DIZRA' CHAWE' CA NACA CHEE̱ JESUCRISTO DA BZUAJ SAN MATEO

La benne' ca' gulaque̱' xra gula chee̱ Cristo

(Lc. 3.23-38)

1 Da caní zaj naca na la chee̱ benne' zaj naque̱' xra wdé chee̱ Jesucristo. Jesús nigá nababe̱' zri'ine zre sua David, ne zri'ine zre sua Abraham.

2 Abraham nigá guque̱' xra Isaac.

Isaac nigá guque̱' xra Jacob.

Jacob nigá guque̱' xra Judá, ne benne' biche̱' ca'.

3 Judá nigá guque̱' xra Fares, ne Zara, na' Tamar guque̱' xrna Fares, ne Zara caní.

Fares nigá guque̱' xra Esrom.

Esrom nigá guque̱' xra Aram.

4 Aram nigá guque̱' xra Aminadab.

Aminadab nigá guque̱' xra Naasón.

Naasón nigá guque̱' xra Salmón.

5 Salmón nigá guque̱' xra Booz, na' Rahab guque̱' xrna Booz nigá.

Booz nigá guque̱' xra Obed, na' Rut guque̱' xrna Obed nigá.

Obed nigá guque̱' xra Isaí.

6 Isaí nigá guque̱' xra David, benne' wenná bea.

Wenná bea David nigá, ne nu'ula na' nédxute̱ guque̱' zru'ula Urías gulaque̱' xra xrna Salomón.

7 Salomón nigá guque̱' xra Roboam.

Roboam nigá guque̱' xra Abías.

Abías nigá guque̱' xra Asa.

8 Asa nigá guque̱' xra Josafat.

Josafat nigá guque̱' xra Joram.

Joram nigá guque̱' xra Uzías.

9 Uzías nigá guque̱' xra Jotam.

Jotam nigá guque̱' xra Acaz.

Acaz nigá guque̱' xra Ezequías.

10 Ezequías nigá guque̱' xra Manasés.

Manasés nigá guque̱' xra Amón

Amón nigá guque̱' xra Josías.

11 Josías nigá guque̱' xra Jeconías ne benne' biche̱' ca' ca lu zra ca' gate benne' Babilonia guleché̱'e̱ benne' Israel ca' lu xe̱zr la xu Babilonia.

12 Jeconías nigá guque̱' xra Salatiel.

Salatiel nigá guque̱' xra Zorobabel.

13 Zorobabel nigá guque̱' xra Abiud.

Abiud nigá guque̱' xra Eliaquim.

Eliaquim nigá guque̱' xra Azor.

14 Azor nigá guque̱' xra Sadoc.

Sadoc nigá guque̱' xra Aquim.

Aquim nigá guque̱' xra Eliud.

15 Eliud nigá guque̱' xra Eleazar.

Eleazar nigá guque̱' xra Matán.

Matán nigá guque̱' xra xetú benne' le̱' Jacob.

16 Jacob nigá guque̱' xra José, benne' chee̱ María, xrna Jesús, Bénnea' naque̱' Cristo.

17 Caní naca, gulaca chidá' cue' bénneache gate guzú lau zua Abraham, ca bzrinte̱ zra zua David, na' gulaca xechidá' cue' bénneache ca' gate guzú lau zua David, ca bzrinte̱ zra gate na' benne' Babilonia ca' guleché̱'e̱ benne' Israel ca' lu xe̱zr la xu chee̱', na' gulaca xechidá' cue' bénneache ca' gate guzú lau zra na', ca bzrinte̱ zra gulaj Cristo.

Ca guca gate gulaj Cristo

(Lc. 2.1-7)

18 Caní guca gate na' gulaj Jesucristo. María, xrna Jesús ba naché̱bebe' gácabe' zru'ula José. Nédxula ca za xelenite̱', nu'ula nigá ba zue̱' zi'i ne̱ chee̱ xel-la' waca chee̱ Be' Lá'azxa chee̱ Dios. 19 José, benne' chee̱ María nigá, naque̱' benne' xrlátaje. Quebe guca lazre̱' gulé'ene̱' ca ba naca chee̱ María lau benne' xe̱zre ca'. Guca lazre̱' gusane̱' le̱' bagácheze. 20 Dxácate̱ dxudé lazre̱' da nigá, ble'e lau tu gubáz chee̱ xabáa, gubáz chee̱ Xránadxu, ga zua José na' lu bchigala, na' guzre̱' le̱':

―José, zri'ine zre sua David, quebe zrebu' si' lu na'u María chee̱ gácabe' zru'ulu', lawe' da bidu biu na' sanbe' zabe' ne̱ chee̱ Be' Lá'azxa chee̱ Dios. 21 Zrú'ulu' gúxrube' tu bidu biu chee̱be', na' lue' gu'u labe' Jesús. Caní gu'u labe' lawe' da guselabe' bénneache lu dul-la da zaj nabague̱'.

22 Xúgute̱ da caní gulaca ca' chee̱ guca ca da gunná Xránadxu lu dxu'a benne' ca' buluchálaje̱' waláz chee̱'. 23 Caní gunné̱':

Tu nú'uladau' gúadaube' sanbe' tu bidu biu chee̱be',

na' xelu'e̱ labe' Emanuel.

Emanuel zéaje̱ na: Dios zúale̱ne̱' dxi'u.

24 Ca bebán José, na' be̱ne̱' cáte̱ze gunná gubáz chee̱ Xránadxu, na' guzí' lu ne̱'e̱ María chee̱ gácabe' zru'ule̱'. 25 Quebe gulaque̱' tuze ca gusandxa María bidu biu nedxu chee̱be', na' buluzúe̱' labe' Jesús.

San Mateo 2 ->