1 Chi cadëd Jesús tiblajt, baguiaaman tijb xin ad ranit loj diizd chi golix. 2 Dxel gunabdiidx ree xbejnman lojman, rëb reeman:

―Mextr, ¿chexc zeel ad ranit loj bén guin diizd chi golaman? ¿Por xtol ree xDadaman ya, o por xtol gajcaman?

3 Badxiꞌ Jesúsan, rëbaman:

―Najman zian ad por xtoltaman ad por xtol tëët ree xDadaman. Gojlaman zian din chi yayajcaman, guguiaa ree bejn xguialrniabee naroob Dios. 4 Yan, laꞌtgaj yuꞌ tiamp, rüjn naguiejn yaguieen ree ni na bén guxhaal naj, din ma yayaaloj tiamp ni achetri zajc gac. 5 Abiꞌ laꞌtgaj zaꞌn loj guidxliuj guie, naj na̱j bajl rusni bénguidxliuj.

6 Chi gulox guneeman zian, guxhieꞌ xhiejnman luyuj, abiꞌ beennëman laan bajn, persi gudëëbaman laan guiaaloj xin guin. 7 Abiꞌ rëbaman lojx:

―Bitiib lojl roꞌ tanc Siloé ―Siloé rën guiëb ni guxhaalaman.

Dxel bitiib lojx, abiꞌ chi bayejquix, ma rani lojx. 8 Dxel bén zojb ree gajxh lod zojbix con ree bén ragbee guial laax rniab carda, rëb reeman:

―¿Nid xin guinan rbej rniab carda ya?

9 Yuꞌ reeman rëb:

―Laaquixan.

Yuꞌza reeman rëb:

―Ad laatixan, rguienzix zian.

Per laax rëb:

―Najcan.

10 Dxel gunabdiidx reeman lojx, rëb reeman:

―¿Xhieza naag gojc bani lojl?

11 Badxiꞌxan, rëbix:

―Bén la Jesús been bajn, gudëëbaman guiaalon abiꞌ naman: “Wej bitiib lojl roꞌ tanc Siloé.” Dxel wan, chi gulox gudiib lon, max bani lon.

12 Abiꞌ rëb reeman lojx:

―¿Conzaman yan?

Zeel rëbix:

―Ad ragbeetan.

13 Loj hor zii binë reeman xin bayajc guiaaloj guin loj ree bénfarisew, 14 din dxej been Jesús bajn persi bayüjnman guiaaloj xin guin, dxej guin raziiladx ree bejn. 15 Dxel gunabdiidx ree bénfarisew guin lojx xhienaag guzuloj rani lojx. Abiꞌ rëbix loj reeman:

―Jesús gudëëb bajn guiaalon, dxel bitiib lon, yan ma ranin.

16 Yuꞌ ree bénfarisew guin rëb:

―Bén bayüjn guiaalojl ad xbejnt Diosan, din ad rajptaman respejt dxej raziiladx bejn.

Per yuꞌza reeman rëb:

―¿Xhienaag güünman milagr guie ree, bal najman béndol?

Garent garen rëb reeman. 17 Abiꞌ gunabdiidx reeman loj xin bayajc guin zatijb, rëb reeman:

―¿Laadx lüj xhie nal chu na̱j bén bayüjn guiaalojl?

Badxiꞌxan rëbix:

―Naj rni guial laaman na̱j bén rudëë xtiidx Dios loj ree bejn.

18 Per bén Israel guin ree ad rliladxt reeman, din ad banit lojx abiꞌ yan ma ranin, dxel gurejdx reeman xdadix con xniaax, 19 abiꞌ gunabdiidx reeman loj reeman, rëb reeman:

―¿Xin guien na̱j xiꞌndi ya, xin rëbidi ad ranit loj diizd gojlix? Yan, ¿xhienaag gojc zeel ma ruguiaax?

