Jesús mtaal re zha kuu ngeteed lo Jesús yataa kwent xkiiz Diox
(Mt. 10:5‑15; Mr. 6:7‑13)
1 Tsa mrez Jesús re tsiibchop zha kuu ngeteed lo Jesús, ne mndaa Jesús yalney ne yalnabee lo re zha, tsa tak koo zha relota mbi fyer kuu nzo leettsoo re men, ne par tegwe zha re mbyiz. 2 Ne mtaal Jesús re zha tsa taa zha kwent chaan ta nabee Diox, ne par tegwe zha re mbyiz. 3 Ne nzhab Jesús lo re zha:
―Neeka thib kwaa gwet goo leettsa yo goo net, neeka aga, neeka bols goo kuu yo re chaan goo, neeka pan, neeka temi; ne neeka gwet goo chop net xab goo. 4 Ne loka yuu ta tsin goo, tya kwet goo asta leettsa roo goo yeza. 5 Ne loka yez ta kayaat zha goo, broo goo yeza ne btsib goo yuyaaz kuu mke nii goo, tak kona nak thib seny kuu loo lo re tawlaz zha lee re zhaʼa went nak zha, tak mkayaat zha goo.
6 Tsa mroo re zha ne ngwa zha re yez ne re ranch, mndaa zha kwent Diiz Chul ne mtegwe zha re mbyiz.
Yalguth chaan Juan kuu mtsowleyy
(Mt. 14:1‑12; Mr. 6:14‑29)
7 Ne lee rey Herodes zha kuu nabee dita yezlyu Galilea mbin reta kuu mtsow Jesús; ne neeka net rey Herodes naa kwan tsow rey xgab, tak chop tson men mbez lee Juan mroban, ne lee Juan ntsow re kona. 8 Ne lee tedib net zha mbez lee Jesús nak Lí kuu ngok profet ndala, ne lee tedib net zha mbez lee Jesús nak thib re profet kuu ngoo ndala, mroban. 9 Per lee rey Herodes nzhab:
―Si na mnabee mga zha yek Juan. Mbay ne, ¿cho nak zha kuu nzhon na ndaa zha kwent chaan tsa?
Kona nlaaz rey Herodes wii Jesús.
Jesús mndaa kuu ndow thib gaay mil mbyi
(Mt. 14:13‑21; Mr. 6:30‑44; Jn.6 :1‑14)
10 Ne leettsa mretab re kuu ngeteed lo Jesús, tsa nzhab zha re kuu mtsow zha lo Jesús. Tsa mndeno Jesús beeta re zha, ne ngwa re zha thib ta yubiz, gaxta yez Betsaida tsa kwin anta re zha. 11 Per leettsa myeen re men lee Jesús nda neta, tsa mndeke re zha dits Jesús, ne mkayaa Jesús re zha ne mndaa Jesús kwent chaan ta nabee Diox lo re zha, ne mtegwe Jesús re mbyiz.
12 Per leettsa ndetsiy yezlyu, tsa mbig re tsiibchop zha kuu ngeteed lo Jesús ne nzhab zha lo Jesús:
―Taal re men ree bi, tsa ya zha neyy zha ne yakwaan zha kuu wu zha, re ranch kuu nzi gaxta nzhee; tak yent kwan nak nzhee wu zha.
13 Tsa nzhab Jesús lo re zha:
―Taa goo kuu wu zha.
Tsa lee re zha mkab, ne nzhab:
―Beeta gaay pan ne chop mbel nap nee, chu nlaaza yati nee kuu wu reta men ree.
14 Ne tya nzi teeka gaay mil mbyi. Tsa nzhab Jesús lo re zha kuu ngeteed lo Jesús:
―Guz goo lo re men, tsa yetob chop galbtsiiga zha.
15 Ne tata mtsow re zha, tsa ngwatob re men. 16 Tsa mzhen Jesús re gaay pan ne rop mbel, ne mwii Jesús lobee ne mndaa Jesús texkix lo Diox, tsa tsow Diox gak naroobe, ne mtsow rol Jesús re pan ne mndaa Jesús pan lo re zha kuu ngeteed lo Jesús, tsa kiid zhay lo re men.
17 Reta men ndow asta plotha mze leettsoo re men; ne bee mtse re zha tsiibchop chekwit pan kuu mrozhoob.
Pey nzhab lee Jesús nak Crist Kuu Mtaal Diox Nabee
(Mt. 16:13‑19; Mr. 8:27‑29)
18 Thib wiz thita Jesús ndo ngetediz lo Diox, ne lee re zha kuu ngeteed lo Jesús nzi gaxta lo Jesús, tsa mnaabdiz Jesús lo re zha, ne nzhab Jesús:
―¿Cho nakʼn ni re men?
