48
1 ¡Zrente̱ naca Xránadxu!
¡Naca chee̱' güe lá'anale̱'e̱dxu Le̱'
ga naca lu xe̱zre chee̱ Dios chee̱dxu,
da dxe' na lu xi'a lá'azxa chee̱'!
2 Sión, da naca na xi'a chee̱ Dios, naca na sibe, ne xrtante̱.
Naca na xe̱zre chee̱ Wenná Bea zrente̱,
da dxunna na xel-la' dxebé dute̱ xe̱zr la xu nigá.
3 Dios ba blé'ene̱' dxucache chawe̱' dxi'u,
lu xu'u zaca ca' chee̱ xe̱zre chee̱' na'.
4 Belezraga benne' wenná bea ca',
na' belelé̱'e̱ chee̱ xeledíl-lale̱ne̱' xe̱zre nigá,
5 na' gate belelé'ene̱' na, na' belexebánene̱'.
Belezrébe̱', na' buluzrúnnuje̱'.
6 Gulezré̱'e̱ lu da ste̱be,
ne gulezúe̱' xel-la' dxudía ca dxaca chee̱ tu nu'ula
ba zua sane̱' bidau'.
7 Gulaque̱' ca da ca' dxeledá lawe' nísadau' dxexrite na
gate dxácale̱'e be' bdunu' lu nísadau'.
8 Bendxu ca da be̱n Dios, na' na'a ba ble'edxu na,
ga naca lu xe̱zre chee̱ Xránadxu, nape̱' dute̱ xel-la' waca,
da naca na xe̱zre chee̱ Xránadxu Dios.
Le̱' guzúa chawe̱' xe̱zre nigá chadía chacanna.
9 Ga naca lu xudau' chiu' Lue', Dios
dxajsá lázredxu ca naca xel-la' zri'i lazre' zren chiu'.
10 Gátete̱ze na' dxelúe lá'ana bénneache Lue',
na' ca naca xel-la' szren chiu' dxezrín na
du gabí'i xe̱zr la xu.
Ca naca da xrlátaje dxenná be'u.
11 Xelebéle̱'e̱ bénneache zaj zre̱'e̱ Sión.
Xelebéle̱'e̱ bénneache zaj zre̱'e̱ xe̱zre ca' chee̱ Judá
ne̱ chee̱ da dxuchi'u chee̱'.
12 Le'e, bénneache chee̱ Dios, le chechaj dxu'a xe̱zre na',
ne le gulaba ca zaj naca xu'u sibe ca',
da dxuluzé̱ chacha na xe̱zre na'.
13 Le nna' xque ca naca ze'e zren naxechaj na xe̱zre na'.
Le nna' xanne' ca zaj naca xu'u wal-la chee̱ na,
chee̱ guzenle bi chee̱le ca naca xe̱zre na'.
14 Dios nigá nácaqueze̱' Dios chee̱dxu chadía chacanna.