1 Nadxa Jesús guxú'e̱ tu lu da dxedá lawe' nísadau', na' gulague̱' xechalá'a nísadau', na' bezrine̱' lázrequeze̱'. 2 Na' bedajlegu'e̱ tu benne' biu lau Le̱', zaj zua zri ni'a ne̱'e̱, zaj naxrúe̱' benne' na' tu lu ta'a blaga'. Gate ble'e Jesús ca dxeléajle̱'e̱ chee̱', na' gunné̱', dxe̱'e̱ benne' we̱':
3 Nadxa bal-la benne' dxuluxuzájle̱'e̱ da nadxixruj bea Dios gulenné̱' lu xichaj lázrdawe̱': “Benne' nigá dxucá'ana dítaje̱' Dios nen xrtizre̱'.” 4 Lawe' da neze Jesús ca gulenné̱' lu xichaj lázrdawe̱', na' dxe̱'e̱ benne' ca', gunné̱':
―¿Bizr chee̱ na' dxennale caní lu xichaj lázrdaule? 5 ¿Bízrala da quebe nácadxa ste̱be guna'? ¿Nnia': “Dul-la chiu' ba bnite lawa'”, u che nnia': “Bexasa, guzá?” 6 Chee̱ le̱ na' gulé'eda' le'e neda', Benne' Gulje̱' Bénneache, napa' xel-la' dxenná bea lu xe̱zr la xu nigá gunite lawa' dul-la.
7 Bénnea' zaj zua zri ni'a ne̱'e̱ bexase̱', na' zexíajte̱' lizre̱'. 8 Gate belelé'e bénneache da nigá, na' belezrebe̱', ne belúe lá'ane̱' Dios lawe' ba bnézruje̱' xel-la' waca caní chee̱ bénneache.
Jesús dxuláwizre̱' Mateo
(Mr. 2.13-17; Lc. 5.27-32)
9 Ca bezá Jesús na', na' blé'ene̱' tu benne' biu le̱' Mateo, dxe'e̱ lataj naga dxuchízruje̱' waláz chee̱ xe̱zre Roma, na' dxe̱'e̱ le̱', gunné̱':
6 ―Be̱n neda' tuze.
Nadxa Mateo nigá guxase̱' zéajle̱ne̱' Jesús.
10 Gate na' dxe' Jesús dxawe̱' xeta lizre Mateo nigá, benne' zante̱ wechizruj, ne benne' dul-la belezrine̱', ne gulebé'queze̱' dxelawe̱' cuita Jesús, ne benne' ca' dxusé̱dene̱'. 11 Benne' xudau' fariseo ca', gate belelé'ene̱' da nigá, dxelé̱'e̱ benne' ca' dxuse̱de Jesús, gulenné̱':
―¿Bizr chee̱ na' Benne' dxusédene̱' le'e dxágule̱ne̱' benne' wechizruj ca', ne benne' we̱n da zrinnaj ca'?
12 Jesús benne̱' da nigá, na' dxe̱'e̱ benne' ca', gunné̱':
―Quebe dxelechine benne' chawe' nu benne' dxexune̱' bénneache. Benne' we̱' dxelechínene̱' le̱'. 13 Le chjaca, le cheajse̱de ca da dxenná da naxúaj na lu xiche chee̱ Dios, dxenné̱': “Neda' dxaca lazra' xexache lázrele le sa' ljwézrele, quegá gútele be̱ xíxre'du ca' lu cugu chia'.” Bla' neda', quegá chee̱ guláwizra' benne' xrlátaje. Dxuláwizra' benne' dul-la chee̱ xelexebí'i lazre̱'.
Jesús dxusédene̱' ca naca chee̱ gubasa
(Mr. 2.18-22; Lc. 5.33-39)
14 Nadxa belezrín lau Jesús benne' ca' dxeledále̱ne̱' Juan, bénnea' dxuchúe̱' bénneache nisa, na' gulenábene̱' Le̱':
―¿Bizr chee̱ na' quebe dxelún gubasa benne' dxusé̱denu' Lue', ca dxuntu' netu', ne ca dxelún benne' xudau' fariseo ca'? Tu dxúnzquezentu' gubasa.
15 Na' Jesús dxe̱'e̱ benne' ca', gunné̱':
―¿Ájala chee̱ na' xelezúa ba xácheze benne' zaj zue̱' laní chee̱ wechaga na' dxácate̱ zua benne' wechaga na' nen le̱'? Wazrín zra gate dua benne' wechaga na'. Nadxa xelúnqueze̱' gubasa.
16 ’Quegá nu dxudá tu ladxe' cube le̱'e̱ tu zra lánadxu gula, lawe' da gate cheajxedxé' da cube na', ne xrube xu na da gula na', na' dxézadxa da gula na'. 17 Cá'anqueze quebe nu benne' que̱'e̱ xrise uva wal-la cube lu bzude xide gula lawe' da che ca'an gune̱', gate cue' chi'i xrise uva wal-la, na' dxeza bzude xide na', na' xelebía xi' xrise uva wal-la na', ne bzude xide na'. Chee̱ le̱ na' dxal-la' ca'adxu xrise uva wal-la cube lu bzude xide cube. Che ca'an gundxu, xelegá'ana chawe' dxúpate̱ na.
