San Mateo 16

Dxelenabe̱' Jesús gune̱' tu xel-la' waca chee̱ xabáa

(Mr. 8.11-13; Lc. 12.54-56)

1 Benne' xudau' fariseo ca', ne benne' xudau' saduceo ca' xjaque̱' naga zua Jesús chee̱ xuluxunéguene̱' Le̱'. Chee̱ le̱ na' gulenabe̱' Jesús gune̱' tu xel-la' waca zrente̱ da za xabáa. 2 Jesús beche̱be̱' benne' ca':

―Xelate' zua gubizra dxennale le'e: “Gun chawe' wxre lawe' da da' beuj xrna zran xabáa.” 3 Che zílala dxennale: “Quebe chawe' gun na'a zra lawe' da dá'le̱'e̱ beuj xrna zran xabáa.” Le'e dxulé'e cuínale da quebe nácale. Dxácaqueze dxennale ca naca da gun zran xabáa. Quebe dxaca xuzájla'ale ca sa'yeaj da dxaca na'a zra. 4 Benne' we̱n da cale̱la caní, benne' zaj nabéaj xíchaje̱' Dios, dxelenabe̱' guna' tu xel-la' waca zrente̱. Quebe xelelé'ene̱' xetú xel-la' waca. Welelé'ene̱' tuze da gaca na ca da guca chee̱ Jonás.

Nadxa bulucá'ana Jesús benne' ca', zjá'aque̱'.

Da dxelún benne' xudau' ca' da naca na ca cua zichaj chee̱ xeta xtila

(Mr. 8.14-21)

5 Gate benne' ca' dxuse̱de Jesús guladée̱' xechalá'a nísadau', na' gulal-la lazre̱' xelu'e̱ chizre̱'. 6 Jesús guzre̱' le̱':

―Le nna'xque. Le guxúe cuínale ca naca chee̱ cua zichaj chee̱ xeta xtila chee̱ benne' fariseo ca', ne chee̱ benne' saduceo ca'.

7 Benne' ca' dxuse̱de Jesús gulezú lawe̱' dxelé̱ ljwezre̱':

―Caní dxenné̱' lawe' da quebe núadxu xeta xtila.

8 Jesús dxeque be'ene̱', na' guzre̱' le̱':

―¿Bizr chee̱ na' dxennale naca na lawe' da quebe núale xeta xtila? Láteze dxéajle̱le chia'. 9 ¿Quebe ne chéajni'ile, ne quebe dxeajsá lázrele chee̱ da gazxu' xeta xtila da bgawa' gazxu' cue' chi gaxúa benne' biu, ne bal-la ga' becá'ale? 10 ¿Quebe dxeajsá lázrele chee̱ da gazre xeta xtila da bgawa' tapa cue' chi gaxúa benne' biu ca', ne bal-la ga' becá'ale? 11 ¿Ájazra na' quebe dxeque be'ele quegá bchálaja' chee̱ xeta xtila gate gunnía' le guxúe cuínale ca naca chee̱ cua zichaj chee̱ xeta xtila chee̱ benne' fariseo ca', ne chee̱ benne' saduceo ca'?

12 Nadxa guleque bé'ene̱' quegá guzre Jesús le̱' xuluxúe cuine̱' chee̱ da naca cua zichaj chee̱ xeta xtila, san ca naca da dxuluse̱de benne' fariseo ca', ne benne' saduceo ca'.

Pedro dxenné̱' Jesús naque̱' Cristo

(Mr. 8.27-30; Lc. 9.18-21)

13 Gate bzrin Jesús naga nababa xe̱zre Cesarea da be̱n Filipo, na' bche̱be̱' benne' ca' dxusé̱dene̱':

―¿Nuzra na' dxelenná bénneache naca' neda', Benne' Gulje̱' Bénneache?

14 Na' benne' ca' gulenné̱':

―Bal-la benne' dxelenné̱' nacu' Juan, bénnea' bchue̱' bénneache nisa. Xebal-le̱' dxelenné̱' nacu' Elías, na' xebal-le̱' dxelennáqueze̱' nacu' Jeremías, u xetú benne' bchálaje̱' waláz chee̱ Dios.

