1 Cheguin ke nuu te mén ne la Laser, rzhuun men, men-Betania nak men yra men bzaan men, Mli no le Mart. 2 Laa Mliree ne nak bzaan Laser ne rzhuun nak ne wdxiib perfum led nii Jesus, lex wkwiidx meno kon gyitsxtoo men. 3 Yrubël men wxaal diiz lo Jesus, re men:

―Dechey, le xmig de rzhuun.

4 Chene won Jesuso, re Ne:

―Gyelgyiz gwa ne rzak men, nakdeto ne guet men, sinke le we nak ne por laa we yrunyoo xgyelenzoon Dëdyuzh no yrunyoo xgyelenzoon XPee Ne.

5 Mase kesentyent ryaan Jesus Mart yrubël men no le Laser bzaan men, 6 no chene won Ne diiz ne rzhuun Laser, wkaar Ne stxup gbiz nga ledne ka Ne. 7 Zhich guin re Ne lo yra xpén Ne:

―Yoo tsa be Judea ste.

8 Lex re yra xpén Ne lo Ne:

―Maxter, naandxegueree nga wlaan yra men-Israel ngugye men de nesro; ¿no le de rlaangue tsa ste?

9 Orguin re Ne lo men:

―¿Pe let chibtxupdet or rak te dxe? Men ne rzaa yedxe bat rakadet nii men, porke nuu bnii ne rzenii gyëzlyu; 10 per le men ne rzaa gyëël, noze ledne rakatee nii men, porke nyeniidet.

11 Wluzhse re Ne zenga, lex re Ne:

―Le xmig be Laser che waguees, per orree tsaloo noo mkaal lo men.

12 Lex re yra xpén Ne:

―Dechey, belne che waguees men, nuu beey syaken men.

13 Per diiz guin ne re Ne rna we ne che wet Laser, le yra xpén Ne nuu lextoo pazer noze waguees Laser. 14 Orguin re Ne:

―Nligue yna noo lo de, che wet Laser. 15 Per rzhiilen noo ne yët noo no, porke zenga wendee por laa de yra de, chen ylaleedx de noo. Yoo tsa be wii lo men gan.

16 Lex re Tmazh ne rnii mén Mzhoz lo stebëd xpén Ne:

―Yoo tsa be no be, chen guet be yra be Jesus.

17 Chene wdxiin Jesus Betania, che wluzh tap gbiz wgueedx Laser. 18 Guex Jerusalén nak Betania, zeg tsonegue kilometro ryano. 19 No ndal men-Israel wa wanino Mart yrup Mart Mli por ne wet Laser bzaan men. 20 Chene waknan Mart ne le Jesus che mer ydxiin, wruu Mart watsëlnëz Mart Jesus, le Mli wyan ruyuu. 21 Lex re Mart lo Jesus:

―Dechey, belne nako ne ka de nee, nyetet bzaan noo. 22 Per che nan noo ne mase orree slaa Dëdyuzh yrandxee ne ynab de lo Ne.

23 Wke Jesus, re Jesus:

―Sban bzaan de.

24 Orguin re Mart:

―Che nan noo ne sban men chene yban mengut chene che lultim dxe.

25 Lex re Jesus:

―Noo nak men ne rneban mengut no noo ke nak men ne rseleedx gyelembán lo mén. Mén ne rlaleedx noo, mase guet men, per sbán ke men. 26 Yrandxee mén ne mbán, belne rlaleedx men noo, nunk guetet men. ¿Pe rlaleedx de neree?

27 Wke Mart, re Mart:

―Rlaleedx noo we Dechey; rlaleedx noo ne laa de nak Crist ne rap degne chiid gyëzlyu, laa de nak XPee Dëdyuzh.

28 Wluzh re Mart zeree lo Jesus, lex wa men waluu men diiz lo Mli bël men, ngueedxendxee re men lo Mli:

―Le Maxter che wlenza, laa de rbëz Maxter.

29 Zegne won Mli zenga, wzuligue men za men lo Jesus. 30 Gardet tee Jesus lenlgyëz, benak zu Ne ledne wtsëlo Mart Ne. 31 Chene wii yra men-Israel ne ndxinnino Mli ruxyuu Mli ne noze ryob rdxiintee za Mli, wrunal men Mli; nuu lextoo men pazer ruxbaa bzaan Mli za Mli goon Mli.