Bchalaj Jesús da caní ca naca chee̱ benne' ca' dxelezí' lu ne̱'e̱ xrtizre̱'.
Dxexún Jesús bi nu'ula chee̱ Jairo, ne nu'ula', xeajté̱'e̱ zra lana Jesús
(Mr. 5.21-43; Lc. 8.40-56)
18 Dxácate̱ na' dxuchalaj Jesús da nigá, na' bzrin tu benne' xíchaje̱ chee̱ benne' judío ca', na' bzu zribe̱' lau Jesús, dxenné̱':
―Bi nu'ula chia' za gútete̱be'. Che Lue' xidu' ne guzé̱ na'u le̱be', wexaca banbe'.
19 Na' guxasa Jesús, guxíajle̱ne̱' le̱' nen benne' ca' dxusé̱dene̱'. 20 Nadxa bzrin tu nu'ula we̱' cúzrula Jesús, ba naca chazrinnu iza dxé'ene̱' tu we̱' dxaque dxen, na' xeajté̱'e̱ zra lana Jesús. 21 Dxenné̱' lu xichaj lázrdawe̱': “Che cheajtaza' zra lane̱', na' xexaca'.”
22 Jesús guxéchaje̱', guné̱'e̱ nu'ula', na' dxe̱'e̱ le̱':
―Be̱n dipa lazru', zrí'ina'dau'. Bache bexacu' lawe' da dxéajle̱'u chia'.
La bexácate̱ nu'ula na'.
23 Gate na' bzrin Jesús lizre benne' xíchaje̱ chee̱ benne' judío ca', na' blé'ene̱' zaj zra' benne' wil-la xulucache̱' bi nu'ula na', ne benne' zaj zre̱'e̱ dxelune̱' zralaj. 24 Gunná Jesús, dxe̱'e̱ benne' ca':
―Le xedxúaj nigá. Quegá nate bi nú'uladau' nigá. Dxásezebe'.
Na' buluzrizre̱' chee̱'. 25 Gudé bebéaje̱' benne' ca', na' guxú'u Jesús, ne bé̱xrue̱' na' bi nu'ula na', na' guxásabe'. 26 Du ca naca xe̱zre ca' bzriluj dizra' chee̱ da be̱n Jesús.
Dxexún Jesús chupa benne' la chul-la
27 Ca bedxúaj Jesús na', na' chupa benne' xjaque̱' cuzru Le̱', dxelenné̱' zizraj:
―Bexache lazre' netu', Lue', Zri'ine David.
28 Ca guxú'u Jesús lu xu'u naga zúaqueze̱', na' benne' la chul-la caní gulebigue̱' lau Le̱', na' Jesús guzre̱' benne' ca':
―¿Dxéajle̱le wazéqueda' xexuna' le'e?
Na' gulé̱'e̱ Le̱':
―Awe', Xran.
29 Nadxa Jesús gudane̱' xiaj lau benne' ca', dxenné̱':
31 Gate beledxúaje̱', na' buluchálaje̱' du ca naca xe̱zre ca' ca da be̱n Jesús chee̱'.
Dxexún Jesús tu benne' quebe dxaca nnie̱'
32 Ca bezá' Jesús nen benne' ca', na' belezrín bal-la benne' zaj naché̱'e̱ tu benne' biu quebe dxaca nnie̱', benne' xu'e̱ be' xriwe̱'. 33 Cáte̱ze bebéaj Jesús be' xriwe̱' nigá, na' benne' quebe dxaca nnie̱' bezú lawe̱' dxuchálaje̱'. Na' benne' ca' belexebánele̱'e̱, dxelenné̱':
―Cabata' ne lé'edxu gaca caní ládujla benne' Israel ca'.
34 Benne' xudau' fariseo ca' gulenné̱':
―Benne' nigá dxebéaje̱' be' xriwe̱', dxuchínene̱' xel-la' waca chee̱ da xriwe̱', da na' dxenná be'e na be' xriwe̱' ca'.
Dxexache lazre' Jesús bénneache ca'
35 Gudé Jesús tu tu xe̱zre zren, ne tu tu xé̱zredau', dxusé̱dene̱' benne' ca' lu xu'u ca' naga dxulucá'ana szrene̱' Dios tu tu lataj ca'. Gulu'e̱ lban chee̱ dizra' chawe' ca nna bea Dios, ne bexunte̱' bénneache zaj nape̱' tu tu cue' xízrawe̱' ca da dxelezaque̱'. 36 Gate ble'e Jesús bénneache ca', na' bexache lazre̱' le̱' lawe' da zaj zre̱'e̱ xácheze̱', ne dxelecuán lazre̱'. Zaj naque̱' ca zrila' ca' quebe zua benne' guxúe̱'-ba'. 37 Nadxa guzre̱' benne' ca' dxusé̱dene̱':
―Da li, da zrente̱ de̱ da lápadxu, na' bábaze benne' we̱n zrin zaj zre̱'e̱. 38 Chee̱ le̱ na' le naba lau Xrana lina nigá, sel-le̱' benne' we̱n zrin xelelape̱' lina chee̱'.
<- San Mateo 8San Mateo 10 ->
