Link to home pageLanguagesLink to all Bible versions on this site

1 Ngolo tataa ndxab ryete mèna loo Pilat, mnibe' Pilat loo solndad par ya ta' solndad che'n Jesús. 2 Látha, mdub solndad thìb coron yis co' nayà' yéc Jesús. No mtegoc solndad Jesús thìb cap co' ngòc lar' morad. 3 Ngoloa, mbez solndad loo Jesús:

―San, Rey che'n mèn nación Israel.
No be' taa nguis solndad rloo Jesús.

4 Le' sya, mbere Pilat. Ngro' Pilat par fuer tedib vez. Ndxab Pilat loo mèna:

―Hui' gu' nexa. Trè' ndal non mbi' loo gu' par ta' gu' cuent no ñee gu' yende chó xquin mbi' co' ndxàp mbi' ndryo xo'f loon.

5 Sya, ngro' no Pilat Jesús par fuer. Ndub coron yis yéc Jesús. No noc Jesús thìb cap co' nac lar' color morad. Ndxab Pilat loo mèna:

―Aa gu' mbi' ndxè'.

6 Per co'se' gunèe jef che'n nguley' co' más ñibe' loo rye nguley' no mèn nac zin' co' nquenap templ nde no Pilat Jesús, mtlo mèna, ngrozèe mèna cabii. Ndxab mèna loo Pilat:

―Fque' mbi' ba' loo cruz. Fque' mbi' ba' loo cruz.
Per Pilat ndxab loo mèna:
―Be' gu' mbi'. Fque' yub gu' mbi' loo cruz tac part cón chenen yende chó xquin mbi' ngro xo'f loon.

7 Sya, mcàb mèn co' ñibe', no co' ndyoo ner, no co' ndyoo naa loo mèn nación Israel loo Pilat. Ndxab mèna:

―Nu' ngue no thìb ley. No texal ñibe' ley nu', ndxàalque' gath mbi' ba'. Tac ale leque mbi' mbez nac mbi' xgan'pe' Diox.

8 Per co'se' mbìn Pilat di'sa, sate más mzyeb Pilat. 9 Mbere Pilat, ngòo Pilat le'n palas con Jesús tedib vez. Mnibdi's Pilat loo Jesús. Ndxab Pilat:

―¿Páxe' mèn lùu, à'?
Per Jesús yende cón mcàb loo Pilat.

10 Le' sya, ndxab Pilat loo Jesús:

―¿Chonon indlya'stel càbl loon, à'? ¿Ché' iñeedel le' daa ndxàp con' la's niin no la's yan par ñibe'en loo mèn que' mèn lùu loo cruz? No ndxàpen con' la's niin no la's yan par ñibe'en la' mèn biil. Ne'que'de mèn lùu loo cruz.

11 Jesús mcàb loo Pilat. Ndxab Jesús:

―Nec thìb mod no nec tedib mod ne'ñibe'del cón chenen chele' Diox ne'nda'de lugar lool ñibe'l loon. Por cona, mbi' co' mda'xù' daa lool másque' thìb xquin mbi' ndxàp mbi' no másque' thìb xtol mbi' ndxàp mbi' leque lùu.

12 No leque hora mcua'n Pilat mod xá mod la' Pilat bii Jesús. Per mèn co' ñibe', no co' ndyoo ner, no co' ndyoo naa loo mèn nación Israel, sate más cabii mbez yèe mèna loo Pilat. Mbez mèna:

―Chele' lùu lá' mbi' ba', indxàcte amiu lùu gobiern co' ñibe' loo mèn gulàaz mèn ciuda Rom. Tac chol mèn co' ndxàc xal thìb rey xal mbi' ba', mèna ndxàc ngolo ngola's loo gobiern co' ñibe' loo mèn gulàaz mèn ciuda Rom.

13 Co'se' mbìn Pilat tataa ndxab mèna loo Pilat, mnibe' Pilat loo Jesús ryo' Jesús par fuer. Le' Pilat na, mdub loo asi Pilat thìb lugar le'n palas co'te' natoxcua' pis con thìb loo quèe huen, co' nee di's, di'stèe che'n mèn ciuda Rom. No di'stèe che'n mèn nación Israel lèe quèea Gabata. 14 Huiza ngòc huiz vispr che'n huiz lni pasc. No co'se' ndxab Pilat loo mèn nación Israel:

―Hui' gu' nexa, Rey gu' ndxè',
hora casque' ngòc rol huiz.

