Xtiidxzaꞌc Jesucrist ni bacaa San Marcw

Rzuloj Waj rulüüman xtiidxzaꞌc Jesucrist

(Mt. 3:1‑12; Lc. 3:1‑9, 15‑17; Jn.1 :19‑28)

1 Ze guzuloj xtiidxzaꞌc Jesucrist, Xiꞌn Dios.

2 Guyu tijb bén badëë xtiidx Dios loj ree bejn brii lajman Isaías, bacaaman xtiidx Dios, rëbaman:

Naj rxhial tijb bén ned lojl,

bén güünchaaw xnejzil.

3 Rguien chaꞌ tijb bén rbidxaꞌ loj yujbidx, rëbaman:

“Gol beenchaaw xnejz dux Dad ree, gol guxhal tijb nejz nali.”

4 Zian biꞌt Waj bén baroobnijs bejn ree, guzujman niz loj yujbidx, abiꞌ rëbaman loj ree bejn guial rayal yayüjn xgab por xtol reeman, yayejc reeman con Dios din gac reeman perdon tiobnijs tëë reeman. 5 Gra ree bén zojb niz Judea, në ree bén Jerusalén brii reeman zicaagdiajg reeman ni rniee Waj, abiꞌ rxhioobdol reeman. Zianz ruroobnijs Waj laa reeman loj guiiw Jordán.

6 Guidxlad camell gojcnë xabaman, abiꞌ lënman bixii tijb cinch guid. Gudawaman biꞌtsu con dxijn dajn. 7 Chi guneenëman bejn ree, rëbaman:

―Xichan zëëd tijb bén mazri zojbloj guial lon, niꞌqui xgurëchaman ad zajct gaxhiecan guial mazri zojblojman guial lon. 8 Naj curobnijs lëjt con nijs, per laaman guroobnijs lëjt con xSprijt Dios.

Rirobnijs Jesús

(Mt. 3:13‑17; Lc. 3:21‑22)

9 Lën ree dxejzii guza Jesús luguiedx Nazaret ni rigaꞌ niz Galilea, abiꞌ baroobnijs Waj laaman loj guiiw Jordán. 10 Chi bariiman loj nijs guin, laa baguiaa gajcaman bixal xanyabaa, zidguiajt xSprijt Dios ziꞌc tijb palom xt guijcaman. 11 Dxel biguien chaꞌ bejn xanyabaa, rëbaman:

―Lüj na̱j da Xiꞌnan, rënan lüj rabaanëꞌ tëën lüj.

Been xindxab Jesús prueb

(Mt. 4:1‑11; Lc. 4:1‑13)

12 Dxel binë xSprijt Dios Jesús loj yujbidx. 13 Ni guzuman tiuu dxej tiuu guiaal, loj ree bedoxh. Abiꞌ been xindxab laaman prueb chitëë nuzoobaman xtiidx Dios, guiáad ree xianjl Dios gunaj laaman.

Rzuloj Jesús rulüüman bejn ree niz Galilea

(Mt. 4:12‑17; Lc. 4:14‑15)

14 Chi mal guyu Waj ladxguiib, wej Jesús niz Galilea bigneeman xtiidxzaꞌc Dios, 15 rëbaman:

―Ma bidxin dxej zëëd xguialrniabee Dios gajxh, zeel gol bayüjn xgab por xtolidi, gol bililadx tëë xtiidxzaꞌcaman.

Rbejdx Jesús tajp ree bén gac xbejnman

(Mt. 4:18‑22; Lc.5:1‑11)

16 Laꞌtgaj caza Jesús roꞌnijsdoo Galilea, baguiaaman Simón në bijchaman Andrejs, cuzaal xguijxh reeman lojnijs din guiniaaz reeman bëjl. 17 Abiꞌ rëb Jesús loj reeman:

―Gol tanal naj din gulün lëjt xhienaag gutoꞌpidi bejn par Dios, luar rniaazidi bëjl.

18 Loj hor guin gajc basaꞌn guijxh rniaaznë reeman bëjl persi zinal reeman Jesús.

19 Guzaman zatibdaꞌn, dxel baguiaaman Jacob con Waj bén na̱j ree xiꞌn Zebedeo, yuꞌ reeman loj barcw rayüjnchaaw xguijxh reeman. 20 Dxel gurejdx Jesús laa reeman, abiꞌ basaꞌn reeman Zebedeo loj barcw guin, bén na̱j xdad reeman con ree xmojsaman, guiáad laa reeman zinal reeman Jesús.

