San Marcw 14

Bayaꞌn reeman diidx xhienaag guiniaaz Jesús

(Mt. 26:1‑5; Lc. 22:1‑2; Jn.11 :45‑53)

1 Zatioꞌp dxej riaadx gal lanij pascw, lanij raw ree bejn guiadxtil ni ad yuꞌt levadur. Abiꞌ ree bixhioz rniabee ree bixhioz con ree mext rajc ley, raguiil reeman mod xhienaag gusquiee reeman Jesús, din guiniaaz reeman laaman gugüjt reeman laaman. 2 Per rëb reeman:

―Ad zaguieent ree zian loj ree dxej lanij guin, chitëë gac naquieꞌ.

Baroob tijb béngunaa perfum guijc Jesús

(Mt. 26:6‑13; Jn.12 :1‑8)

3 Dxel chi zaꞌ Jesús luguiedx Betania lidx Simón, bén gunee reeman leproso, abiꞌ chi zojbaman xan mex cayawaman, bidxin tijb béngunaa caꞌman lumejt yuꞌn perfum ni lasajc wayëjx guial gojcchaawnën ganax nardo, zianz guxhalaman roꞌ lumejt guin persi baroobaman perfum guin guijc Jesús. 4 Abiꞌ yuꞌ ree bén zaꞌ yagaj bidxeꞌch, rëb loj lasaꞌ reeman:

―¿Chexc zeel guxhieꞌman perfum guin? 5 Awa zajc nidoꞌn choon gayuu denario din nüjnan yudar bénprob ree.

Abiꞌ caneeguijdx reeman béngunaa guin.

6 Per rëb Jesús loj reeman:

―Gol basaꞌnman. ¿Chexc zeel ruslendi laaman? Zagdxe na̱j ni beenman con naj. 7 Zianczi sunëdi bénprob ree, abiꞌ zajc güündi laa reeman yudar chi guiëndi, saꞌn naj ad ziantczi sunëdi naj. 8 Béngunaa guie beenman ni golguzujman, ma beenchaawxgajman da cuerpan par chi guidxin dxej guiguieꞌchan. 9 Diidxliczi rnin lëjt, guial guidib loj guidxliuj bantëëz guin guiniee reeman xtiidxzaꞌc Dios, zü ree bejn diidx ni been béngunaa guin con naj din gusaaladx reeman laaman.

Baguiil Judas mod xhienaag yayüman Jesús

(Mt. 26:14‑16; Lc. 22:3‑6)

10 Judas Iscariote, tijb ree xbejn Jesús, wejman bigneenëman bixhioz rniabee ree bixhioz din yayüman Jesús loj reeman. 11 Chi biguiejn ree bixhioz guin zian, dád babaa reeman. Abiꞌ rëb reeman gudëëd reeman milia lojman. Dxel guzuloj raguiilaman mod xhienaag yayüman Jesús.

Gudawnë ree xbejn Jesús xche

(Mt. 26:17‑29; Lc. 22:7‑23; Jn.13 :21‑30; 1Co.11 :23‑26)

12 Dxej ni guzuloj lanij raw ree bén Israel guiadxtil ni ad yuꞌt levadur, chi rugüjt reeman tijb xiildoo par lanij pascw, gunabdiidx ree xbejn Jesús lojman, rëb reeman:

―¿Ban guin rënl yuguieenan ni yadaaw ree guxhin pascw?

13 Dxel guxhaal Jesús tioꞌp ree xbejnman, rëbaman:

―Gol chej Jerusalén. Ni guguiaadi tijb xinguiaaw caꞌ re yuꞌ nijs. Gol chinalix. 14 Abiꞌ lod yayux, gol güjdx loj bén na̱j lidxan: “Na mextr: ¿Ban lënü gawnë ree xbejnman yan guxhin pascw?” 15 Dxel gulüüman lëjt tijb lënü naroob ni rarojp cwaa, ma najcchaaw lënü guin. Yagaj gol been ni yadaaw ree xche.

16 Dxel brii ree xbejnman wej reeman luguiedx guin, abiꞌ bidxaagloj gajc reeman ziꞌcgajczi rëbaman, zianz been reeman ni gaw reeman guxhin pascw.

