DIZRA' CHAWE' CA NACA CHEE̱ JESUCRISTO DA BZUAJ SAN MARCOS

Da bchalaj Juan, benne' bchue̱' bénneache nisa

(Mt. 3.1-12; Lc. 3.1-9, 15-17; Jn. 1.19-28)

1 Caní guzú lau dizra' chawe' ca naca chee̱ Jesucristo, Zri'ine Dios.

2 Bzrin lazre' da bzuaj Isaías, benne' bchálaje̱' waláz chee̱ Dios, ca da gunná Dios:

¡Le nna'xque nigá!

Neda' dxesel-la' benne' gubáz chia', benne' cuía lawe̱' lau Lue'.

Bénnea' gupé̱'e̱ neza naga teu' chee̱ ilúnbe'e bénneache Lue'.

3 Welénqueze chi'i benne' dxebezre xe̱'e̱ le̱'e̱ xixre' lawe' lataj.

Dxenné̱': “Le gupá'a neza naga te Xránadxu lu xichaj lázrdaule.

Le xebéaj li neza lase chee̱' ca'.”

4 Caní guca lawe' da bla' Juan le̱'e̱ xixre' lawe' lataj, na' bchálaje̱' dizra' chee̱ Dios, ne gunné̱' dxal-la' xeledxúa bénneache nisa, na' bchue̱' le̱' nisa, benne' ca' belexebí'i lazre̱' chee̱ gunite lau Dios dul-la da zaj nabague'. 5 Ca'an guca, guledxúaj bénneache zan lu xe̱zre Jerusalén, ne xúgute̱ xe̱zre ca' zaj nababa Judea, na' xjaque̱' naga zua Juan, na' Juan nigá bchue̱' benne' ca' nisa lu xe̱gu Jordán, benne' ca' gulexrúale̱pe̱' dul-la da zaj nabague'.

6 Caní guca zra lana Juan. Gucue̱' zra lane̱' ladxe' xicha zra camello, bia dxelebía bénneache, ne tu xpádxue̱' xide bchela le̱'e̱. Dxawe̱' biche xuaj, ne dxé'aje̱' bzrína'dau' chee̱ bézudau'. 7 Ca dxuchálaje̱' dizra' chee̱ Dios, dxenné̱':

―Gate te chia' neda', na' xida xetú benne', bénnea' nápadxe̱' xel-la dxenná bea ca neda'. Quebe naca chia' xáchua' chee̱ lechja' zrele̱'. 8 Da lítega, neda' bchua' le'e nisa. Le̱' gune̱' da zéaje̱ xel-la dxedxúa nisa nigá, guzúe̱' Be' Lá'azxa lu xichaj lázrdaule.

Ca da guca gate gudxúa Jesús nisa

(Mt. 3.13-17; Lc. 3.21-22)

9 Ca da guca lu zra ca', guzá' Jesús lu xe̱zre Nazaret chee̱ ga nababa Galilea, na' bzrine̱' lau Juan. Juan nigá bchue̱' Jesús nisa lu xe̱gu Jordán. 10 Gate bdxuaj Jesús lu nisa, la blé'ete̱ne̱' naxalaj xabáa, ne blé'ene̱' betaj Be' Lá'azxa. Dxulé'e lawe̱' ca tu bgúgudu chiche, na' bzrine̱' ca li xichaj Jesús. 11 Ben tu chi'i da za xabáa, da dxenná na:

―Lue' nacu' Zri'ina'. Nazrí'ida' Lue', ne dxezaca ba lázrele̱da' Lue'.

Dxaca lazre' Satanás da xriwe̱' gun ga baga Jesús dul-la

(Mt. 4.1-11; Lc. 4.1-13)

12 Nadxa Be' Lá'azxa guché̱'e̱ Jesús le̱'e̱ xixre' lawe' lataj. 13 Guzúa Jesús le̱'e̱ xixre' lawe' lataj chua zra chua xe̱la. Na' bzrin Satanás da xriwe̱', ne guca lazre' na gun na baga Jesús dul-la. Guzúa Jesús naga zaj zra' be̱ xixre' be̱ snia, na' gubáz chee̱ xabáa chee̱ Dios gulácale̱ne̱' Jesús.

