San Matew 17

Bidxaa Jesús loj choon ree xbejnman

(Mr. 9:2‑13; Lc. 9:28‑36)

1 Chi gudëd xhoꞌp dxej, binë Jesús Bëd, në Jacob con Waj bijch Jacob, binëman laa reeman guijc tijb guiaꞌ ya. 2 Ni bidxaa Jesús niz loj reeman. Dád balaa bachaꞌ lojman ziꞌc rulaa gubijdx bachaꞌ, guiáad xabaman bayajcan naquich, balaa tëën bachaꞌ ziꞌc guij. 3 Abiꞌ loj hor guin baguiaa reeman Moisejs con Elías cayünë reeman Jesús diidx. 4 Dxel rëb Bëd loj Jesús:

―Dad, ¡zagdxe na̱j nadxuꞌ ree guie! Bal rënl, günan choon ranch, tijban par lüj, tijban par Moisejs, stijban par Elías.

5 Laꞌtgaj canee Bëd zian, biguiajt tijb za̱j xt guijc reeman ridiinan bachaꞌ, loj za̱j guin brii chaꞌ bejn rëbaman:

―Bén guie na̱j da Xiꞌnan, bén rën daꞌtan, bén rabaanëꞌ tëën, gol bacaagdiajg xtiidxaman.

6 Chi biguiejn ree xbejn Jesús diidx guin ree, bazuxib reeman basajb loj reeman xt luyuj, dád bidxeb reeman. 7 Dxel gubig Jesús lod zaꞌ reeman, baquiꞌman laa reeman, rëbaman:

―Gol guzuli, ad ridxebidi.

8 Abiꞌ chi gules loj reeman achutri baguiaa reeman, tijbzi Jesús zaꞌ yagaj.

9 Laꞌtgaj cayguiajt reeman ruguiaꞌ guin, rëb Jesús loj reeman:

―Achuczi loj guiëbidi ni baguiaadi, xt chi yaban Bén guxhaal Dios.

10 Dxel gunabdiidx ree xbejnman lojman, rëb reeman:

―¿Chexquiza zeel rëb ree mextr rajc ley guial yaloj Elías guiꞌt?

11 Badxiꞌ Jesúsan, rëbaman:

―Walican guial yaloj Elías guiꞌt, laaman guzuxnejz gra. 12 Per naj rni lëjt guial mal biꞌt Elías, abiꞌ ad bayagbeet ree bejn laaman, beennë reeman laaman ni guyëntzi reeman. Abiꞌ ziangajc gusagzi reeman Bén guxhaal Dios.

13 Dxel gogbee ree xbejnman guial Wajn bén baroobnijs bejn ree cuzaꞌtaman.

Rayüjn Jesús tijb xin rëjtyaꞌ

(Mr. 9:14‑29; Lc. 9:37‑43)

14 Chi badxin Jesús con guiyon ree xbejnman, lod cabëz ree ben zien laaman bibig tijb xinguiaaw lojman, bazuxibix lojman rëbix:

15 ―Dad, baya da xiꞌnan, din dád rzagdiajx rëjtyaꞌx. Bëlczi volt riyajbix lojguij o lojnijs ya. 16 Bidnëꞌn laax loj ree xbejnl, per ad rajct rayüjn reeman laax.

17 Badxiꞌ Jesúsan, rëbaman:

―¡Benguijdx, bén ad rliladxt! ¿Xt goc gazunëꞌn lëjt? ¿Xt goc gadaanan lëjt? Gol tanë xinzii guie.

18 Dxel gudilë Jesús xindxab guin, babëëman laax luxdoo xin guin. Loj hor guin gajc bayajquix.

19 Abiꞌ gunabdiidx ree xbejn Jesús lojman lood ren, rëb reeman:

―¿Chexc zeel ad gojct nalëën xindxab guin luxdoo xin guin?

20 Dxel rëb Jesús loj reeman:

―Guial taꞌnzi rliladxidi. Naj rni lojdi bal na̱j xguialrliladxidi majsi ziꞌctzi na̱j xhaj moxhtajs, zileꞌ guiëbidi loj guiaꞌ guin: “Bisüd guie, bisob lood ren”, zucaagdiajgan xtiidxidi. Achetczi gac nawëëg par lëjt. 21 Per par yarii lasaꞌ ree xindxab guie ryaadx chu cwedx guiniab Dios guibaꞌn tëë.

Rugojn Jesús zatijb guial guiëtaman

(Mr. 9:30‑32; Lc. 9:43‑45)

22 Laꞌtgaj zaꞌ Jesús niz Galilea con ree xbejnman, rëbaman loj reeman guial yayü reeman Bén guxhaal Dios loj ree bejn, 23 abiꞌ gugüjt reeman laaman, per ni yayon dxej yabanman. Chi biguiejn ree xbejnman zian, dád guyu naya reeman.

Ni rajx par yadoo

24 Chi badxin Jesús con ree xbejnman guiedx Capernaum, bén ruquijx ree impuest par yadoo wej reeman loj Bëd bignabdiidx reeman, rëb reeman:

―¿Rguijx xmextril impuest par yadoo ya?

25 Badxiꞌ Bëdan, rëbaman:

―Riguijxcaman laan.

Dxel chi bayu Bëd lënü lod zaꞌ Jesús, yalojli Jesús gunabdiidx lojman, rëbaman:

―¿Xhie naladxil, Simón? ¿Chu rguijx impuest loj ree rey yuꞌ loj guidxliuj guie? ¿Xiꞌn reeman ya o benzit ree?

26 Badxiꞌ Bëd laan rëbaman:

―Benzit ree.

Dxel rëb Jesús:

―Abiꞌ ree bén ladx reeman ad rguijxt reeman laan. 27 Per chitëë guidxeꞌch reeman, wej roꞌ nijs, bazaal xiansuelil, dxel bëjl yaloj ni guiniaazil babëëb. Roꞌ bëjl guin guidxelil tijb cintabl, con laan bitijx dux impuest.

<- San Matew 16 San Matew 18 ->