Lucas 5

Jesús mrez thap zha kuu niit mbel

(Mt. 4:18‑22; Mr. 1:16‑20)

1 Thib welt ndo Jesús roo nitdoo kuu le Genesaret, ne kwathoz men mkaltaa lo Jesús ne mzhoo re men Jesús, tak nlaaz re zha gon zha Diiz Chul chaan Diox kuu ndaa Jesús kwent. 2 Tsa mwii Jesús chop kano roo nitdoo, kuu neeka thib men yent leene, tak lee re zha kuu niit mbel mroo leen kano ndateech yex. 3 Tsa mkendab Jesús leen kano chaan Simún, ne nzhab Jesús lo Simún tsig Simún kano tut kwat lo nitdoo. Tsa mndob Jesús leen kano, ne mndelo Jesús mloo Jesús lo re men. 4 Leettsa ngwalo mloo Jesús lo re men, tsa nzhab Jesús lo Simún:

―Btsig goo kano lo nit, ne blebi goo yex goo, tsa niit goo mbel.

5 Tsa nzhab Simún lo Jesús:

―Maestr, dita yaal mke nee tsiin ne neeka thib mbel mniitta nee, per tak lu ney, kona kobi nee yex nee leen nit.

6 Ne leettsa mloo re zha yex leen nitdoo, kwaro mbel mniit zha, ne asta ndrat yex. 7 Tsa mtsow re zha seny lo re altaa zha kuu nzo leen tedib kano, tsa yaad re zhaʼa tsow ayud re zha. Ne myaad re zhaʼa mtsow ayud zha, ne mtse zha ropta kano, ne nlaa nlaa tab naats kano leen nitdoo. 8 Ne leettsa myeen Simún Pey kwathoz mbel mniit re zha, tsa mtobxub Pey lo Jesús ne nzhab Pey:

―¡Beche lon, Zha Nabee, tak zha ndab falt nakʼn!

9 Kwathoz mzegey leettsoo Simún kon re altaa Simún, tak kwaro mbel mniit re zha. 10 Ne noga Santiag ne Juan kuu nak rop xgann Zebedeo, rop zhaʼa nak altaa Simún. Per lee Jesús nzhab lo Simún:

―Tsebta, tak desde naltseree gaka zha kuu niit men par Diox.

11 Leettsa ngwalo mtsino re zha kano roo nitdoo, tsa mlaa zha reta kwaa ne mndeke zha dits Jesús.

Jesús mtegwe thib zha kuu mzhaak yiz kuu ndeye

(Mt. 8:1‑4; Mr. 1:40‑45)

12 Thib wiz leettsa ndo Jesús thib re yeza, tsa mzin thib zha kuu ndak yiz kuu ndeye lo Jesús, ne or mwii zha lo Jesús, mtobxub zha lo Jesús asta mdiinn yeklo zha lo yu, ne nzhab zha:

―Zha Nabee, os leeʼa nlaaza, tak tegweʼa na lo yiz ree.

13 Tsa mxoob Jesús yaa Jesús yek zha, ne nzhab Jesús lo zha:

―Nlazʼn weʼa.

Ne oraaka mgwe zha. 14 Tsa nzhab Jesús lo zha:

―Neeka thib lo zha yent kwan gaba. Sinke gwa lo ngwleyy, tsa ne zha leeʼa mgweʼa lo yiz kuu mzhaaka, ne btaa gona taxal mnabee Moisés.

15 Per lee re kuu mtsow Jesús masraa mraats, ne kwathoz men mkaltaa mkenza kuu mni Jesús, ne noga mkaltaa re zha tsa tegwe Jesús zha lo yiz kuu ndak zha. 16 Per lee Jesús mbeche lo re men ne nda Jesús ta yent men, ne tya mndediz Jesús lo Diox.

Jesús mtegwe thib zha mthans

(Mt. 9:1‑8; Mr. 2:1‑12)

17 Thib wiz leettsa lee Jesús ngeloo lo re men, xid re mena ndob chop tson fariseo ne chop tson maestr kuu nloo xkiiz Diox, re zhaʼa ndyaad re yez kuu nzi dita ta nabee Galilea, Judea ne Jerusalén, ne nap Jesús yalney chaan Diox ntegwe Jesús re mbyiz. 18 Tsa mzin chop tson mbyi kuu ngwano thib zha mthans kuu nzoob lo luun, ne nlaaz re zha ko zha mthans leen yuu, tsa kix zha mthans lo Jesús. 19 Ne ngogt gataab zha leen yuu, tak kwaro men nzi tya, tsa mkendab zha yek yuu, ne mxaal zha lut yek yuu, ne tya mriid zha dib luun mthans, ne mdix zha mthans lo Jesús. 20 Ne myeen Jesús lee re zha kuu myaadno mbyiza wlipaa nyelaaz Diox, tsa nzhab Jesús lo mbyiz:

―Lee re falta myuyya.

