Apocalipsis 5

Lee Mbak zhiil chaan Diox mxaal lo yeets

1 Tsa mwiin Zha Nabee, lee zha ndob ta nabee zha, ne yaa ban zha nzo thib yeets kuu naduz, ne nke letr loy ne ditse, ne nke gaz sey ditse, tsa yent cho xaale. 2 Ne mwiin thib mandad chaan Diox kuu kwathoz ney kuu dib gan nzhab:

―¿Cho ndoblo chat re sey ne xaal lo yeets?

3 Per neeka yibaa, neeka lo yezlyu ne neeka xann yezlyu, yent neeka thib zha kuu ndoblo xaal lo yeets, neeka yent cho ndoblo wiiy. 4 Tsa lee na kwathoz mbinn na, tak mzalt neeka thib zha kuu ndoblo xaal lo yeets ne wii loy. 5 Tsa lee thib re zha gola ne lon:

―Gonnt raa lu, tak lee mbeez kuu ndyaad lo raz chaan Judá, ne ndyaad lo raz chaan rey David nak kuu mtsow gan. Lee zha nak kuu tak chat re gaz sey ne xaal lo yeets.

6 Tsa mwiin ndrol ta ndob Zha Nabee, ne ndrol lo re maa nabana ne ndrol lo re zha gola, tya ndo thib Mbak zhiil kuu na taxal thib maa kuu mbeth zha. Ne ndob gaz kach maa ne gaz ngutlo maa; ne lee re ngutlo maa nak gaz Mbi Nayon chaan Diox, kuu mtaal Diox dib naxta lo yezlyu. 7 Ne lee Mbak zhiil ngwa ta ndob Zha Nabee ne mzhen yeets kuu naduza, kuu nzo ya ban Zha Nabee. 8 Ne leettsa mzhen maa yeets, ora lee re thap maa nabana ne re galbthap zha gola mtobxub lo Mbak zhiil. Ne kadta thib re zha gola nap zha thibga arp zha kuu nzhool zha, noga nap zha thibga btsi zha kuu or kuu tseta nzo straak, re kona nak re kuu mndediz re zha kuu nali mndo lo Diox. 9 Ne nzhool zha kant kub kuu tenzhee nzhab:

Lu nak zha kuu ndoblo ten yeets ne chat re seye;

tak lu nguth lo kruz, ne kon rena mzhiiʼa re men, tsa gak re men zha Diox,

re men reta raz, re men kuu ndediz zhaapaa zhaapaa diiz, re men kuu nzo reta yez bzhizh ne re yez naro.

10 Ne mtsowa gak re zha rey ne ngwleyy lo Diox,

tsa nabee re zha lo yezlyu.

11 Mwiin ne mbin na bos chaan naroob mandad chaan Diox kuu nzi re ladta lo Diox, ta ndob Diox nabee Diox ne lo re maa nabana ne lo re zha gola. Kwathoz miyon mandad nzi ne yent cho gak tsaal kwent re mandada, 12 ne dib gan re mandada mbez:

Lee Mbak zhiil kuu mbeth re men lo kruz.

Lee maa ndoblo kayaa yalnabee ne reta kuu nataak,

yalnzhaak ne yalney,

noga ndoblo tsow nataak reta men maa, ne ni wen reta men maa, ne gol reta men lo maa.

13 Ne noga mbin na lee reta kuu mdexkwaa Diox, re kuu nzo yibaa, reta kuu nzo lo yezlyu, reta kuu nzo xann yezlyu ne re kuu nzo leen nitdoo, retay nzhab:

¡Lee Zha Nabee kuu ndob nabee, ne Mbak zhiil,

ndoblo gol reta men lo zha, ne tsow nataak reta men zha, ne wen tediz re men zha,

lee zha ndoblo kayaa xni ne yalney, nal ne thitanax!

14 Ne lee re thap maa nabana nzhab:

―¡Tata gake!

Ne lee re galbthap zha gola mtobxub ne mbil lo Mbak zhiil.

<- Apocalipsis 4 Apocalipsis 6 ->