19 Lee re zha mkab ne nzhab:
―Thib net zha mbez lee lu nak Juan kuu mtsowleyy, tedib net zha mbez lee lu nak Lí, ne lee tedib net zha mbez lee lu nak thib re profet kuu ngoo ndala, kuu mroban nal.
20 ―Lee re goo, ¿cho nakʼn ndak goo?
Tsa lee Pey mkab, ne nzhab lo Jesús:
―Lu nak Crist Kuu Mtaal Diox Nabee.
Jesús mndaa kwent naa xomod gath Jesús
(Mt. 16:20‑28; Mr. 8:30–9:1)
21 Per lee Jesús mnabee lo re zha, tsa yent cho lo gab zha kona. 22 Tsa nzhab Jesús lo re zha:
―Lee na nak Zha Kuu Mtaal Diox Ngok Men, ndoblo riidʼn kwathoz yalti. Ne kayaat re zha golʼn, neeka re ngwleyy kuu nataak, ne neeka re maestr kuu nloo xkiiz Diox. Ne kuth zha na, per leettsa tsaal tson wiz lee na roban.
23 Ne noga nzhab Jesús lo re zha:
―Loka cho goo nlaaz teke ditsʼn, ndoblo laa goo reta kuu nap goo, ne reta kuu nzo yek goo tsow goo, ne ndoblo thib ko goo yek goo gath goo, tak nyelaaz goo na. 24 Os lee thib zha gath tak ndeke zha ditsʼn, tetsow zha gan yalnaban kuu thitanax. Per os lee zha nzeb zha gath zha tak ndeke zha ditsʼn, tsowt zha gan yalnaban kuu thitanax yibaa. 25 ¿Per kwan tsow zha gan tegal reta kwaa yezlyu ree keno zha, ne tsowt zha gan yalnaban kuu thitanax yibaa? 26 Ne loka zha kuu nthoy nen ne xkizʼn, noga na Kuu Mzin Ngok Men, tethoyʼn nen zhaʼa, leettsa bretabʼn lo yezlyu ree tedib welt kon xni thoz chaan da, ne kon xni thoz chaan Xutʼn ne kon re mandad da kuu nayon. 27 Wlipaa na nin lo goo, lee chopta goo kuu nzi nzhee nal gatht goo, asta wii goo naa xomod nabee Diox kon yalnabee chaan Diox.
Mzee mod na Jesús
(Mt. 17:1‑8; Mr. 9:2‑8)
28 Ne leettsa ndaʼa teeka xon wiz nzhab Jesús kona, tsa mkendab Jesús yek thib yii par tediz Jesús lo Diox. Ne mndeno Jesús Pey, Santiag ne Juan. 29 Ne leettsa ngetediz Jesús lo Diox, mzee mod na Jesús, kwathoz naguz mloo xab Jesús, ne kwathoz mla xniy. 30 Ne mloo chop mbyi kuu ngetediz lo Jesús. Rop zhaʼa nak Moisés ne Lí. 31 Ne ngoo re yon zha xid thib xni thoz, ne mndediz re zha kwent chaan yalguth chaan Jesús, kuu rid Jesús yez Jerusalén. 32 Ne lee Pey, Santiag ne Juan ngwatin re zha mkaal, per mdatta zha, tsa mwii zha xni thoz chaan Jesús ne lo rop zha kuu mndo lo Jesús. 33 Per leettsa lee rop mbyiʼa ndya, tsa lee Pey nzhab lo Jesús:
34 Leettsa lee Pey bee ngenika lee thib xkow mla mtow re zha, ne kwathoz mzeb re zha ngoo zha xid xkowa. 35 Ne xid xkowa mroo thib bos kuu nzhab:
―Zha ree nak xgann na kuu mlin. Bin goo re kuu ne zha.
36 Bluz or ngwalo mni bosa, tsa mwii re zha thita Jesús ndo. Ne re wiza yent cho lo nzhab re zha kuu mwii zha.
Jesús mtegwe thib mndyeen kuu nzo mbi fyer leettsoo
(Mt. 17:14‑21; Mr. 9:14‑29)
37 Ne lee tedib wiz, leettsa ndyaad re zha ngwa zha yek yii, tsa kwathoz men ngwa lo Jesús. 38 Tsa lee thib mbyi kuu nzo xid re mena, nex nzhab:
―Maestr, blat leettsooʼa neʼa xgann na, tak thibka zha lon. 39 Ne nden thib mbi fyer zha, ne ntsow mbi mbetsyath zha, ne ntsow mbi nlen zha yizguthye, ne ntsow mbi ndroo btsiin roo zha. Kwathoz nakap ntsowno mbi zha ne nlaazt mbi laa mbi zha. 40 Ne nzhapa na lo re zha kuu ngeteed loʼa, tsa koo zha mbi fyer leettsoo xgann na, per ngogt gatsow zhay.