21 Tsa lee re maestr kuu nloo xkiiz Diox kon re fariseo mndelo mtsow xgab: “¿Cho nak mbyi ree? ¿Chebee tabaa mbez mbyi ree? Beeta Diox nak cho kuu tak tuyy re falt chaan re men.” 22 Per lee Jesús myeen naa kwan ntsow re zha xgab, tsa nzhab Jesús lo re zha:

―¿Chebee tabaa ntsow goo xgab? 23 ¿Kwan ntsow goo xgab? ¿Kwan mas nagant gapʼn lo mbyiz: “Lee re falta myuyya”, o tegwen zha ne gapʼn lo zha: “Gwache, bzhen luuna ne tyee”? 24 Per tsowʼn koree lo goo, tsa ne goo lee na, Kuu Mzin Ngok Men, napʼn yalnabee tuyʼn re falt goo.

Tsa nzhab Jesús lo zha mthansa:

―Loʼa nin, gwache, bzhen luuna ne tyee liza.

25 Ne oraaka lee zhaʼa ngwache, ne mzhen luun, ne ngeyol zha lo Diox ndya zha liz zha. 26 Kwathoz mzegey leettsoo reta men ne mbil men lo Diox, ne lo tseb re zha nzhab zha:

―¡Naltseree si mwiiʼaa thib kuu thoz kuu mtsow Diox!

Jesús mrez Leví

(Mt. 9:9‑13; Mr. 2:13‑17)

27 Bluz leettsa ngwalo mriid re koree, tsa mroo Jesús ne mwii Jesús thib zha kuu ntsow kobral temi chaan yezlyu, kuu nzhax lo zha Roma, zhaʼa le Leví, ndob zha roo mes ta nya re men ngix lo zha. Tsa nzhab Jesús lo Leví:

―Bteke ditsʼn.

28 Tsa ngwateli Leví ne mlaa Leví reta kwaa, ne mndeke Leví dits Jesús.

29 Tut bluz, mtsow Leví thib ani liz Leví par Jesús, ne tya mkaltaa kwaro re zha kuu ntsow kobral temi chaan yezlyu kuu nzhax lo zha Roma, ne noga nzi tedib net re zha kuu ngeyow kon re zha roo mes. 30 Per lee re fariseo ne re maestr kuu nloo xkiiz Diox, mndelo zha mrezta zha loo re zha kuu ngeteed lo Jesús, ne nzhab re zha:

―¿Chebee nzhow goo ne nzhuu goo kon re zha kuu ntsow kobral temi chaan yezlyu, ne kon re zha kuu ntsowt kuu wen?

31 Jesús mkab ne nzhab lo re zha:

―Re zha kuu net ndak, ndechet zha zha kuu tegwe zha, per lee re zha kuu ne ndak, ndeche zha zha kuu tegwe zha. 32 Ne ndyaltʼn ndyaadchezʼn re zha wen, sinke leen ndyal ndyaadchez re zha kuu nap falt, tsa tsee zha mod went kuu nak zha ne yelaaz zha Diox.

Yalnaabdiz chaan ayun

(Mt. 9:14‑17; Mr. 2:18‑22)

33 Tsa mnaabdiz re zha lo Jesús, ne nzhab zha:

―¿Chebee lee re zha kuu ngeteed lo Juan ne re fariseo kwathoz ntsow zha ayun, ne noga kwaro ndediz zha lo Diox, per lee re zha kuu ngeteed loʼa thibka nzhow zha ne nzhuu zha?

34 Jesús mkab ne nzhab:

―¿Chu tak tsow goo, wut re zha kuu nzi lo fandan, or kuu lee zha kuu mtseya ndoka lo re zha? 35 Per too thib wiz kib zha zha kuu mtseyaʼa lo re zha, tsyasi tatsow zha ayun.

36 Ne noga mndaa Jesús thib kwent nanzee lo re zha, ne nzhab Jesús:

―Neeka thib zha ngat lut lar kub, ne ngib zhay chu lar gox. Os lee zha tata tsow zhay, ntetsaa zha lar kub, tak lee lar kub nzaalte gwataak cho lar gox. 37 Ne neeka ngot zha xit ub kuu kub leen gom yid gox. Tak os lee zha tata tsow zhay, lee xit ub kuu kub luux gom gox. Tsa lee xit ub zho ne lee gom gox lux. 38 Kona lee xit ub kuu kub ndobloy yo leen gom yid kub, tsa roptay lortsin. 39 Ne reta zha kuu nzhuu xit ub kuu ndaʼa wiz mroo, yowt leettsoo zha gu zha kuu kub, tak gab zha: “Mas wen ndee kuu gox”.

<- Lucas 4 Lucas 6 ->