San Lujc 3

Rzuloj Waj rulüüman xtiidx Dios

(Mt. 3:1‑12; Mr. 1:1‑8; Jn.1:19‑28)

1 Chi goc chiin ijz rniabee rey Tiberio, abiꞌ Poncio Pilato najman gobernador Judea, Herodes najman gobernador Galilea, bijchaman Felip najman gobernador Iturea në Traconite, guiáad Lisanias najman gobernador Abilinia. 2 Anás në Caifás na̱j reeman bixhioz rniabee gra ree bixhioz. Lën ree dxej zii gunee Dios Waj, xiꞌn Zacarías lod na̱j yujbidx. 3 Dxel gudëd Waj graczi ree guiedx rigaꞌ roꞌ guiiw Jordán, rëbaman loj ree bejn din yayüjn reeman xgab por xtol reeman tiobnijs tëë reeman, din güün Dios xtol reeman perdon. 4 Zian gojc cumplid ni bacaa Isaías bén badëë xtiidx Dios loj ree bejn, lod rëbaman:

Rguien chaꞌ tijb bén rbidxaꞌ loj yujbidx, rëbaman:

“Gol beenchaaw xnejz dux Dad ree Dios,

gol guxhal tijb nejz nali.

5 Gra ree laꞌch yadxa reen guiáad ree guiaꞌ con

ree lom yayajc reen tibloj,

në ree nejz volt yayaali

yadxa tëë ree lunejz ni ad najt tibloj.

6 Gra ree bénguidxliuj guguiaa bén

guixhiaal Dios gagnë dunuj ree.”

7 Chi brii zien ree bejn din guroobnijs Waj laa reeman, rëbaman loj reeman:

―¡Xiꞌn xindxab lëjt! ¿Chu bagojn lëjt guial laadi loj castiroꞌ ni zëëd? 8 Gol gubajn zagdxe din guiguien guial waliqui ma bayüjndi xgab por xtolidi, ad guiëb tëë loj lasaꞌdi: “Dunujn zioꞌp loj xdiaa Abraham”, din naj rni lëjt xt guiaj guie ree zajc yayüjn Dios xdiaa Abraham. 9 Abiꞌ ree bén ad zinalt xnejz Dios ziꞌc rayal, ma zidyob dxej ni güünnë Dios laa reeman ziꞌc rüjnnë bejn tijb yag chi ad rtiatan, rütüügaman laan din cheꞌcan.

10 Dxel gunabdiidx reeman, rëb reeman:

―¿Xhie rayal yaguieenan?

11 Badxiꞌ Wajn rëbaman:

―Bén yuꞌ tioꞌp xab, rayal gudëëman tijban loj bén achet rajp. Guiáad bén yuꞌ ni raw, rayal gudëëman taꞌnan loj bén ryaadxan.

12 Në tioꞌp choon ree bén ruquijx impuest bidxin din tiobnijs reeman. Abiꞌ gunabdiidx reeman loj Waj, rëb reeman:

―Mextr, laadx dunujn, ¿xhie rayal yaguieenan?

13 Badxiꞌ Wajn, rëbaman:

―Ad guquijxidi mazri guial loj ni rayal guquijxidi.

14 Yuꞌ tëë ree suldad gunabdiidx lojman rëb reex:

―Laadxza dunujn, ¿xhie rayal yaguieenan?

Badxiꞌman laan rëbaman:

―Ad cwëëxuudi xhie xieen bejn, guial guchejbidi laa reeman o gudxiibidi guijc reeman ni ad beent reeman, gol guziibnejz tëë ni rajxidi.

15 Guiáad ree bejn gagbeenejzdoo reeman bal Wajn na̱j Cristo, 16 per rëbaman loj gra reeman:

―Naj curobnijs lëjt con nijs. Per zëëd tijb bén guroobnijs lëjt con xSprijt Dios në bajl. Laaman rajp mazri guialrniabee guial lon, niꞌqui xgurëchaman ad zajct gaxhiecan. 17 Abiꞌ ziꞌc raya trigo zian güünnëman bejn. Din bén zinal ree xnejz Dios yayal reeman lod rniabeeman, guiáad ree bén ad zinalt xnejz Dios guixhiaalaman laa reeman loj bajl ni ad yuꞌt dxej yayüꞌ.