Jesús dxezú lawe̱' dxusé̱dene̱' bénneache

(Mt. 4.12-17; Lc. 4.14-15)

14 Ca gudé guxú'u Juan lizre xia, na' bzrin Jesús lu xe̱zre ca' zaj nababa Galilea, ne dxuchálajle̱ne̱' bénneache dizra' chawe' ca dxenná bea Dios. 15 Gunná Jesús:

―Ba bzrin zra. Ba zua báguze gate nna bea Dios xe̱zr la xu nigá. Chee̱ le̱ na', le xebí'i lazre', ne le cheajlí lazre' dizra' chawe' nigá.

Dxenné̱ Jesús tapa benne' wezén bela chee̱ xelaque̱ Le̱' tuze

(Mt. 4.18-22; Lc. 5.1-11)

16 Gate gudá Jesús dxu'a nísadau' chee̱ Galilea, na' blé'ene̱' Simón, ne Andrés, biche Simón na'. Benne' caní dxuluzale̱' xixruj bela chee̱' lu nísadau' lawe' da zaj naque̱' wezén bela. 17 Na' gunná Jesús:

―Le gun neda' tuze, na' guzúa' le'e gácale we̱n zrin chia'. Cheajxrile bénneache ca dxunle dxezenle bela.

18 La bulucá'anate̱' xixruj chee̱' ca', na' zjácale̱ne̱' Jesús.

19 Nadxa gudé Jesús xelate' ca na'la, na' blé'ene̱' Jacobo, ne Juan, benne' ca' zaj naque̱' zri'ine Zebedeo. Zaj zre̱'e̱ lu da dxedá lawe' nísadau', dxelexexune̱' xixruj bela chee̱' ca'. 20 Ca gunné̱ Jesús Jacobo, ne Juan, na' la bulucá'anate̱' xre̱' Zebedeo ne we̱n zrin chie̱' ca' zaj zre̱'e̱ lu da dxedá lawe' nísadau', na' zjácale̱ne̱' Jesús.

Tu benne' xu'e̱ be' xriwe̱'

(Lc. 4.31-37)

21 Gate gul-la na gulu'e̱ lu xe̱zre Capernaum, na' gate bzrin zra dxulupá'ana benne' judío ca', guxú'u Jesús lu xu'u naga dxelúe lá'ana judío ca' Dios, ne bsé̱dene̱' benne' ca' zaj zre̱'e̱ na'. 22 Belexebánene̱' ca naca da dxuse̱de Jesús le̱' lawe' da dxuchálaje̱' nen dute̱ xel-la dxenná bea, ne quegá ca dxuluchalaj benne' ca' dxuluxuzájle̱'e̱ da nadxixruj bea Dios. 23 Nadxa bla' tu benne' xu'e̱ be' xriwe̱' lu xu'u na', na' gudxezre xa'a na lu dxu'a bénnea'. 24 Gunná na:

―¿Bizra nápantu' chiu', Jesús, benne' Nazaret? ¿Za'u guzría xi'u netu'? Ba nézquezda' nu nacu'. Benne' Lá'azxa chee̱ Dios nacu'.

25 Jesús gudil-le̱' na, gunné̱':

―Zrize guzúa. Bedxúaj lu be̱l-la' dxen chee̱ benne' nigá.

26 Nadxa be' xriwe̱' na' bxrízele̱'e̱ na bénnea', ne gudxezre xá'ale̱'e̱ na, na' bedxúaj na. 27 Belexebánele̱'e̱ xúgute̱ benne' zaj zre̱'e̱ na', dxelé̱ ljwezre̱':

―¿Bizra dizra' cube da nigá? Dute̱ xel-la dxenná bea chee̱' dxenná be'ene̱' be' xriwe̱' ca', na' dxuluzúa na dizra' chee̱'.

