1 Chene wdesu dxe ne rne men-Israel ne wyenii lyu dxe ne rzelo xman, wa Mli Matlen wii rubaa yrup men ste Mli. 2 Tebegue wzelo kesentyent wni lyu, porke wruu te xangel Dëdyuzh gyeybaa, wdxiin ne wgyitxee ne gye ne zemzëë rubaa, lex wzob ne ledo. 3 Rkabtsa ne zegnak chene reep nis, le xab ne ngyichdoo. 4 Ne wii yra soldad angel guin, noze rzhiz men tant rdxe men, noze wak men zegnak mengut. 5 Lex re ne lo yrup wnaa guin:
―Ydxedet de. Che nan noo ne Jesus rye de, men ne wkaa lo kruz. 6 Yëtre men nee; le men che wban zegne re men.
No re angel:
―Gutaa kwii de ledne wguu mén men gante. 7 Gutsa noze rzhoon de, gue de lo yra xpén men ne le men che wban. Sanergue men lo yra xpén men tsa men Galilea; nga kwii men men. Nonchee neree rap noo degne yna noo lo de.
8 Orgueguin wruu yrup wnaa guin rubaa, te rdxe men te rzhiilen men; noze rzhoon men zaluu men diiz lo yra xpén Jesus. 9 Ne za men nëz, wlalo Jesus lo men, wgabtyuzh Ne men. Wbig men wzuzhib men lo Ne, wgyeedx men nii Ne. 10 Lex re Ne lo men:
―Ydxedet de; gutsa gue de lo yra xpén noo tsa men Galilea; nga kwii men noo.
Ne wuu soldad diiz
11 Myentras ne le yrup wnaa guin za, le tebëd soldad ne ndxinnap ruxbaa Jesus wague waluu diiz lo yra fxuz ne rnebééy lo yra fxuz yra neguin ne wak. 12 Zhich guin wa fxuz ne rnebééy lo yra fxuz lo yra men ne rnebééy lo men-Israel chen gyan men diiz gan pezee ylaa men; lex wdee men ndal med lo soldad guin, 13 re men:
―Zeree gue de: “Gyëël or ne nexguees noo, wdxiid xpén men weey men men.” 14 Belne gaknan Pilato neree, noo yra noo ynii lo men chen bet ylaadet men de.
15 Wnëëz soldad med guin, lex wzëët soldad yra diiz guin zegne wkyeen yra mén guin soldad. Laa diiz guin nak ne wrëëts lad men-Israel, axtegue naaree benak rakzëëto.
Logne wkyeen Jesus ylaa yra xpén Ne
(Mr. 16:14-18; Lc. 24:36-49; Jn. 20:19-23)
16 Lex wa yra chibteb xpén Jesus lo lyu ne la Galilea, xtoo gyeey ne re Ne lo men. 17 Chene wii men Ne, wzuzhib men lo Ne, mase nuu men legue nutxup lextoo. 18 Lex wbig Jesus lo men yra men, re Ne:
―Dëdyuzh wniiz poder lo noo ne ynebééy noo gyeybaa no le gyëzlyu. 19 Por neguin gutsa ydendxee gyëzlyu, yneluu de mén chen gak men xpén noo no ytxobnis de men por la Dëdyuzh no le por la XPee Ne no le por Espíritu Sant. 20 No yneluu de men ylaa men yra ne wkyeen noo de yra de. Lex noo su kon laa de yzaandxee dxe axtegue ne nitlo gyëzlyu.
<- MATEO 27