18 Zian guneenë Waj laa reeman, në ree con diidx ren guneenëman laa reeman rulüüman laa reeman xtiidxzaꞌc Dios. 19 Gudilë tëëman rey Herodes guial cwaꞌman Herodías xbéngunaa bijchaman Felip, në por graczi ni mal ni ma beenman. 20 Per luar nidxgaꞌ Herodes xtiidx Waj aal beenman zatijb ni mal: badxeꞌman Waj ladxguiib.

Rirobnijs Jesús

(Mt. 3:13‑17; Mr. 1:9‑11)

21 Chi curoobnijs Waj bejn ree nëgajc Jesús gurobnijs. Abiꞌ laꞌtgaj cabejdx canabaman Dios, bixal xanyabaa 22 zianz biguiajt xSprijt Dios ziꞌc tijb palom xt guijcaman. Dxel biguien chaꞌ tijb bejn xanyabaa, rëbaman:

―Lüj na̱j da xiꞌnan, rënan lüj rabaanëꞌ tëën lüj.

Bén goc ree xdiaagulal Jesús

(Mt. 1:1‑17)

23 Cost gajlbichii ijz yuꞌ Jesús chi guzuloj beenman xchiin Dios. Naladx ree bejn xiꞌn Xiëb najman, Xiëb guin gojc xiꞌn Elí. 24 Elí gojc xiꞌn Matat, Matat gojc xiꞌn Leví, Leví gojc xiꞌn Melqui, Melqui gojc xiꞌn Jana, Jana gojc xiꞌn Xiëb, 25 Xiëb gojc xiꞌn Matatías, Matatías gojc xiꞌn Amós, Amós gojc xiꞌn Nahum, Nahum gojc xiꞌn Esli, Esli gojc xiꞌn Nagai, 26 Nagai gojc xiꞌn Maat, Maat gojc xiꞌn Matatías, Matatías gojc xiꞌn Semei, Semei gojc xiꞌn Xiëb, Xiëb gojc xiꞌn Judá, 27 Judá gojc xiꞌn Joana, Joana gojc xiꞌn Resa, Resa gojc xiꞌn Zorobabel, Zorobabel gojc xiꞌn Salatiel, Salatiel gojc xiꞌn Neri, 28 Neri gojc xiꞌn Melqui, Melqui gojc xiꞌn Adi, Adi gojc xiꞌn Cosam, Cosam gojc xiꞌn Elmodam, Elmodam gojc xiꞌn Er, 29 Er gojc xiꞌn Josué, Josué gojc xiꞌn Eliezer, Eliezer gojc xiꞌn Jorim, Jorim gojc xiꞌn Matat, 30 Matat gojc xiꞌn Leví, Leví gojc xiꞌn Simeón, Simeón gojc xiꞌn Judá, Judá gojc xiꞌn Xiëb, Xiëb gojc xiꞌn Jonán, Jonán gojc xiꞌn Eliaquim, 31 Eliaquim gojc xiꞌn Melea, Melea gojc xiꞌn Mainán, Mainán gojc xiꞌn Matata, Matata gojc xiꞌn Natán, 32 Natán gojc xiꞌn Davi, Davi gojc xiꞌn Isaí, Isaí gojc xiꞌn Obed, Obed gojc xiꞌn Booz, Booz gojc xiꞌn Salmón, Salmón gojc xiꞌn Naasón, 33 Naasón gojc xiꞌn Aminadab, Aminadab gojc xiꞌn Aram, Aram gojc xiꞌn Esrom, Esrom gojc xiꞌn Fares, Fares gojc xiꞌn Judá, 34 Judá gojc xiꞌn Jacob, Jacob gojc xiꞌn Isaac, Isaac gojc xiꞌn Abraham, Abraham gojc xiꞌn Taré, Taré gojc xiꞌn Nacor, 35 Nacor gojc xiꞌn Serug, Serug gojc xiꞌn Ragau, Ragau gojc xiꞌn Peleg, Peleg gojc xiꞌn Heber, Heber gojc xiꞌn Sala, 36 Sala gojc xiꞌn Cainán, Cainán gojc xiꞌn Arfaxad, Arfaxad gojc xiꞌn Sem, Sem gojc xiꞌn Noé, Noé gojc xiꞌn Lamec, 37 Lamec gojc xiꞌn Matusalén, Matusalén gojc xiꞌn Enoc, Enoc gojc xiꞌn Jared, Jared gojc xiꞌn Mahalaleel, Mahalaleel gojc xiꞌn Cainán, 38 Cainán gojc xiꞌn Enós, Enós gojc xiꞌn Set, Set gojc xiꞌn Adán, guiáad Adán gojc xiꞌn Dios.

<- San Lujc 2 San Lujc 4 ->