28 La bzrílujte̱ dizra' chee̱ xel-la waca chee̱ Jesús du ca naca xe̱zre ca' zaj nababa Galilea.

Jesús dxexune̱' xrna' zru'ula Pedro

(Mt. 8.14-15; Lc. 4.38-39)

29 Ca belexedxúaje̱' lu xu'u na' chee̱ judío ca', na' belezrine̱' lizre Simón, ne Andrés. Jacobo ne Juan dxelune̱' Jesús tu zren. 30 Lu xu'u na' de̱ xrna' zru'ula Simón, xu'e̱ da la. La buluchálajle̱te̱' Jesús ca dxaca chee̱ nu'ula nigá. 31 Le̱' la bé̱xrute̱' ne̱'e̱, bechise̱' le̱'. La bedxúajte̱ da la da xu'e̱, na' bseni'e̱ da gulawe̱'.

Jesús dxexune̱' bénneache zan

(Mt. 8.16-17; Lc. 4.40-41)

32 Ca gula guzré zra na', ca guzría gubizra, na' guleché̱'e̱ xúgute̱ benne' we̱' lau Jesús, ne benne' ca' zaj xu'e̱ be' xriwe̱'. 33 Ca naca benne' xe̱zre gulebigue̱' dxa xu'u naga zua Jesús. 34 Jesús bexune̱' zánete̱ benne' we̱' ca zaj naca xízrawe̱' da xu'u tu tue̱', ne bebéaje̱' zane' be' xriwe̱' zaj xu'u bénneache ca'. Quebe be̱'e̱ lataj be' xriwe̱' ca' xelenné̱ na lawe' da zaj núnbea na Le̱'.

Dxuchalaj Jesús lau bénneache zaj zre̱'e̱ Galilea

(Lc. 4.42-44)

35 Ca bebán Jesús bál-lala, ne nachúl-late̱, bedxúaje̱' guzé̱'e̱ zéaje̱' tu lataj naga nadache' bénneache, na' bchálajle̱ne̱' Dios. 36 Simón Pedro, ne benne' ca' zaj zrále̱ne̱' le̱' belexexílaje̱' Jesús. 37 Ca xeajlexraque̱' Jesús, na' gulé̱'e̱ Le̱':

―Xúgute̱ bénneache dxelexexílaje̱' Lue'.

38 Na' gunná Jesús:

―Chéajdxu xe̱xre walizre ca' chee̱ guchálajle̱na' benne' ca' xrtizra Dios. Chee̱ le̱ na' belja'.

39 Lu xu'u ca' naga dxelúe lá'ana judío ca' Dios, da ca' zaj zua tu tu xe̱zre ca' chee̱ ga nababa Galilea, bchalaj Jesús dizra' chee̱ Dios, ne bebéaje̱' xízrawe̱' xriwe̱' ca' da zaj xu'u benne' we̱' ca'.

Jesús dxexune̱' tu benne' dxé'ene̱' xízrawe̱' guzru'

(Mt. 8.1-4; Lc. 5.12-16)

40 Nadxa bzrin lau Jesús tu benne' dxé'ene̱' xízrawe̱' guzru', na' bzu zribe̱', ne guta' xuene̱' Le̱', dxenné̱':

―Che Lue' dxaca lazru', waca xexunu' neda'.

41 Jesús bexache lazre̱' le̱', na' bli ne̱'e̱, gudane̱' le̱'. Dxenné̱':

―Dxaca lazra'. Na'a dxexacu'.

42 Ca gunné̱' caní, la becuásate̱ xízrawe̱' na', na' begá'ane̱' chawe'. 43 Nadxa Jesús bsízrene̱' le̱', na' besel-le̱' le̱'. 44 Caní gunné̱':

―Quebe nu xu'u ca da guca chiu'. Guxíaj lau bxruze xeajlé'e cuinu', ne bnezruj ca naca da gunná be'e Moisés xelún benne' ca' xelexexaque̱'. Caní gunu' chee̱ xelelé'ene̱' ba bexacu' na'a.

45 Nadxa benne' nigá, ca bezé̱'e̱, guzú lawe̱' dxuchálajle̱ne̱' tu tu benne' ca guca chee̱' bexaque̱'. Ca'an guca, québedxa guca chu'u Jesús zaca bal-la lau lu xe̱zre. Begá'ane̱' le̱'e̱ xixre' lawe' lataj. Bénneache chee̱ xúgute̱ xe̱zre ca' belezrine̱' lau Jesús naga zue̱'.

San Marcos 2 ->