32 Chene wdxiin Mli ledne zu Jesus, wzuzhib Mli lo Ne, re men:

―Dechey, belne nako ne ka de nee, nyetet bzaan noo.

33 Ne wii Jesus ne roon Mli no ne roon yra men-Israel ne zanal Mli, axtegue nandet Ne pe wuu lextoo Ne, wdenles lextoo Ne; 34 lex wnabdiiz Ne lo men, re Ne:

―¿Pazh wguu de men?

Orguin re men:

―Dechey, gutaa tsa be wii gante.

35 Woonegue Ne. 36 Lex re men-Israel:

―Gukwii gante pezee ryaan men Laser.

37 Per le gwrol men re:

―Ménree nga wlaa ne wyenii bzalo menngwlëë, ¿pe bet wakdet nlaa men chen nyetet Laser?

38 Kesentyent wdenles lextoo Jesus ste, wbig Jesus ruxbaa Laser; te bluu nako, te gye zemzëë we. 39 Lex re Jesus:

―Gugyitxee gye gwa rubaa.

Orguin re Mart bzaan mengut guin:

―Dechey, pazer che ndxiin rree men, porke che wluzh tap gbiz ne wet men.

40 Wke Jesus, re Jesus:

―¿Pe let che nadet noo lo de ne belne rlaleedx de noo, swii de xgyelenzoon Dëdyuzh?

41 Orguin wgyitxee men gye guin. Lex wlis lo Jesus wii Ne gyeybaa, re Ne:

―Dëde, dexkyizhtee de ne wkagyedyag de xdiiz noo. 42 Che nan noo ne syemper rkagyedyag de xdiiz noo, per na noo we por yra ménree ne ndxin nee, chen ylaleedx men ne laa de wxaal noo.

43 Chene wluzh re Ne zenga, wkarëz Ne, re Ne:

―¡Laser, guruu wa!

44 Orguin wruu Laser, noze nrëldíp lër nii nyatee men no le lo men. Lex re Ne lo yra mén guin:

―Guchil lër gwa led men, gudee si gya men.

―¿Pezee ylaa be? Porke ndal gyelmilaguer kalaa mén gwa. 48 Belne ydeer be si ylaa men zegwa, yrandxee mén ylaleedx men, no schiid xtis-Roma yluzh men xeydoo XDëdyuzh be no yluzh men xnacion be.

49 Lad ke men yra men nuu te men ne la Caifás ne nak fxuz ne mazre nondee iz guin, lex re fxuz guin:

―Laa de yra de bet nandet de, 50 ni ryenden de ne wendee guet tebegue mén por yra men-Israel ke ne luzh yrandxee men-Israel.

51 Per let nozdet lextoo Caifás wzaa ne re men zenga, sinke, kom laa men nak fxuz ne mazre nondee iz guin, por neguin wguu Dëdyuzh diiz guin lextoo men ne re men ne guet Jesus por yrandxee men-Israel, 52 no let nozdet por yra men-Israel, sinke no por ne gaktes yra men ne nak xpén Dëdyuzh, yra men men ne nuu ydendxee gyëzlyu. 53 Kwlotee cheguin wyan xtis-Israel diiz ne yket men Jesus.

54 Por neguin wkanyoodetre Jesus lad men-Israel, lex wruu Ne nga za Ne te gyëz ne la Efraín ne nak guex denbidx. Nga wkaa Ne yra Ne xpén Ne.

55 Kom che wyob pask lni ne rlaa men-Israel, ndal mén ne nuu yrandxee gyëz ra Jerusalén chen ylaa men zegnak xkoxtumber men ne rakndaa men nes lo Dëdyuzh antes ne ydxiin pask. 56 Zad wkayetee men Jesus; le chene nuu men lenxeydoo Dëdyuzh, wnabdizlsaa men, re men:

―¿Pe na de? ¿Pe schiid men lni u chiidet men?

57 Le yra fxuz ne rnebééy lo yra fxuz no le yra men ne nak farisew che wnebééy ne belne nuu mén nan gan gozh Jesus, gue meno lo men chen ynëëz men Ne sano men Ne.

<- JUAN 10JUAN 12 ->