15 Nadxa guzre Jesús benne' ca':

―¿Gazra le'e? ¿Nuzra na' dxennale naca'?

16 Gunná Simón Pedro:

―Lue' nacu' Cristo, Zri'ine Dios ban.

17 Beche̱be Jesús:

―Ba neza zren naca na chiu' Simón, zri'ine Jonás. Netú benne' quebe ne gulé'ene̱' lue' da nigá, san Xra' zua xabáa, Le̱' blé'ene̱' lue'. 18 Neda' dxapa' lue', nacu' Pedro, da zéaje̱ na tu xiaj, na' lawe' xiaj xre nigá guzúa' benne' xeleajlí lazre̱' neda', na' xel-la' dxenná bea chee̱ da xriwe̱' quebe seque na gucu'uj na benne' ca'. 19 Neda' gunna' lue' da naca na zren xia chee̱ xel-la' dxenná bea chee̱ xabáa, na' da guchéaju' lue' lu xe̱zr la xu nigá gaca na da ba nadxéajqueze na xabáa, na' da xese̱zru' lue' lu xe̱zr la xu nigá gaca na da ba naxé̱zrequeze na xabáa.

20 Nadxa Jesús gunná bé'ene̱' benne' ca' dxusé̱dene̱' chee̱ quebe nu xelé̱'e̱ naca Le̱' Cristo.

Jesús dxuchálaje̱' ca gaca gate gatie̱'

(Mr. 8.31―9.1; Lc. 9.22-27)

21 Lu zra ná'queze guzú lau Jesús dxuzéajni'ine̱' benne' ca' dxusé̱dene̱' dxal-la' xexíaje̱' xe̱zre Jerusalén, na' benne' gula ca', ne benne' xíchaje̱ ca' chee̱ bxruze ca', ne benne' dxuluxuzájle̱'e̱ da nadxixruj bea Dios wulusaca zi'e̱ Le̱'. Na' guzre̱' benne' ca' dxusé̱dene̱' welute benne' Jerusalén ca' Le̱'. Nadxa gate gaca chunna zra xebane̱'.

22 Nadxa Pedro guléaje̱' Jesús chalá'ala, ne guzú lawe̱' dxedil-le̱' Le̱', dxenné̱':

―Dios quebe gu'e̱ lataj, Xran. Cabata' gaca chiu' da caní.

23 Jesús bexéchaje̱', na' guzre̱' Pedro:

―Gucuasa cuita' neda', lue', da xriwe̱', lawe' da nacu' tu da dxusunegue na neda'. Quebe dxulaba lazru' ca dxun Dios. Ca dxun bénneache dxulaba lazru'.

24 Nadxa Jesús guzre̱' benne' ca' dxusé̱dene̱':

―Che nu benne' dxaca lazre̱' gaque̱' neda' tuze, dxal-la' guzúe̱' chalá'ala da naca chee̱', ne guzúa cuine̱' chee̱ gatie̱', na' nadxa gaca xídale̱ne̱' neda'. 25 Bénnea' dxaca lazre̱' gapa chi'e̱ xel-la' nabán chee̱' gunitie̱' na. Bénnea' gunitie̱' xel-la' nabán chee̱' lawe' da dxune̱' zrin chia', benne' nigá zrué'ene̱' xel-la' nabán du lazre'. 26 ¿Bízraqueze ba neza naca na chee̱ tu benne' che gata' chee̱' xúgute̱ xel-la' gunní'a da de̱ lu xe̱zr la xu nigá, na' cuía xi'e̱ lau Dios? Quebe bi gaca quizruj tu benne' chee̱ la bénne'du xu'e lau Dios. 27 Neda', Benne' Gulje̱' Bénneache wida' xecha lasa nen xel-la' szren chee̱ Xra', ne nen gubáz chee̱ xabáa ca'. Nadxa xuzría chee̱ tu tu benne' ca naca da zaj nun tu tue̱'. 28 Da li dxapa' le'e, bal-la benne' zaj zre̱'e̱ nigá quebe xelatie̱' cadxa xelelé'ene̱' neda', Benne' Gulje̱' Bénneache, xida' xedajnná be'a.

<- San Mateo 15 San Mateo 17 ->