San Lujc 20

Xguialrniabee Jesús

(Mt. 21:23‑27; Mr. 11:27‑33)

1 Lën ree dxej ni zaꞌ Jesús lën yadooroꞌ Jerusalén, culüüman bejn ree xtiidx Dios, bidxin ree bixhioz rniabee ree bixhioz, con ree mextr rajc ley, në ree guxtis Israel, 2 abiꞌ rëb reeman lojman:

―Guna, ¿chu na güünl ni guin ree? ¿Chu banee guialrniabee lojl?

3 Badxiꞌ Jesús laan, rëbaman:

―Ziangajc naj yuꞌ tijb ni ganabdiidxan lojdi. Gol badxiꞌn: 4 ¿chu guxhaal Waj bidgaroobnijsaman bejn ree, Dios ya o bénguidxliuj?

5 Dxel guzuloj rëb loj lasaꞌ reeman:

―Bal yaguieꞌch ree Dios guxhaal laaman, zanaman. “¿Chexquiza zeel ad bililadxtidi laaman?” 6 Abiꞌza bal yaguieꞌch ree bénguidxliuj guxhaal laaman, zugüjt ree bejn dunuj ree con guiaj din gra reeman rliladx guial Waj gojc bén badëë xtiidx Dios loj ree bejn.

7 Abiꞌ badxiꞌ reeman laan rëb reeman guial ad ragbeet reeman chu guxhaal Waj bidgaroobnijsaman bejn ree. 8 Dxel rëb Jesús loj reeman:

―Niꞌqui naj ad zanitan lojdi chu banee guialrniabee günan ni guin ree.

Xcwent ree mojs guijdx

(Mt. 21:33‑44; Mr. 12:1‑11)

9 Dxel guzuloj cayü Jesús tijb cwent loj ree bejn, rëbaman:

―Guyu tijb bejn guxübinman uv ree loj xguiniaaman, dxel badëëman laan garol loj ree bén güün dxiin lojn, zëtaman zijt. 10 Chi bidxin dxej yalaꞌ reeman uv guin, guxhaalaman tijb xmojsaman chigxiix ni rayalaman, per ree bén rüjn dxiin loj guiniaa guin gudijn reeman mojs guin abiꞌ badxiꞌ reeman laax zezi. 11 Dxel guxhaalaman mojs ren, per nëgajc mojs guin gunee reeman ni rëntzi reeman, gudijn reeman laax abiꞌ badxiꞌ reeman laax zezi. 12 Zianz guxhaalaman zatijbix, per gudiilguijdx reeman laax abiꞌ babëë reeman laax loj guiniaa guin.

13 ’Dxel rëb bén na̱j xguidxliuj laan: “¿Xhienaag günan yan? Gaxhal da xiꞌnan xin rën daꞌtan, wed zajp reeman laax respejt.” 14 Per chi baguiaa ree bén guin laax, rëb loj lasaꞌ reeman: “Xin guinan na̱j xin yayaꞌnnë guidxliuj guin. Yagüjt reex din gacan du xieen ree.” 15 Dxel babëë reeman laax loj guidxliuj guin, bagüjt reeman laax.

Zianz gunabdiidx Jesús loj ree bén caneenëman, rëbaman:

―Yan, ¿xhie naladxidi güünnë bén na̱j xguidxliuj laan bén guin ree? 16 Naj rni lojdi guial ziꞌtaman din gugüjtaman bén guin ree dxel gudëëman guidxliuj guin loj ree ben ren.

Chi biguiejn reeman zian dxel rëb reeman:

―¡Gagnë Dios ad zajct zian!

17 Per Jesús baguiaaman loj reeman, abiꞌ rëbaman:

―Bal id zajc zian ¿xhieza rën guiëb ni ca loj xtiidx Dios? Lod rëb:

Guiaj ni gulëëgoꞌn ree bén rüjn yu,

laan na̱j ni mazri been sirv gojcnë yu guin.

18 Chutëëz bén yab guijc guiaj guin, gacaman ziꞌc tijb ni riroox, guiáad bal yab guiaj guin guijcaman, gacaman ziꞌc tijb ni ryüüdëj.

Xcwent impuest

(Mt. 21:45‑46; 22:15‑22; Mr. 12:12‑17)

19 Bixhioz rniabee ree bixhioz con ree mextr rajc ley, hor guin gajc guyën reeman niniaaz reeman Jesús guial gogbee reeman cuzaꞌtaman laa reeman, per bidxeb reeman bejn ree. 20 Abiꞌ guxhaal reeman bén ziglaꞌch ree laaman din güünzi reeman guial gulüü na̱j reeman benzaꞌc, din yaguiil reeman mod guiniee Jesús diidx ni gudxiib reeman guijc, din chileꞌ yayü reeman laaman loj gobernador Rom. 21 Dxel gunabdiidx reeman lojman, rëb reeman:

―Mextr, dunujn rayagbee guial rnieel rulüü tëël ziꞌc rayal, din par lüj tiblojzi na̱j bejn, abiꞌ walil rulüül guial xhienaag rën Dios guiban bejn. 22 ¿Zagdxen ya radijxan impuest loj rey César, o ad zagdxetan?

