Gálatas 5

Ndoblo nali toʼaa tak nagt raa lee mos

1 Jesucrist mtelaaʼaa lo ley, tsa gagt raa lee mos lo ley. Kona ndoblo nali toʼaa lo re kuu nabee Jesucrist, ne ndoblot raa tsowaa re kuu nabee ley, tak lee ley nak taxal thib yug kuu ne kuu nzob dits yenaa, kona ndoblot raa yelaaz releey tedib welt.

2 Kenza goo. Na Paba, nin lo goo, os lee goo ke goo seny chaan nee zha Israel, nataagt Jesucrist lo goo tsa. 3 Ne tedib welt bren nin lo re zha kuu nlaaz ke seny chaan re nee, ndoblo zha tsow zha reta kuu nabee ley chaan Moisés. 4 Re goo kuu nlaaz goo kayaa Diox goo taxal zha nali, tak nzhon goo diiz kuu nzhab lo ley chaan Moisés, thitanax mbeche goo lo Jesucrist ne mlaa goo yalwen chaan Diox. 5 Per leeʼaa nyelaazaa Diox por Mbi Nayon chaan Diox, ne ngebetaa kayaa Diox reʼaa taxal zha nali lo Diox. 6 Ne os thibka nakaa kon Jesucrist, nataagt keʼaa seny o ketaa seny. Kuu nataak nak nyelaazaa Jesucrist kona nke leettsooʼaa tabenaa.

7 Kwathoza wen nda goo. Ne, ¿cho mtsow mlaa goo mbint raa goo diiz lo Diiz Chul kuu wli? 8 Ne leet Diox kuu mrez goo, mtsow mbint raa goo diiz. 9 Tak, “lut lebadur ntsow nyezhoob dita koob”. 10 Per lee na nen lee Zha Nabee tsow tseet goo xgab goo, per lee re zha kuu ntsow nzhak chop xgab goo, loka cho zhay, wlipaa teteti Diox zha.

11 Re goo wetsʼn ne btan na, os leen bee ndan kwent ne mbezʼn, ndoblo ke re men seny chaan nee zha Israel, os leen tata ngetsowʼn nal, ndoblot reke re zha Israel ditsʼn, ne lee kwent kuu mke Jesucrist lo kruz gatowte lo re zhaʼa. 12 Re zha kuu ndiy ntsee xgab goo, ¡malaay thitanax gatsow kapon zha re zhaʼa!

13 Kuu nin lo re goo wetsʼn ne btan na nak, Diox mrez goo tsa yelaazt raa goo ley ne tsa gagt raa goo mos. Ne nagt tak nagt raa goo mos, tsa tak tsow goo reta kuu nlaaz kwerp goo, nagte tata. Sinke mas wen bke leettsoo goo thib goo ne tedib goo ne btsow goo ayud altaa goo. 14 Tak dita ley tak tsowaa kuu nabeey kon diiz ree: “Bke leettsooʼa tabena taxal nke leettsooʼa leeka lu”. [Lv. 19:18] 15 Per os lee goo nkwaan goo diiz ne nlooz altaa goo, wii goo cha leeka re goo ngeluux goo goo.

Kuu ntsow kwerp yezlyu ree ne kuu ntsow Mbi Nayon

16 Kuu nin lo goo nak: Tsowaa kuu nlaaz Mbi Nayon chaan Diox ne tsowtaa re kuu went kuu nlaaz kwerpaa. 17 Tak lee re kuu went kuu nlaaz kwerp nayii ne re kuu wen kuu nlaaz Mbi Nayon, ne lee re kuu nlaaz Mbi Nayon nayii ne re kuu nlaaz kwerp. Ne nayii thibe ne tedibe, kona gagt tsowaa kuu wen kuu nlaazaa. 18 Ne os lee Mbi Nayon Nabee leettsooʼaa, nabeet raa ley loʼaa.

19 Ne nloo re kuu went, kuu ntsow re zha kuu ntsow kuu nlaaz kwerp:

nzhak rop zha kon ndota zha,

nzhak rop zha kon tyen zha,

ntsow zha re kuu yu kuu nlaaz kwerp zha,

20 nyelaaz zha re diox re men yezlyu ree,

nya zha lo wez,

nayii zha ne zha taben zha,

nkwaan zha zhoo,

ndablaaz zha keno zha chaan taben zha,

por ndota kwaa nkezhyan zha,

ntsalzhoo zha men,

ntsow zha nzhak rol re men,

nloo zha re leyy kuu wlit,

21 went nzhak leettsoo zha ne zha tedib net zha,

zha gwiy zha,

nya zha lo ani ta nzhowcho zha ta ntsow zha reta kuu nlaaz kwerp zha,

ne ntsow zha tedib net re kuu went taxal re koree.

Ne bren nin lo goo tedib welt, taxal mniʼa na lo goo ner, lee re zha kuu ntsow re koree, tabt zha yibaa ta nabee Diox.

22 Per lee re kuu ntsow Mbi Nayon leettsoo zha nak:

nke leettsoo zha taben zha,

naley nzo leettsoo zha,

wen nzi zha kon Diox,

nxek leettsoo zha reta kwaa,

nabizt zha,

wen nak zha,

thib nyelaaz zha Diox,

23 nadoo nak zha,

ne nabee zha lo kwerp zha, tsa tsowt zha kuu nlaaz kwerp zha.

Neeka thib ley gagt ne lee re koree went nak. 24 Ne lee re zha kuu nak zha Jesucrist, ntsowt raa zha re kuu nlaaz kwerp zha, tak mkeʼa zhay lo kruz kon Jesucrist, ne leey nak mod nguth zha lo re kuu yezlyu ree. 25 Ne os leeʼaa nabanaa por Mbi Nayon chaan Diox, ndoblo laaʼaa nabee Mbi Nayon leettsooʼaa.

26 Ndoblot rubaa, neeka keetaa zhyan leettsoo altaaʼaa, ne neeka ndoblot went yo leettsooʼaa neʼaa altaaʼaa.

<- Gálatas 4 Gálatas 6 ->