxelenné̱' lu lázrdawe̱': Dxé'entu' nigá dxenná béantu'. Quebe nácantu' we̱ze̱be, ne quebe bi sácantu'. 8 Chee̱ le̱ na', tuze zra xelezrín da ba xa' ca' da xelezaque̱', xel-la' gute, ne xel-la' zi', ne xel-la' dxedún, na' xelezxe̱' lu xi', lawe' da napa Xránadxu Dios dute̱ xel-la' dxenná bea, na' naque̱' Bénnea' guchugue̱' chee̱ benne' ca' xelezaque̱' caní.
9 Benne' wenná bea ca' zaj zre̱'e̱ xe̱zr la xu, ne belúnle̱ne̱' benne' ca' da sban ne da belexezaca ba lazre̱', xelebezre xache̱' gate xelelé'ene̱' ca naca zren chee̱ xe̱zre na', da dxezxe na. 10 Welezé̱' zítu'la lawe' da xelezrebe̱' xelezaque̱' ca da dxelezaca benne' ca', na' xelenné̱':
―Baxache' nácale le'e, benne' zaj zre̱'e̱ xe̱zre zrentau', Babilonia, lawe' da chadite̱ bla' da ba xa' da dxezácale.
11 Cá'anqueze benne' ca' dxelúti'e, benne' zaj zre̱'e̱ xe̱zr la xu, welebezre̱', ne welebezre xáchequeze̱' ca naca da dxaca chee̱ xe̱zre na', lawe' da québedxa nu chilá' benne' si'e̱ da dxeluti'e̱,
12 da zaj naca oro, ne plata,
ne xiaj xrtante̱ ca', ne bga ca',
ne ladxe' zaca ca', ne ladxe' bzawe ne da xrna,
ne xúgute̱ cue' xaga ca' dxelelále̱'e̱ na zixre,
ne zrita xrtante̱, ne xaga xrtante̱,
ne xia gache, ne xia, ne xiaj esa',
13 ne lacu zixre, ne xíxre'dau' dxelále̱'e̱ na zixre,
ne xala, ne da ca' dxelelále̱'e̱ na zixre,
ne xrise uva wala, ne za xel-la' wagu,
ne xrte xezaj, ne zrua' xtila,
ne be̱ xixre', be̱ dxelúa xua',
ne zrila' ca', ne bzrina' ca',
ne da ca' dxudé xua,
ne benne' ca' dxelúti'e̱ le̱' lu na' benne' gunní'a ca'.
―Na'a québedxa gápale da zixre ca' da zácale̱'e̱ na da bdánnele̱'e̱le, ne ba bnítele tu chí'izqueze xúgute̱ xel-la' gunní'a chee̱le, ne da xrtante̱ chee̱le.
15 Benne' ca' belúti'e̱ da ca' xelezé̱' zítu'la lawe' da dxelezrebe̱' xelezaque̱' ca da dxelezaca benne' zaj zre̱'e̱ xe̱zre na', na' xelebezre̱', ne xelebezre xáchequeze̱', 16 na' xelenné̱':
―Baxache' zaj naca benne' ca' zaj zre̱'e̱ xe̱zre zrentau' na'. Gulaque̱' ca tu nu'ula nacue̱' ladxe' zácale̱'e̱ da bzawe, ne da xrna, ne nazí'e̱ lechítaje̱ da naca na oro, ne xiaj xrtante̱, ne bga ca'. 17 Chadite̱ benite xel-la' gunní'a na', ne guxezxe na.
Xúgute̱ benne' xrane da ca' dxeledán lawe' nísadau', ne benne' zaj zre̱'e̱ lu'ule na, ne benne' dxulusé̱'e̱ da ca' dxeledán lawe' nísadau', ne benne' dxelune̱' zrin lu nísadau' belezé̱' zítu'la, 18 na' gate belelé'ene̱' zren chee̱ xe̱zre na' dxezxe na, na' gulenné̱' zizraj:
―¿Bízraqueze xetú xe̱zre naca na da zren ca xe̱zre zrentau' nigá?
19 Dute̱ xel-la' dxelexewí'ine lazre' xuluzré̱'e̱ xu xíchaje̱' ca', ne xelebezre̱', ne xelebezre xáchequeze̱', xelenné̱':
―Baxache' zaj naca benne' ca' zaj zre̱'e̱ xe̱zre zrentau' na'. Nen xel-la' gunní'a chee̱ benne' ca' gulenni'a xúgute̱ benne' ca' zaj nape̱' da ca' dxeledán lawe' nísadau'. Chadite̱ guzría xi' xe̱zre zrentau' na'.
20 Ca guca chee̱ xe̱zre na', le be, le'e zrale xabáa, ne le'e, gubáz chee̱ Cristo, ne le'e bchálajle waláz chee̱ Dios, ne xúgute̱le le'e nácale bi chee̱ Dios, lawe' da gate bzria xi' Dios xe̱zre na', bebéaj lazre̱' da naca chee̱le le'e.
21 Nadxa tu gubáz chee̱ xabáa, gubáz nápale̱'e̱ xel-la' dxenná bea guchise̱' tu xiaj zren da naca na ca xiaj xiche, na' bzale̱' na lu nísadau', gunné̱':
―Cá'ante cuía xi' Babilonia, xe̱zre zrentau' na', na' québedxa nu lé'equezdxa le̱ na, 22 ne québedxa nu xen la neza chee̱ xe̱zre na' da ca' dxulugul-la bénneache, da can zríadi'i na du, ne bchiuj, ne luzu da dxulucuezre̱', ne québedxa nu chilá' gun zrin lu xe̱zre na', ne québedxa xen schaga da dxun da dxutu na. 23 Québedxa gusení' netú xi' lu xe̱zre na', ne québedxa xen laní chee̱ wechaga na' ga na', lácala benne' ca' belúti'e̱ lu xe̱zre na' gulenná be'e̱ lawe' xúgute̱ benne' zaj zre̱'e̱ xe̱zr la xu, ne gulezí xe̱'e̱ xúgute̱ cue' xe̱zr la xu nen xel-la' wazrá' chee̱'.
24 Caní guca lawe' da lu xe̱zre na' gulalaj dxen chee̱ benne' ca' gulenné̱' waláz chee̱ Dios, ne dxen chee̱ benne' ca' zaj naque̱' bi chee̱ Dios, ne dxen chee̱ benne' ca' belute bénneache le̱' du ca naca xe̱zr la xu.