23 Per gogbee gajc Jesús xgab mal ni cayüjn reeman abiꞌ rëbaman loj reeman:

24 ―Gol balüü tijb cintabl lon. ¿Chu loj ca lojn chu tëë laj ca lojn?

Badxiꞌ reeman laan, rëb reeman:

―Loj rey César ca lojn në lajman.

25 Dxel rëbaman loj reeman:

―Gol badëëcliza loj rey César ni na̱j xieen César, guiáad loj Dios gol badëë ni na̱j xieen Dios.

26 Abiꞌ gra ni guneeman niz loj ree bejn, achetri badxejl nudxiib reeman guijc din niniaaz reeman laaman. Badxali loj reeman ni guneeman abiꞌ achetri rëb reeman.

Xcwent guial yaban ree bengüt

(Mt. 22:23‑33; Mr. 12:18‑27)

27 Tioꞌp choon ree bénsaducew bignaj Jesús, bénsadusew guin ree ad rliladxt reeman guial yaban ree bengüt, zeel rëb reeman loj Jesús:

28 ―Mextr, loj xley Moisejs rëb guial bal guiët tijb xinguiaaw abiꞌ achut xiꞌnx guyu con lacheelix, bijch xingüt guin guxhliaanë béngunaa bizëjb guin din chuꞌ xiꞌn reex ziꞌc gulüü xiꞌn xin güt guinan. 29 Guyu tijb famil lod goc reex gajdx bijch. Baxhliaa xin yaloj guin, per güjtix abiꞌ ad guyut xiꞌn reex con lacheelix. 30 Dxel bijch barojpix baxhliaanë béngunaa guin, per güjtgajquix ad guyu gajct xiꞌn reex. 31 Zianz baxhliaanë xin bayon guin béngunaa bizëjb guin, zianz baxhliaanëman guigajdx reex abiꞌ gra reex güjt achut xiꞌn reex guyu con laaman. 32 Ni bigratë në béngunaa guin güjt. 33 Yan, chi yaban ree bengüt, ¿chu loj guigajdx reex gac xbéngunaa laaman guial gra reex baxhliaanë laaman?

34 Dxel rëb Jesús loj reeman:

―Loj guidxliuj guie ruxhliaa ree bejn abiꞌ rudëëd xiꞌn reeman ruxhliaa. 35 Per ree bén yaban zatijb, bén rayal ree gap guialnaban tiblayaa con Dios, ad zuxhliaatri reeman ad zudëë tëëtri xiꞌn reeman guxhliaa, 36 din ad zëjttri reeman, gac reeman ziꞌc ree xianjl Dios. Gac tëë reeman xiꞌn Dios guial ma baban reeman. 37 Abiꞌ xcwent ni yaban ree bengüt, xt Moisejs rëb zian tiblajt loj xtiidx Dios lod rëbaman guial baguiaaman yag ni cayeꞌc. Yagaj rëb Dios lojman guial Dios na̱j xDios Abraham, xDios Isaac, në xDios Jacob. 38 Din Dios ad najtaman xDios ree bengüt, najman xDios ree bén naban, din par laaman gra ree bejn naban.

39 Dxel yuꞌ ree mextr rajc ley, rëb lojman:

―Mextr, zagdxequi guneel.

40 Abiꞌ achetri bayax reeman niniabdiidx reeman lojman.

Chu loj xdiaa zëëd Cristo

(Mt. 22:41‑46; Mr. 12:35‑37)

41 Rëb Jesús loj ree bejn:

―¿Chexc zeel rëb ree bejn guial zëëd Cristo loj xdiaa rey Davi? 42 Awa Davi guin gajc gunee loj libr Salmos, rëbaman:

Dios rëb loj dux Dad ree:

“Gurej da ladbeen,

43 xt gabecan xin rdxeꞌch ree lüj guiaꞌl.”

44 Yan, bal xiꞌn Davi na̱j Cristo. ¿Chexquiza zeel rëb Davi guin lojman Dad?

Ni rüjn ree mextr rajc ley

(Mt. 23:1‑36; Mr. 12:38‑40; Lc. 11:37‑54)

45 Laꞌtgaj cucaagdiajg gra ree bejn ni rëb Jesús, rëb loj ree xbejnman:

46 ―Gol gojp cudad con ree mextr rajc ley. Din ruladx reeman sa reeman gacw reeman lajd zagdxe ruladx tëë reeman gugajpdioz ree bejn laa reeman con respejt niz lunejz, abiꞌ lën ree yadoo ruladx reeman cwe reeman lod rbej ree bén zojbloj, ziangajc rüjn reeman lod ritaw reeman. 47 Racaꞌ tëë reeman lidx ree béngunaa bizëjb, abiꞌ din guiëb ree bejn guial benzaꞌc na̱j reeman, dád xchej rbejdx rniab reeman Dios. Per laa reeman mazri casti naroob yayal reeman.

<- San Lujc 19 San Lujc 21 ->