17 Chi gure guiaal, bidxin Jesús con guidxiptioꞌp ree xbejnman. 18 Dxel chi zojb reeman xan mex cayaw reeman, rëb Jesús loj reeman:

―Diidxliczi rnin lojdi guial tijb lëjt, bén cayawnë naj, laaman yayü naj.

19 Dád guyunaya reeman, abiꞌ guzuloj canabdiidx tijb gaj reeman, rëb reeman lojman:

―¿Najn ya?

Abiꞌ rëb stijbaman:

―¿Wa najn ya?

20 Badxiꞌman laan rëbaman:

―Loj guidxiptioꞌpidi, tijb lëjtan, bén cugajdx xguiadxtil loj gajc pliajt lod cugajdx da guiadxtilan, laaman. 21 Walican guial Bén guxhaal Dios na̱j sacaman ziꞌc ca loj xtiidx Dios. Per, ¡prob bén yayü laaman! Zagdxeli na̱j par laaman ad niutaman loj guidxliuj

22 Laꞌtgaj cayaw reeman, cwaꞌ Jesús guiadxtil abiꞌ badëëman quixtëë loj Dios, dxel gulaꞌman laan badëëman loj reeman, rëbaman:

―Gol gudaw guiadxtil guie, laan na̱j da cuerpan.

23 Dxel cwaꞌman tijb cojp yuꞌ vin, chi gulox badëëman quixtëë loj Dios, badëëman cojp guin loj reeman, abiꞌ gra reeman guꞌ vin yuꞌ lojn. 24 Zianz rëbaman loj reeman:

―Vin guie na̱j da rejnan ni gaxhieꞌn chi guiëtan por zien ree bénguidxliuj, din guixal tijb nejz cüb xhienaag gap ree bejn perdon loj Dios. 25 Naj rni lëjt, ad yuꞌtri dxej guiëꞌn vin rajcchaawnë uv, xt dxej ni guiëꞌn vin cüb lod rniabee Dios.

Rëb Jesús guial guiëb Bëd ad nünbeetaman laaman

(Mt. 26:30‑35; Lc. 22:31‑34; Jn.13 :36‑38)

26 Chi gulox biil reeman tijb cant par Dios. Dxel zë reeman ruguiaꞌ Olivos. 27 Dxel rëb Jesús loj reeman:

―Graczidi tioꞌnladx naj yan guxhin, ziꞌc ca loj xtiidx Dios lod rëb: “Gugüjtan bén rajp ree xiil, abiꞌ guireꞌch reeb.” 28 Per chi yabanan, yaloj naj ganeed lojdi gan Galilea.

29 Dxel rëb Bëd lojman:

―Majsi gra reeman tioꞌnladx lüj, per naj ad zaroꞌnladxtan lüj.

30 Badxiꞌ Jesúsan rëbaman:

―Naj rni lüj Bëd, yan guxhin gajc chi gad gui̱d cwidxaꞌ tioꞌp volt, choon volt mal rëbil guial ad nünbeetil naj.

31 Per naguiejn rüjn Bëd rëbaman:

―Majsi guiëtnëꞌn lüj, per ad zëtan guial ad nünbeetan lüj.

Abiꞌ graczi reeman rëb zian.

Rbejdx rniab Jesús Dios lod la Getsemaní

(Mt. 26:36‑46; Lc. 22:39‑46)

32 Chi bidxin reeman tijb luar la Getsemaní, dxel rëb Jesús loj ree xbejnman:

―Gol gurejsii guie, laꞌtgaj gabedx ganaaban Dios.

33 Abiꞌ binëman Bëd, Jacob con Waj, dxel guzuloj guyunayaman abiꞌ ad nixtri yuꞌ luxdooman. 34 Zianz rëbaman loj reeman:

―Yuꞌ naya daꞌt luxdon, rulüü ma gugüjtan naj. Gol bayaꞌn guie ad gaayëjsidi.

