―Saulo, Saulo, ¿chexc zeel rzunalil naj?

5 Abiꞌ gunabdiidxaman rëbaman:

―¿Chu lüj, Dad?

Badxiꞌman laan rëbaman:

―Naj na̱j Jesús bén rzunalil. Per ganin lüj, lüj gajc rguiil xguialnaal ziꞌc rüjn tijb goꞌn rudxeguiaꞌ loj yag ni rulaagnë reeman laab.

6 Rnij Saulo guial tant bidxebaman, abiꞌ rëbaman:

―Dad, ¿xhie rënl günan?

Dxel rëb Dad Jesucrist lojman:

―Bixche, wej guiedx Damasco, ni na reeman ni rayal güünl.

7 Abiꞌ ree bén në Saulo dád bidxeb reeman guial biguiejn reeman chaꞌ bejn, per achutczi baguiaa reeman. 8 Chi bixcheman luyuj guin, baxhal lojman, ad rajctri ruguiaaman. Dxel gunaaz reeman yaaman bignë reeman laaman Damasco. 9 Ni guzuman choon dxej, ad rajct ruguiaaman, achetczi rawaman ache tëëtczi rëꞌman.

10 Damasco gure tijb bén rliladx Dad Jesucrist, brii lajman Ananías. Balüüloj Jesucrist lojman, rëbaman:

―¡Ananías!

Badxiꞌman laan rëbaman:

―Laa naj guie Dad.

11 Dxel rëb Jesucrist lojman:

―Bisu, wej call ni la nali. Chi guidxinl lidx Judas, gunabdiidx por tijb xin zëëd Tarso, lax Saulo. Din laax cabejdx canab naj, 12 abiꞌ ziꞌc rulüü caneꞌxhchaalix, baguiaax guyu tijb bén la Ananías guxhoob yaaman guijquix persi baguiaax stijb.

13 Chi biguien Ananías zian, dxel rëbaman:

―Dad, zien daꞌt ree bejn ruzaꞌt xin zii, në ree ni mal rüjnnëx bén rliladx ree lüj Jerusalén. 14 Yan zëëdix guie con xguialrniabee ree bixhioz rniabee ree bixhioz, din guiniaazix gra ree bén rliladx lüj.

15 Dxel rëb Jesucrist lojman:

―Wej, din naj gule laax din chiguiex da diidxan loj ree bén ad najt bén Israel, në loj ree rey, con nëgajc loj ree bén Israel. 16 Guiën lojx guial sagdiaj daꞌtix guial najx da bejnan.

17 Dxel zë Ananías lënü lod zaꞌ Saulo. Chi guyuman, guxhoob yaaman guijcaman, rëbaman:

―Bijch Saulo, Dad Jesús bén balüüloj lojl runejz lod zëëdil, laaman guxhaal naj din yaguiaal, chuꞌ tëë xSprijt Dios luxdool.

18 Loj hor gajc ziꞌc rulüü yuꞌ xhie biquied guiaalojman abiꞌ baguiaaman stijb. Dxel guzuliman gurobnijsaman, 19 gudaw tëëman persi bayuman gojl. Dxel guzujman Damasco tioꞌp choon dxej con ree bén rliladx Jesucrist.

20 Dxel guzuloj gunee Saulo xtiidx Dios lën ree yadoo, rëbaman guial Jesucrist na̱j Xiꞌn Dios. 21 Graczi ree bén biguien ni rëbaman badxa loj reeman abiꞌ rëb reeman:

―¿Nid bén guien rzunal bén rliladx ree Jesucrist Jerusalén ya? ¿Nid laagajcaman zëëd guie ya, din guiniaazaman bén rliladx ree Jesucrist chignë tëëman laa reeman loj ree bixhioz rniabee ree bixhioz?

22 Per Saulo guixie guixie mazri cariiman guialrdxeb rnieeman xtiidx Dios, rulüüman guial Jesús na̱j Cristo, din yabëëman bejn ree loj dol. Xt ragdxa ree bén Israel zojb ree Damasco chi rucaagdiajg reeman ni rëbaman.

23 Ad xchejt gojc, bayaꞌn ree bén Israel diidx din nugüjt reeman Saulo, 24 per laa gogbee gajcaman ni rën reeman güün reeman. Dxej guiaal rbëz reeman laaman roꞌ ree port ni rarii roꞌ ciuda guin din nugüjt reeman laaman. 25 Per ree bén rliladx Jesucrist, guxhin badxeꞌ reeman laaman lën dxüm naroob, abiꞌ gulet reeman laaman niz xijch zeꞌ nusiaaw ciuda guin, zian baxüünman Damasco.

