MARCOS 2

Wneseyaken Jesus te mgyeey ne noze waknet led

(Mt. 9:1-8; Lc. 5:17-26)

1 Chene che wluzh txup tson gbiz, wberee Jesus wdee ke Ne lenlgyëz-Capernaum. Ne waknan mén ne le Ne che ke ka Capernaum, 2 kesentyent ndal mén wdop lo Ne, axtegue rgadet ledne kwiin men; orguin wzëët Ne xdiiz Dëdyuzh lo men. 3 Orke guin wdxiin tap mén nga ledne zu Ne, wdxinneey men te mgyeey ne noze waknet led. 4 Per kom rakdet ydxiin men axtegue lo Ne por tant ndal mén ndxin lenyuu ledne zu Ne, orguin wlis men tebëd tezh led yuu guin; lex nes guin wlit men mengyiz guin ydebxloon men. 5 Ne wii Ne ne rlaleedx yra mén guin Ne, re Ne lo mengyiz guin:

―Zhiin, le xdol de che wak perdon.

6 Orguin nuu lextoo tebëd maxter ley ne zob nga: 7 “¿Penak rnii ménree zeree? Diznyaan rnii men por Dëdyuzh, porke rut rundet gan gun perdon xdol mén, sinke nonchee Dëdyuzh run gan run perdon xdol mén.” 8 Per kom nan Jesus gan pe nuu lextoo men, lex re Ne lo men:

―¿Penak rlebleedx de zegwa? 9 ¿Pe mazre mbëëdee gue noo lo mengyiz: “Le xdol de che wak perdon”, u ne gue noo lo men: “Gutsaxee gulis xloon de, gugya”? 10 Orree kwii de yra de gante ne Men ne wdxiid wak Mén rap men poder nee gyëzlyuree por ne gun men perdon xdol mén.

Lex re Ne lo mengyiz guin:

11 ―Yna noo lo de, gutsaxee gulis xloon de, gugya ruxyuu de.

12 Orgueguin waxee mén guin, wlis men xloon men, wruu men nga nes lo yra mén. Por neguin wzee wzak yrandxee mén, lex wzelo men wzaknzoon men Dëdyuzh, re men:

―Nunk gardet kwii be gak neree ne wak orree.

Wbëz Jesus Leví

(Mt. 9:9-13; Lc. 5:27-32)

13 Zhich guin wruu Jesus wa Ne runis ste. Lex ra yrandxee mén lo Ne, rneluu Ne men. 14 Ne za Ne, wii Ne zob Leví xpee Alfeo ledne rgoob Leví zeg impwest, lex re Ne lo Leví:

―Gutanal noo.

Orguin wzuli Leví zanal Leví Ne.

15 Te chene zob Jesus ruxyuu Leví yra Ne xpén Ne, zob Ne lo mezh zobyu Ne yra Ne tebëd men ne rgoob zeg impwest no le stebëd mendol, porke che kesentyent ndal men ranal Ne ledne ratee Ne. 16 Ne wii maxter ley yra men men ne nak farisew ne zobyu Ne yra Ne mén guin, re men lo xpén Ne:

―¿Penak ru xmaxter de yra men men ne rgoob zeg impwest no le yra men mendol?

17 Ne won Jesus ne re men zenga, re Ne lo men:

―Men ne ngyëël, rkyiinden men doctor, sinke men ne rzhuun, men guin rkyiinen doctor. Noo zëëdet noo zëdye noo menwen, sinke le noo zëdye mendol.

Wnabdiiz mén lo Jesus gan penak rkwandet xpén Ne

(Mt. 9:14-17; Lc. 5:33-39)

18 Te chene rkwan xpén Xwa no le men ne nak farisew por ne saknon men Dëdyuzh, wa tebëd mén lo Jesus, wnabdiiz men lo Ne, re men:

―¿Penak rkwan xpén Xwa no rkwan ke men ne nak farisew, le xpén de rkwandet men?

19 Wke Jesus, re Ne:

―Lo te dooy, ¿peguin zak gudet xemyooz nobye myentras ne benak zu nobye lo men? Belne benak zu nobye lo men, gakdet ne gudet men. 20 Per sdxiin dxe ne ybetxee nobye lo men; cheguin si ykwan men.

21 ’Rut rkadaadet tebla lërkweb led te lëryuux, porke rdop lërkweb, lex rtxëzo lëryuux, mazre raknzhoodee ledne wrëz. 22 Ni rut rgaadet binkweb lengyedyuux, porke belne ylaa men zenga, stxëz binkweb gyedyuux; nigle xiin bin, nigle xiin gyed. Por neguin binkweb leen ke gyedkweb taa we.

Wkyiits xpén Jesus zhobxtil dxe ne rne men-Israel

(Mt. 12:1-8; Lc. 6:1-5)

23 Te dxe ne rne men-Israel, wdee Jesus ledne nuu zhobxtil yra Ne xpén Ne. Lex za za xpén Ne rkyiits men xebzun zhobxtil. 24 Lex re men ne nak farisew lo Ne:

―¿Penak rlaa xpén de ne ndux ylaa be dxe ne rne be?

25 Wke Ne re Ne:

―¿Pe gardet gool de lo xgyiich Dëdyuzh ledne re ne wlaa David chene wlaanen zhaa ne wakyët ne nyu zhaa yra zhaa xkompanyer zhaa? 26 Wdee zhaa lenxeydoo Dëdyuzh chene nak Abiatar fxuz ne mazre nondee, wgoob zhaa gyëtxtil ne nakleey wu zhaa yra zhaa xkompanyer zhaa, no ndux gu kwaskyer mén gyëtxtil guin, nonchee fxuz rak ru we.

27 No re Ne:

―Dxe ne rne be, por mén wyano, let por laadeto wyan mén. 28 Por neguin Men ne wdxiid wak Mén rak ke rnebééy men no dxe ne rne be.

<- MARCOS 1 MARCOS 3 ->