35 Abiꞌ guzaman zataꞌn, zianz gurerulojman, gunabaman loj Dios, bal zileꞌ tëd ni na̱j sagdiajman. 36 Chi cabejdx canabaman Dios, rëbaman:

―Dad, graczi zajc güünl. Babëë naj loj ni gazaagdiajn. Per ad gac ziꞌc rënan, rayal gac ziꞌc rënl.

37 Dxel ziaman lod bayaꞌn ree xbejnman, chi badxinman cwëꞌ reeman laa reeman nagaꞌyëjs, zianz rëbaman loj Bëd:

―Simón, ¿nagaꞌyëjsil ya? ¿Niꞌqui tib hor ad gojct nibejnaal ya? 38 Gol gurenaa, gol gurejdx gunab Dios chitëë güün xindxab lëjt gan. Din rëndi güündi ziꞌc rayal, per xcuerpidi ad rtiëjbtan.

39 Dxel zëman zatijb persi gurejdx gunabaman Dios con diidx guin gajc ree. 40 Chi badxinman lod rigaꞌ reeman, laagajc reeman nagaꞌyëjs zatijb, guial yuꞌ daꞌt bacaal loj reeman, abiꞌ niꞌquid radxejlt xhie guiëb reeman lojman. 41 Ni bayon volt badxinman, rëbaman:

―¿Sta nagaꞌyëjsidi ya? ¿Sta cayziiladxidi ya? Gol batieꞌch xbacaalidi din naj, najn Bén guxhaal Dios ma bidxin hor yayü reeman naj loj ree béndol. 42 Gol bixche, yoꞌ ree, laa bén yayü naj ma zëëd gajxh.

Gunaaz reeman Jesús

(Mt. 26:47‑56; Lc. 22:47‑53; Jn.18 :2‑11)

43 Sta caneenë Jesús laa reeman chi bidxin Judas, bén goc tijb ree xbejnman. Bidxinnëman zien ree bejn caꞌ reeman espad con yag, guxhaal ree bixhioz rniabee ree bixhioz laa reeman con ree mextr rajc ley con ree guxtis Israel. 44 Abiꞌ Judas bén bayü laaman ma bagojnxgajman bén guin ree rëbaman:

―Bén gawan xid, laaman na̱j bén raguiilidi, gol gunaazaman gol chinëman, gol gojpaman ad guslaadi laaman.

45 Chi bidxin Judas dxel gubigaman loj Jesús, rëbaman:

―Mextr, Mextr.

Dxel gudawaman laaman xid. 46 Zianz gunaaz ree bén guin laaman din chinë reeman laaman. 47 Per tijb bén zaꞌ yagaj gulëë xiespadaman, gutüꞌman guidiajg xmojs bixhioz rniabee gra ree bixhioz. 48 Dxel rëb Jesús loj ree bén guin:

―¿Chexc zeel zëëdidi con espad con yag din chinëdi naj ziꞌc tijb xingubaan? 49 Zianczi guzunëꞌn lëjt lën yadooroꞌ Jerusalén rulün lëjt xtiidx Dios, abiꞌ ad gunaaztidi naj. Per gra ree ni guie cayajc din gac cumplid ni ca loj xtiidx Dios.

50 Dxel graczi ree xbejn Jesús baxüün, guroꞌnladx reeman laaman.

Tijb xin binal Jesús

51 Per guyu tijb xinguiag binalix Jesús, nadüübix tijbzi lajd. Abiꞌ chi gunaaz ree bén guin laax, 52 baslaagajquix lajd guin, zigxüünt ziladix.

Zaꞌ Jesús loj ree guxtis

(Mt. 26:57‑68; Lc. 22:54‑55, 63‑71; Jn.18 :12‑14, 19‑24)

53 Dxel binë reeman Jesús loj bixhioz rniabee gra ree bixhioz, abiꞌ badxaag lasaꞌ ree bixhioz rniabee ree bixhioz con ree guxtis Israel con ree mextr rajc ley. 54 Abiꞌ zijt zijt binal Bëd Jesús xt ruleꞌ lidx bixhioz guin, dxel gurejman rudëj con ree bén rajp rulidx bixhioz guin,

