1 Re goo wetsʼn ne btan na, os lee goo ne goo lee thib goo mtsow thib kuu went, tsa lee re goo kuu naban taxal nlaaz Mbi Nayon, ndoblo tsow goo ayud zhaʼa, par tsow zha kuu wen; per ndoblo tsow gooy thib mod nadoo. Ne bkenap goo goo, tak cha no goo ngetsow kuu went kuu mtsow zha. 2 Btsow goo ayud altaa goo, leettsa ndriid goo yalti, ne tata mod ngetsow goo kuu nabee Jesucrist.
3 Tak leettsa lee thib zha ndak zha kwathoz nataak zha, leettsa yent kwan nak zha, leeka lee zha nkedi zha zha. 4 Kadta thib zha ndoblo wii zha naa kwan ntsow zha, ne wen ley zha leettsa ne zha ngetsow zha kuu wen, ne ndoblot wii zha kuu ntsow tedib net zha. 5 Tak kadta thib zha ndoblo tsow zha kuu mndaa Diox tsow zha.
6 Lee re zha kuu ngeteed xkiiz Diox, ndoblo tsow zha ayud maestr zha.
7 Kedit goo leeka goo, neeka thib zha gagt kithno Diox. Tak kuu nzhann men leeka kona thop men. 8 Lee zha kuu ntsow kuu went kuu nlaaz kwerp, lo kona tsow zhaʼa gan yalguth. Per lee zha kuu ntsow kuu nlaaz Mbi Nayon, tetsow zhaʼa gan yalnaban kuu thitanax. 9 Kona ndoblot yetsayaa tsowaa kuu wen, tak os leeʼaa yetsaytaa, tsa thopaa yalgonnaa, leettsa tsin wiz kuu dope. 10 Kona, kadta leettsa take loʼaa, ndoblo wen tsowaa lo reta men, per ner lo re wetsaa ne lo re btanaa kuu nyelaaz Jesús ndoblo tsowaa kuu wen.
Nley Paba kwent mke Jesucrist lo kruz
11 ¡Wii goo naa xa na re letr nabii ree ngekeen loo goo kon mer yaan! 12 Lee re zha kuu nlaaz ke goo seny chaan nee zha Israel, ntsow zhay, tak nlaaz zha wen yaan zha kon re men ne tsa reket re men dits zha, kwent mke Jesucrist lo kruz. 13 Ne neeka re zha kuu mke seny chaan re nee ntsowt zha re kuu nabee ley. Per nlaaz zha ke re goo seny, tsa tak rub zha tak mtsow zha mke goo seny. 14 Per lee na nlaztʼn leyʼn por neeka thib kwaa, beeta kuu nleyʼn nak mke Jesucrist Zha Nabee loʼaa lo kruz. Ne tak mke Jesucrist lo kruz, kona nguth re kuu yezlyu ree lon ne lee na nguthʼn lo re kuu yezlyu ree. 15 Tak nataagt ke zha seny o ket zha seny chaan nee zha Israel, kuu nataak nak gak zha thib zha kub lo Jesucrist. 16 Ne reta goo kuu nzhon diiz koree, nlazʼn wen kwin goo, ne nlazʼn lat leettsoo Diox ne Diox goo, tak re goo nak zha kuu wlipaa nak zha Israel kuu nak yez chaan Diox.
17 Desde naltseree nlazt raa na lee tedib goo kee zhyan leettsoon, tak nkeka re btig kwerp da, kuu nloo lee na nakʼn mos chaan Jesucrist.
18 Re goo wetsʼn ne btan na, nlazʼn lee Jesucrist Zha Nabee loʼaa, taa reta yalwen chaan lo goo.