20 Badxiꞌ reeman laan rëb reeman:

―Dunujn rayagbee guial du xiꞌnanan, rayagbee tëën guial diizd chi golix ad ranit lojx. 21 Per ad rayagbeetan xhienaag gojc zeel rani lojx, ad rayagbee tëëtan chu bayüjn guiaalojx. Gol gunabdiidx lojx, ma najx xingol, ma zajc na laagajquix lojdi xhienaag gojc.

22 Rëb ree xdadix zian guial rdxeb reeman xguxtis ree bén Israel, din ma bayaꞌn reeman diidx, chutëëz bén guiëb guial Jesús na̱j Cristo, ad zatiëjbtri reeman chuꞌman lën yadoo. 23 Zianan zeel rëb reeman: “Gol gunabdiidx lojx, ma najx xingol.”

24 Dxel gurejdx reeman laax zatijb, abiꞌ rëb reeman:

―Laa Dios ruguiaa, guna diidxli, din dunujn rayagbee guial béndol na̱j bén bayüjn lüj.

25 Badxiꞌxan rëbix:

―Ad ragbeetan bal béndolan o ad béndoltan ya. Tijbzi ni ragbeen na̱j guial ad banit lon, abiꞌ yan ma ruguian.

26 Dxel gunabdiidx reeman lojx stijb, rëb reeman:

―¿Xhienaag beennëman lüj? ¿Xhienaag beenman persi rani lojl?

27 Badxiꞌxan rëbix:

―Ma rnin lojdi, abiꞌ lëjt ad rliladxtidi naj. ¿Chexc zeel rëndi ganin zatijb xhienaag beenman? ¿Wen në lëjt rën gac xbejnman ya?

28 Dxel gudilë reeman laax rëb reeman:

―Lüj bal najl xbejnman, saꞌn dunujn xbejn Moisejs nayajcan. 29 Din dunujn rayagbee Dios gunee Moisejs, per bén guin niꞌquid rayagbeetan ban zaman.

30 Badxiꞌxan rëbix:

―¡Xhiechalnin zeel ad ragbeetidi ban zaman! Guiáad naj por laaman ma rani lon. 31 Dunuj ree rayagbeechaaw guial ad ridxgaꞌt Dios xtiidx ree béndol, ridxgaꞌman xtiidx ree bén ruzoob xtiidxaman rüjn tëë reeman ziꞌc rënman. 32 Ad goct wacaagdiajg ree guial chuꞌ bén yayüjn loj bén ad ranit loj diizd gojlaman. 33 Yan, bal id por Dios zëëd bén guin, achetczi nileꞌ nüjnman.

34 Dxel rëb reeman lojx:

―Lüj gojl con dol, ¿wed lüj gulüü dunujn?

Abiꞌ babëë reeman laax yagaj.

35 Gogbee Jesús ni guzac xin bayüjnman, dxel chi badxaagaman laax, rëbaman lojx:

―¿Rliladxil bén guxhaal Dios loj guidxliuj ya?

36 Badxiꞌxan rëbix:

―Dad, guna chunin, din chililadxan laaman.

37 Dxel rëbaman lojx:

―Ma baguiaal laaman, laaman na̱j bén caneenël.

38 Abiꞌ bazuxib xin guin lojman, rëbix:

―Rliladxan lüj, Dad.

39 Zianz rëb Jesús:

―Bialan loj guidxliuj guie din günan guialguxtis, din por naj yani loj ree bén ad ranit loj, guiáad ree bén rani loj, ad zanit loj reeman.

40 Yuꞌ ree bénfarisew zaꞌnë laaman. Chi biguiejn reeman rëbaman zian, rëb reeman:

―¿Wen në dunujn ad ranit duloj ya?

41 Dxel rëb Jesús loj reeman:

―Bal id rani lojdi, achet dol rajpidi. Per guial nadi rani lojdi, rajpidi dol por ree xtolidi.

<- San Juan 8San Juan 10 ->