Rabëë Jesús xindxab luxdoo tijb bejn

(Lc. 4:31‑37)

21 Chi bidxin Jesús luguiedx Capernaum. Abiꞌ dxej raziiladx ree bejn guyuman lën xyadoo ree bén Israel culüüman laa reeman. 22 Dád radxa loj reeman ziꞌc rnieenëman laa reeman guial rulüüman laa reeman ziꞌc tijb bén rniabee, ad rulüütaman ziꞌc rulüü ree mextr rajc ley. 23 Lën yadoo guin yuꞌ tijb xin yuꞌ xindxab luxdoo, dxejczi guridxaꞌx rëbix:

24 ―¿Xhie rënl con dunujn, Jesús bén Nazaret? ¿Zëëdil ya zidganijtil dunujn? Nünbeen lüj, ragbeen guial naya nalil najl xiꞌn Dios.

25 Dxel gudilë Jesús xindxab guin, rëbaman:

―¡Bacwëëz roꞌl, barii luxdoo xin guin!

26 Abiꞌ been xindxab guin xin guin ziꞌc bén rëjtyaꞌ, zianz gurixdiajx rejs, bariix luxdoo xin guin. 27 Graczi ree bén rigaꞌ dád badxaloj reeman, riniabdiidx loj lasaꞌ reeman rëb reeman:

―¿Xhie ree nicüban rulüü bén guin? ¡Con guialrniabee ni rajpaman xt ree xindxab ruzoob xtiidxaman!

28 Tibrajtzi bireꞌch xtiidx Jesús guidib niz Galilea.

Rayüjn Jesús xnasuegr Bëd

(Mt. 8:14‑15; Lc. 4:38‑39)

29 Bariiz reeman lën yadoo guin, binë Jesús Jacob con Waj lidx Simón con Andrejs. 30 Abiꞌ nagaꞌ xnasuegr Simón, yuꞌman xliaadoxh. Dxel bagojn reeman Jesús guial ragxuuman. 31 Abiꞌ gubigaman cwëꞌman gunaazaman yaaman, gulesaman laaman. Loj hor guin gajc bariiman xliaa guin dxel guzuloj cudëëdaman ni gaw reeman.

Rayüjn Jesús zien ree bénragxuu

(Mt. 8:16‑17; Lc. 4:40‑41)

32 Chi ma gurej guiaal, binë reeman bénragxuu ree lod zaꞌ Jesús, në ree bén yuꞌ xindxab luxdoo. 33 Graczi ree bén luguiedx guin bidoꞌp ruyu lod zaꞌ Jesús. 34 Bayüjn Jesús zien ree bén rajc ree gadxagayaa guialguijdx, babëë tëëman zien ree xindxab luxdoo ree bejn. Per ad rudëëtaman mod guiniee ree xindxab guin guial nünbee reex laaman.

Rulüü Jesús xtiidx Dios niz Galilea

(Lc. 4: 42‑44)

35 Bixche Jesús rsildoo, chi ziiz nacay, briiman luguiedx guin wejman tijb luar lod achutczi bejn zojb, persi gurejdx gunabaman Dios. 36 Abiꞌ Simón con ree xcompniaraman bigdiil reeman laaman. 37 Chi badxejl reeman laaman, rëb reeman lojman:

―Gra ree bejn cayguiil lüj.

38 Per rëbaman loj reeman:

―Yoꞌ ree guiedx ni rigaꞌ ree gajxh din gulün xtiidxzaꞌc Dios, din par zian zialan.

39 Abiꞌ balüü Jesús xtiidx Dios lën ree xyadoo ree bén Israel guidib niz Galilea babëë tëëman xindxab luxdoo ree bejn.

Rayüjn Jesús tijb bén rajc guialguijdx la lepra

(Mt. 8:1‑4; Lc. 5:12‑16)

40 Tijb bén rajc guialguijdx la lepra, gubigaman lod zaꞌ Jesús, bazuxibaman lojman rëbaman

―Bal guiënl, zajc yayüjnl naj.

41 Baya Jesús laaman, baquiꞌman laaman, rëbgajman:

―Rënan, bayajc.

42 Chi gunee Jesús zian, hor guin gajc bayajc bén guin abiꞌ baya xcuerpaman. 43 Dxel baguꞌnejz Jesús laaman, rëbaman lojman:

44 ―Bacaagdiajg ni ganin lüj. Achu loj guiëbil guial ma bayajquil. Lojzi bixhioz wej din guguiaaman lüj, binë gon ni rayal chinël loj Dios ziꞌc gunabee Moisejs, din gagbee gra ree bejn guial ma bayajquil.

45 Per bén guin chi ziaman guzuloj catieꞌchaman diidx loj gra bejn xhienaag bayajcaman. Zeel ad bileꞌt contzi niu Jesús luguiedx ree, ganax dajn ree rayaꞌnman lod achut bejn zojb. Per gra lad rza ree bejn rej reeman lod zaꞌman.

San Marcw 2 ->