1 Yalojdoo ni rnin lojdi na̱j guial cwedx guiniabidi Dios, cwedx guiniabidi laaman por gra ree bénguidxliuj, gudëëd tëëdi quixtëë lojman. 2 Rayal yarejdx yanaab ree Dios por ree rey në por gra ree guxtis loj guidxliuj din chileꞌ yabajn ree zagdxe gusnuu tëe yabajn ree ziꞌc rën Dios. 3 Din laan na̱j ni zagdxe ni rayuladx tëë dux Dad ree Dios, bén rüjn perdon dux tol ree, 4 bén rën guial gra bejn gac perdon guidxin tëë dxej gagbee bejn xhie rën guiëb xtiidxliman. 5 Din tijbzi laaman na̱j Dios, abiꞌ por tijbzi Jesucrist zileꞌ yayaꞌp ree nejz par loj Dios guial biꞌtaman loj guidxliuj ziꞌcgajc tijb bénguidxliuj. 6 Güjtaman loj crüjz persi gudijxaman por xtol gra ree bénguidxliuj, zian naj ni balüü Dios bejn chi bidxin dxej bacaabeeman gac zian. 7 Zeel bacaabeeman naj gacan xi apóstol Jesucrist din gatiechan xtiidxaman, në par gusidan bén ad najt ree bén Israel conin na̱j diidxli, xhie tëë naag chililadx reeman Jesucrist, walin ad rusquieetan.

8 Yan rënan guial guidibczi cwedx guiniab ree xinguiaaw Dios, guilies yaa reex con guidib luxdoo reex sin dol, sin guialrdxeꞌch në sin wadijl. 9 Rën tëën guial ree béngunaa su reeman ziꞌc rayal, ad tëdlaj suchaaw reeman con or, në ree perl në ree vistid zagdxe o guial tëdlaj güünchaaw guidxguijc reeman. 10 Din mazri zagdxe güün reeman ni na̱j zagdxe, ziꞌc rayal güün ree béngunaa ni ma zinal xnejz Dios. 11 Abiꞌ rayal gucaagdiajgzi reeman ache guiniee reeman chi rulüü ree xinguiaaw xtiidx Dios. 12 Din ad zatiëëbtan guial gulüü tijb béngunaa bejn ree chi radxaag lasaꞌ reeman par gucaagdiajg reeman xtiidx Dios, ad rayalt nabee béngunaa xinguiaaw, rayal gucaagdiajgzaman. 13 Din Dios, yaloj Adán beenchaawaman, dxelri Eva. 14 Din ad Adánt basquiee reeman, yaloj Eva basquiee reeman, abiꞌ por guialrusquiee guin beenman dol. 15 Per zajc gac béngunaa perdon, bal güün xchiinman zagdxe guial najman na, bal gusnuu chililadxaman Dios, guiënman bejn ree guiban tëëman xnejz.

<- Guiꞌch yaloj par Timoteo 1Guiꞌch yaloj par Timoteo 3 ->