―Ma biajb, ma biajb Babilonia ma na̱j ciuda naroob guin ziꞌc lidx ree xindxab, ziꞌc lidx ree graloj ree sprijt mal, ziꞌc lidx ree graloj ree be ni rzuj, bedxuudx ree be rbijxhladx ree bejn. 3 Din ziꞌc chi rusüdx bejn stijb bejn, zian ma batiaalguiiw ciudaroꞌ guin gra ree bénguidxliuj par güün reeman graloj ree ni dxuudx. Abiꞌ ree rey yuꞌ ree loj guidxliuj ma been reeman ni dxuudx guin ree con ciuda guin, abiꞌ ree bén rüjn negojs loj guidxliuj ma na̱j reeman rijcw por graczi ree ni dxuudx rajc ni.
4 Dxel biguiejnan chaꞌ stijb bén gunee diizd xanyabaa rëbaman:
―Gol brii loj ciuda guin, da bejn reen, chitëë goꞌchidi loj ree dol ni rajc ni chitëë tëdidi guialzi ni gac ree loj ciuda guin. 5 Din dád zien xtol reeman zeel ma bidxinan xt xanyabaa, abiꞌ Dios ad zayanladxtaman ni mal guin ree. 6 Gol beennë ciuda guin ziꞌcgajc beennën ben ren ree, gol been din yaguijxan xcastin tioꞌp volt mazri guial loj ni beennën bejn ree abiꞌ gol basagdiajn tioꞌp volt mazri guial loj ni basagdiajn ben ren ree. 7 Gol basagdiaj ciuda guin naya ziꞌc babaan chi beenan ni dxuudx ree, abiꞌ ziꞌc beenan xgab rëban: “Zooban guie ziꞌc tijb bén rniabee, ad najtan bén bizëjb ad yuꞌ tëët dxej chuꞌnayan.” 8 Zeel tijbzi dxej guidxajg lasaꞌ ree guialzi par ciuda guin, ziꞌc guialgüjt, guialrunaya, guialrliaan, dxel cheꞌcan con bajl. Din naroob xguialrniabee dux Dad ree Dios bén gudëëd casti ciuda guin.
9 Abiꞌ ree rey ni yuꞌ loj guidxliuj, bén babaa ree guial been reeman ni dxuudx con ciuda guin, zoon reeman, naya sagdiaj reeman chi guguiaa reeman goꞌxh ni cayeꞌcan. 10 Abiꞌ zijt su reeman chi guguiaa reeman casti ni cadëdan, dxel guiëb reeman:
―¡Probza lüj, probza lüj Babilonia, ciuda naroob ni guyu gojl par gra! Din tibrajtzi biꞌt casti par lüj.
11 Abiꞌ ree bén rüjn negojs loj guidxliuj zoon reeman zu tëë luxdoo reeman naya por ciuda guin, din achutri sii ni rutoꞌ reeman, 12 ziꞌc or, plajt, guiaj zagdxe ree, perl, lajd zagdxe ree, lajd sed ree culor murad con ni xnia, në graloj ree tabl ruree nejxh në graloj ree ni been reeman con ree tabl zagdxe, bronce, guiib con marmol në marfil. 13 Ad zajc tëëtri gutoꞌ reeman canel në graloj ree ni ruree nejxh, ad zajctri gutoꞌ reeman goxyaal, mirra, perfum, vin, sejt oliv, harin zagdxe, trigo, goꞌn, xiil, way, carrejt, ad zajc tëëtri ree gutoꞌ reeman bejn ree. 14 Abiꞌ guiëb reeman loj ciuda guin:
―¡Ad rajptril guialnazaꞌc ni bayuladx daꞌtil, tiblayaa ma banijtil ziꞌc gubanl con gra ree ni zaꞌc ni gopil!
15 Gra ree bén been negojs, bén gojc ree rijcw por ciuda guin, zijt su reeman guialrdxeb reeman casti ni cadëd ciuda guin. Zoon reeman, zazagdiaj reeman, zunaya reeman. 16 Abiꞌ guiëb reeman:
―¡Probza, probza ciuda naroob guin! Laan guial guzujchaawan con ree lajd zagdxe, lajd culor murad con ni xnia, laan guial guzujchaawan con or, con perl në con guiaj zagdxe 17 din, ¡tibrajtzi gunidloj gra ree guialnazaꞌc guin!
Gra ree bén zë lën barcw, ziꞌcgajc xcapitan ree barcw, gra ree mariner në los demazri ree bén rüjn dxiin lën barcw, guzudxe reeman zijt 18 chi baguiaa reeman goꞌxh ni cayëꞌc ciuda guin, abiꞌ gurixdiaj reeman rëb reeman:
―¡Probza!, probza ciuda naroob guin por xguialnazaꞌcan gra ree bén been negojs bén rajp ree barcw gojc reeman rijcw, din tibrajtzi gunidlojn.
20 Dxel biguien chaꞌ bén na:
―Per lëjt bén zojb ree xanyabaa, lëjt najdi xi apóstoles Jesucrist, lëjt bén rudëëd ree xtiidx Dios në los demazri ree bén na̱j xbejn Dios, gol babaa por ni cazajc ciuda guin din zian cayüjn Dios xguialguxtisaman por ni beennë ciuda guin lëjt.
―Ziꞌc bazalbin guiaj guie con guidib da gojlan zian nidoxh sac ciuda naroob Babilonia, abiꞌ achutri guguiaa Babilonia guin stijb. 22 Ad zaguientri ree chaꞌ arp, niꞌqui ree xinrucwejdx, niꞌqui ree bidxa, niꞌqui ree chaꞌ trompejt ad zaguientri loj ciuda guin. Achutri bejn güün dxiin ni, niꞌqui xnaquieꞌ mulin ad zaguientri ni. 23 Achetri guij cheꞌc loj ciuda guin, achutri guxhliaa. Gra ree bén been negojs loj ciuda guin ganax bén zojbloj gojc reeman loj guidxliuj, abiꞌ ciuda guin basquieen gra ree nacion con ree ni dxuudx ni beenan.
24 Abiꞌ loj ciuda guin bagüjt reeman bén badëëd ree xtiidx Dios, në ree bén rliladx Dios, abiꞌ por ciuda guin bagüjt reeman los demasri ree bén ma güjt loj guidxliuj.
