9 Níʼirö gunnë́ʼ: “Ilaʼbödxi nupa taʼnná bëʼ luyú yödzölió, en gulún le ruáʼ döʼ tsözxö́n len légaquiëʼ, en buluʼzíʼ xibé le nequi quégaquiëʼ. Ilaʼbödxëʼ, en ilaʼbödxi yéchëʼë cateʼ ilaʼléʼenëʼ dzön que yödzö zxön naʼ régui. 10 Ziʼtuʼ zíʼtuʼsö ilaʼcuʼë tuʼ iládxinëʼ ca gaca xíguiaʼ le gaca que yödzö naʼ, ateʼ ilaʼnnë́ʼ: ¡Bicaʼ bayechiʼ Babilonia, yödzö zxön ni, le gúcadaʼ lo! ¡Tu dzasö guca xíguiaʼ que!”
11 Níʼirö gunnë́ʼ: “Ilaʼbödxëʼ caʼ bönniʼ toʼo tutiʼ nacuʼë yödzölió, en ilaʼbödxi yéchëʼë niʼa que yödzö naʼ tuʼ cabirö soa nu gaʼu bi ilútiʼë niʼ.” 12 Cúnturö nu gaʼu niʼ:
Le néquiguequini oro, en plata,
en yuguʼ guiö́j zacaʼ, en yuguʼ bugá,
en yuguʼ lariʼ nazácaʼdaʼ, en lariʼ xiná chul-la,
en lariʼ dxíʼadoʼ, en lariʼ xiná guíʼidoʼos,
en yuguʼ yaga riláʼ zxixi,
en le néquiguequini dxita nazácaʼdaʼ,
en le néquiguequini yaga nazácaʼdaʼ,
en le néquiguequini guíë cobre,
en le néquiguequini guíë,
en le néquiguequini guiö́j jara.
13 Cúnturö nu gaʼu niʼ:
Canel, en yuguʼ le riláʼ zxixi, en yalaj,
en le riláʼ zxixi que mirra, en que yöj olíbano,
en xisi uva nál-la, en le naca za,
en yiözja dxíʼadoʼ, en zxoaʼ xtila,
en yuguʼ búrrodoʼ, en yuguʼ böʼcuʼ zxilaʼ,
en yuguʼ böaʼ, en yuguʼ carreta,
en yuguʼ bönniʼ huen dxin, en iaʼbal-la bönachi.
14 Nupa naʼ toʼo tutiʼ ilë́ légaquiëʼ, ilaʼnná:
Nadúagaca le guzë́ ládxiʼliʼ.
Chigudödi quégaca yöl-laʼ tsahuiʼ,
en le nácagaca lachi queë́liʼ,
ateʼ bítiʼrö idzö́liliʼ léguequi.
15 Níʼirö gunnë́ʼ: “Ilaʼbödxëʼ bönniʼ toʼo tutiʼ naʼ, tuʼ gutaʼ quégaquiëʼ yöl-laʼ tsahuiʼ tuʼ gulútiʼë lu yödzö naʼ, ateʼ ilaʼcuʼë ziʼtuʼ zíʼtuʼsö tuʼ iládxinëʼ ca gaca xíguiaʼ le gaca que yödzö naʼ, en ilaʼbödxi yéchëʼë.” 16 Ilaʼnnë́ʼ:
¡Bicaʼ bayechiʼ yödzö ni guca zxön!
Guca ca tu nigula nácunu lariʼ nazácaʼdaʼ,
en lariʼ xiná chul-la, en lariʼ xiná guíʼidoʼos,
en nazíʼi biquitaj queë́nu le néquiguequini oro
en le néquiguequini guiö́j zacaʼ, en yuguʼ bugá.
17 Tu dzasö guniti yöl-laʼ tsahuiʼ que yödzö ni.
Níʼirö gunnë́ʼ: “Yúguʼtë bönniʼ xan barco, en nupa nacuáʼ lë́ʼegaca barco naʼ, en nupa tuʼsáʼ yuguʼ barco naʼ, en nupa tun dxin lu nísadoʼ, ilaʼcuʼë ziʼtuʼ zíʼtuʼsö.” 18 Cateʼ ilaʼléʼenëʼ dzön que yödzö naʼ régui, ilaʼbödxëʼ, en ilaʼnnë́ʼ: “¿Bízxilö yödzö guca zxön ca naca yödzö ni?”
19 Níʼirö gunnë́ʼ:
Uluʼdxíëʼ bëchtö ícjagaquiëʼ.
Ilaʼbödxëʼ, en ilaʼbödxi yechë́ʼë, ilaʼnnë́ʼ.
¡Bicaʼ bayechiʼ yödzö ni guca zxön!
Yöl-laʼ tsahuiʼ que yödzö ni ben ga gutaʼ yöl-laʼ tsahuiʼ
quégaca yúguʼtë nupa nácagaca xan barco lu nísadoʼ.
Tu dzasö guniti yödzö ni.
20 Buliʼdzeja ca gaca que yödzö ni, libíʼiliʼ zóaliʼ yehuaʼ yubá,
encaʼ libíʼiliʼ néquiliʼ queëʼ Dios,
libíʼiliʼ, bönniʼ gubáz queëʼ,
en libíʼiliʼ, bönniʼ ruíʼiliʼ didzaʼ uláz queëʼ.
Buliʼdzeja, tuʼ chiguchúguiëʼ Dios que yödzö ni
niʼa que bi gulún queë́liʼ nupa nacuáʼ lu yödzö ni.
21 Níʼirö tuëʼ gubáz láʼayi nál-la buchisëʼ tu guiö́j zxön le naca ca tu guichi riyëtu, ateʼ gurúʼunëʼ le lu nísadoʼ, gunnë́ʼ:
Laʼ canísö gaca que yödzö Babilonia,
tuʼ iguínnaj yödzö naʼ guca lo,
ateʼ bítiʼrö nu udzöli le.
22 Bítiʼrö nu yöni lu yödzö naʼ nupa taʼguínni lëʼe le rul-la,
en calëga nupa tuʼcödxi gui
en calëga nupa tuʼcödxi lúzubaʼ böaʼ bëdxi.
Bítiʼrö udzöli bönniʼ huen dxin niʼ,
en bítiʼrö yöni bö rigúʼu le rutu niʼ.
23 Bítiʼrö uzeníʼ nitú guíʼ lu yödzö naʼ,
en bitiʼ yöni chiʼë bönniʼ rutsaga nëʼë niʼ,
en calëga chíʼibiʼ biʼi nigula rutsaga náʼabiʼ.
Caní gaca sal-laʼ nácaliʼ lo, libíʼiliʼ ráʼuliʼ, en rútiʼliʼ lu yödzö ni,
en guzxíʼ yéʼeliʼ bönachi idútë yödzölió len yöl-laʼ gudzáʼ queë́liʼ.
24 Lu yödzö ni gulaj xichö́ngaquiëʼ bönniʼ guluʼë didzaʼ uláz queëʼ Dios,