41 Lee Jesús mkab ne nzhab:
―¡Men nad, kuu nyelaazt Diox! ¿Plal tyemp ndoblo ton lo goo ne xek leettsoon nen goo? Deno xganna nzhee.
42 Ne leettsa lee zha ngebig, tsa lee mbi fyer mlobi zha lo yu, ne oraaka mtsow mbi mlen zha yizguthye tedib welt. Per lee mbi fyer mkox lo Jesús, ne mtegwe Jesús zha, ne mndaa Jesús zha lo xut zha. 43 Ne reta men kuu nzi tya, kwathoz mzegey leettsoo zha mwii zha kuu thoz kuu mtsow Diox.
Ne leettsa lee reta zha bee nzegey leettsoo mwii kuu ngok, tsa lee Jesús nzhab lo re zha kuu ngeteed lo Jesús:
44 ―Wen wen kenza goo koree ne nithlaazt gooy, tak na, Kuu Mzin Ngok Men, taa zha na lo re men.
45 Per myent re zha kuu nzhab Jesús, tak mkow yek zha kona myent zha. Ne nzeb re zha naabdiz zha lo Jesús, naa kwan kuu nzhab Jesús lo re zha.
Cho nak zha kuu mas nataak
(Mt. 18:1‑5; Mr. 9:33‑37)
46 Tsa lee re zha kuu ngeteed lo Jesús mndelo zha mbyodiz zha naa cho nak zha kuu mas nataak lo re zha. 47 Per lee Jesús myeen naa kwan ntsow re zha xgab, tsa mdeez Jesús thib ndyeen lut, ne mto Jesús ndyeen lo re zha. 48 Tsa nzhab Jesús lo re zha:
―Loka zha kuu nkayaa thib ndyeen, na nkayaa zhaʼa, ne loka zha kuu nkayaa na, noga nkayaa zha, zha kuu mtaalʼn. Tak lee zha kuu mas nataagt lo re goo, zhaʼa nak zha kuu mas nataak.
Re zha kuu nayiit neʼaa nzo zhaʼa faboraa
(Mr. 9:38‑40)
49 Tsa lee Juan nzhab lo Jesús:
―Maestr, mwii nee lee thib zha ngoo mbi fyer kon yalnabee chaana, ne nzhab nee lo zha: “Tsowt zhay”, tak nagt zha, zhaʼaa.
50 Per lee Jesús nzhab lo re zha:
―Ndoblot gab goo lo zha: “Tsowt zhay”, tak lee zha kuu nayiit neʼaa, nzo zhaʼa faboraa.
Mkox Santiag ne Juan lo Jesús
51 Leettsa ndetsin gaxa wiz kuu bretab Jesús yibaa, thib mloo Jesús yek Jesús ya Jesús Jerusalén. 52 Tsa mtaal Jesús chop tson zha mndenerga lo Jesús, ne lee re zhaʼa ngwa thib yez lut chaan zha Samaria, tsa kwaan zha pa kwet re zha. 53 Per lee re zha yeza mkayaat zha re zha, tak myeen re zha yeza lee re zha nda yez Jerusalén. 54 Or mbin Santiag ne Juan kona, tsa nzhab rop zha:
―Zha Nabee, ¿chu nlaaza nabee nee tsa roo ki yibaa, ne luuzhe re zha yez ree?
55 Tsa mwii Jesús lo Santiag ne lo Juan, ne mkox rop zha lo Jesús.
56 Tsaraa nda re zha tedib yez.
Re zha kuu nlaaz teke dits Jesús
(Mt. 8:19‑22)
57 Leettsa ndo Jesús kon re zha net, thib re zha nzhab lo Jesús:
―Zha Nabee, nlazʼn teken ditsa loka pa ta yaʼa.
58 Tsa mkab Jesús lo zha, ne nzhab Jesús:
―Lee re mbeet nap maa kelyoo ta nyoo maa, ne lee re min nap maa lyaat maa; per lee na, Kuu Mzin Ngok Men napt lizʼn.
59 Tsa nzhab Jesús lo tedib zha:
―Bteke ditsʼn.
Per lee zhaʼa mkab, ne nzhab:
―Zha Nabee, laa yelo kaatsʼn xutʼn.
60 Lee Jesús mkab lo zha, ne nzhab:
―Laa kaats re zha nguth zha nguth; per lee lu gwa gwataa kwent xkiiz Diox.
61 Ne lee tedib zha nzhab lo Jesús:
―Zha Nabee, nlazʼn teken ditsa, per beeta laaʼa yalon diize lo re zha lizʼn.
62 Jesús mkab lo zha, ne nzhab:
―Loka zha kuu nden yaa arad ne ngwii zha par dits zha, lortsint zhaʼa par taa zha kwent chaan ta nabee Diox.
<- Lucas 8Lucas 10 ->