55 Abiꞌ ree bixhioz rniabee ree bixhioz con gra ree guxtis, baguiil reeman mod xhienaag gutediaꞌ reeman Jesús din chileꞌ gugüjt reeman laaman, per ad badxejlt xhienaag nutediaꞌ reeman laaman, 56 majsi zien reeman rudxiib diidx rusquiee guijcaman, per garent garen rëb tijb gaj reeman. 57 Dxel guzuli tioꞌp choon reeman gunee reeman diidx rusquiee ree contr laaman, rëb reeman:

58 ―Dunujn baguiejn rëbix: “Naj guseꞌn yadooroꞌ Jerusalén ni been ree bejn, abiꞌ choon dxejzi yayünanan sin xyudar ree bejn.”

59 Per niꞌqui zian ad guneet reeman tibloj, garent garen gunee reeman.

60 Dxel bixhioz rniabee gra ree bixhioz guzuliman galay ree bén rigaꞌ yagaj, abiꞌ gunabdiidxaman loj Jesús, rëbaman:

―¿Nid xhie diidx yadxiꞌl ya? ¿Wali ni canee reeman contr lüj ya?

61 Per achetczi rëb Jesús, ad badxiꞌtaman diidx, dxel gunabdiidx bixhioz rniabee guin lojman zatijb, rëbaman:

―¿Lüj na̱j Cristo ya, Xiꞌn Dios Bén nagleꞌ?

62 Badxiꞌ Jesúsan rëbaman:

―Walican, najcan. Abiꞌ lëjt zuguiaadi naj najn Bén guxhaal Dios zooban xladbee Dios Bén caꞌ gra guialrniabee guguiaa tëëdi naj guialan loj za̱j xanyabaa.

63 Chi biguiejn bixhioz guin zian, gudixyaꞌ xabaman, dxel rëbaman:

―Ad rüjntri naguiejn yadiil ree testiw. 64 Lëjt ma biguiejn caneeguijdxix Dios. Yan, ¿xhie nadi?

Abiꞌ graczi reeman rëb, guiëtaman.

65 Yuꞌ reeman rucojp xhiejn lojman, rutaꞌcw tëë reeman lojman, dxel riguin reeman laaman, rëb reeman:

―¡Guneeyaꞌ chu gudin lüj!

Guiáad ree bén rajp yagaj wëëz reeman lojman.

Rëb Bëd ad nünbeetaman Jesús

(Mt. 26:69‑75; Lc. 22:56‑62; Jn.18 :15‑18, 25‑29)

66 Chi zaꞌ Bëd ruleꞌ guin, dxel bidxin tijb béngunaa rüjn dxiin lidx bixhioz rniabee guin. 67 Chi baguiaaman zojb Bëd rudëj guin cuchaꞌman, baguiaaman lojman, dxel rëbaman:

―Në lüj zaꞌnë Jesús bén Nazaret.

68 Per gurexuu Bëd rëbaman:

―Ad nünbeetan laaman, ad ragbeetan xhienin rnieel.

Chi bariiman roꞌ port guin, dxel guridxaꞌ gui̱d. 69 Dxel baguiaa béngunaa guin Bëd zatijb, zianz guzuloj rëbaman loj ree bén rigaꞌ yagaj:

―Në bén guin na̱j xbejn Jesús.

70 Per gurexuu Bëd zatijb. Gojc xchejdoo rëb ree bén rigaꞌ yagaj loj Bëd:

―Walican në lüj na̱j xbejnx din xin Galilea lüj, abiꞌ ziꞌcgajc rniee reeman rnieel.

71 Per guzudxiꞌch Bëd con ni rëbaman, zianz rëbaman:

―Gudëëd Dios naj casti bal rusquieen, ad nünbeetan bén nadi.

72 Loj hor zii gajc barojp volt guridxaꞌ gui̱d. Dxel basaaladx Bëd guial rëb Jesús lojman: “Chi gad gui̱d cwidxaꞌ tioꞌp volt, mal gojc choon volt rëbil ad nünbeetil naj.” Chi basaaladxaman zian, dxel guzuloj cayoonman.

<- San Marcw 13 San Marcw 15 ->