26 Chi badxin Saulo Jerusalén, guyënman nuchajgaman bén rliladx ree Jesucrist, per graczi reeman bidxeb laaman guial ad rliladxt reeman nëman ma rliladx Jesucrist. 27 Dxel binë Bernabé laaman loj ree apóstoles guin, bagojnman guial baguiaa Saulo dux Dad ree Jesucrist, guneenë tëëman laaman chi zëman Damasco, bagojn tëëman guial Damasco gunee Saulo xtiidx Jesucrist sin guialrdxeb. 28 Zian bayaꞌn Saulo Jerusalén abiꞌ nayuman laa reeman. 29 Ad rdxebtaman ruzaꞌtaman Dad Jesús, abiꞌ xt gudijldiidxnëman bén Israel rniee ree diidx grieg, per guyën reeman nugüjt reeman laaman. 30 Chi gogbee ree bén rliladx Jesucrist zian, binë reeman laaman guiedx Cesarea. Yagaj baxhaal reeman laaman guiedx Tarso.

31 Dxel babedxe luxdoo ree bén rliladx Jesucrist, bén zojb ree niz Judea në niz Galilea nëtëë niz Samaria, chigagaj beenbee reeman mazri xhienaag na̱j xnejz Dios, bazoob tëë reeman xtiidxaman, abiꞌ cayagnë xSprijt Dios cayajcxhiej reeman.

32 Chi biza Bëd bitixlojman bén rliladx ree Jesucrist, dxel wej gajcaman bitixlojman bén rliladx ree Jesucrist guiedx Lida. 33 Ni bidxaaglojman tijb xinguiaaw la Eneas. Ma gojc xhujn ijz nagaꞌx, ragxuux, ad rajct rzax. 34 Abiꞌ rëb Bëd lojx:

―Eneas, ma bayüjn Jesucrist lüj. Bixche, bales ni goꞌtil loj.

Loj hor zii gajc bixchex. 35 Chi baguiaa gra ree bén zojb guiedx Lida në ree bén zojb niz Sarón guial ma bayajc Eneas, dxel në reeman bililadx Jesucrist.

36 Loj tiamp zii guyu tijb béngunaa rliladx Jesucrist luguiedx Jope, laman Tabita, diidx grieg laman Dorcas. Laaman been ni zaꞌc ree, been tëëman yudar bénprob ree. 37 Lën ree dxej zii gogxuu Dorcas abiꞌ güjtaman. Chi gulox bagajz reeman laaman, dxel bitixh reeman laaman lënü ladya. 38 Abiꞌ gajxh guiedx Jope rayaꞌn guiedx Lida lod zaꞌ Bëd. Chi gogbee ree bén rliladx Jesucrist guial zaꞌman ni, guxhaal reeman tioꞌp ree xinguiaaw bisajc reex Bëd liaadx, rëb reex:

―Been wen yoꞌ ree Jope yan gajczi.

39 Laa zinë gajcaman laa reex. Chi bidxinman, binë reeman laaman lënü lod nagaꞌ xcuerp Dorcas. Ni rigaꞌ zien ree béngunaa bizëjb roon reeman, abiꞌ bibig reeman loj Bëd culüü reeman gra lajd ni been Dorcas chi sta nabanman. 40 Dxel gunabee Bëd barii gra reeman, abiꞌ bazuxibaman gurejdx gunabaman Dios. Dxel baguiaaman bengüt guin, rëbaman:

―¡Tabita, bixche!

Laa guxhal gajc lojman. Chi baguiaaman Bëd, gureliman, 41 dxel gunaaz Bëd yaaman persi guzuliman. Abiꞌ gurejdxaman bén rliladx ree Jesucrist con ree bén bizëjb guin, persi baguiaa reeman guial ma baban Dorcas. 42 Guidibczi guiedx Jope gogbee reeman ni goc, abiꞌ zien daꞌt reeman bililadx Jesucrist por zian. 43 Guiáad Bëd bayaꞌnman mazri dxej luguiedx guin, lidx Simón bén rüjnchaaw guid.

<- Ni been ree apóstoles 8Ni been ree apóstoles 10 ->