15 Per mèna tolo ngrozèe. Cabii mbez mèna loo Pilat:

―Fcàa mbi' ba'. Beth. Fque' mbi' loo cruz.
Per Pilat ndxab loo mèna:
―¡Cóna! ¿Rey gu' que'en loo thìb cruz, à'? Yende xàa.
Per mèn co' ngòc jef che'n nguley' co' más ñibe' loo rye nguley' mcàb. Ndxab mèna loo Pilat:
―Ingue node nu' más rey, ey. Angoluxte jef co' ñibe' loo mèn gulàaz mèn ciuda Rom nac rey nu'. Ngolo cuent.

16 Ngoloa, mnibe' Pilat loo solndad par mbe' solndad Jesús par ya que' solndad Jesús loo cruz. Le' rye mèna na, mdoo nque xís solndad par la's mèna xal que' solndad Jesús loo cruz.

Trè' ndlu' mque' mèn Jesús loo cruz.
(Mt. 27.32–44; Mr. 15.21–32; Lc. 23.26–43)

17 Sya, ngro' no mèna Jesús. No ale mnibe' mèna loo Jesús par leque Jesús mxo'f yen cruz Jesús par mbe' Jesús cruz Jesús axta loo den co' mbez mèn lèe Den Calaver tiempa. Le' di'stèe mèn nación Israel na, mbez mèn loo dena Golgot tiempa. 18 Loo dena mque' mèn Jesús loo cruzpe' Jesús. Lomisque' ne, mque' mèn taachop mbi' loo cruz co' ngòc cruzpe' mbi', thìb thìb mbi' mquée loo cruz thìbgà' lad cuat Jesús. Le' cruz Jesús na, mdoo xtau' ryop mbi'a. 19 Látha, mbli Pilat mandad mque' mèn plá di's loo yéc cruz co' ndxab: Jesús, mèn yèez Nazaret, rey che'n mèn nación Israel. 20 Huax mèn nación Israel mblab di'sa tac co'te' mque' mèn Jesús loo cruz nzi gax ro ciuda Jerusalén. Di'sa nac son loo di'stèe co' nac xti's mèn hebre, no di's co' nac xti's mèn grieg, no di's co' nac xti's mèn italia. 21 Ndxab jef che'n nguley' co' más ñibe' loo rye nguley' che'n mèn nación Israel loo Pilat. Ndxab jef:

―Más huen ne'ndubtel di's ba' tatua' co' ndxab: Rey che'n mèn nación Israel. Más huen ndubl di's le' mbi' ba' ndxab: Daa nac rey che'n mèn nación Israel.

22 Mcàb Pilat loo mèna. Ndxab Pilat:

―Yende cóna. Di's co' mblin mandad mdub loo cruz ba', yende chó techei. Le'i nduble'. Ngolo cuent.

23 Co'se' ngolo mque' solndad Jesús loo cruz, mxen solndad xab Jesús. Mblec xà' solndad thìb thìb xab Jesús par ngòc che'n thìb thìb solndad xab Jesús. No mxen solndad cap co' ngòc xab dib andoo Jesús co' ngòc thìb lar' dib nol' no dib naxèn. 24 Ndxab solndada loo xtàa solndad:

―Ne'li rolte na' cap ndxè'. Más huen quith no na' dad loo cap ndxè' par ñee na' ñeene' chó na' gàc che'na.
No tataa ngòca par mdyaa di's co' ndub loo libr co' nac xti's Diox co' mbez:
Mcàa mèn thìb ned xaben par ngòc xaben che'n mèn. No loo xaben co' ngòc cap daa mdi'th no mèn dad par ñee mèna ñeene' chó gàc che'na.
No tataaque' mbli solndad con'a.

25 Gaxte co'te' ndoo cruz Jesús ngure no xna' Jesús bél xna' Jesús, no Mari sa'l Cleof, no Mari co' nac mèn yèez Magdala. 26 Co'se' gunèe Jesús ndoo xna' Jesús loo Jesús con thìb myen' xin' mté'th Jesús co' más mque' lezo' Jesús ñèe Jesús, Jesús ndxab loo xna' Jesús:

―Ngot, hui' loo mbi' co' ndoo lool ba'. Mbi' ba' lil cuent nac xgan'l, ndee.

27 Ngoloa, ndxab Jesús loo mbi' xin' mté'th Jesús co' más mque' lezo' Jesús ñèe Jesús:

―Mbi', xa'got ba' gàc xal xna'l, ndee.
Leque hora, mbye' mbi' co' nac xin' mté'th Jesús xna' Jesús par liz mbi' xal xna'pe' mbi' xin' mté'th Jesús.
Trè' ndlu' nguth Jesús.
(Mt. 27.45–56; Mr. 15.33–41; Lc. 23.44–49)

28 Ngolo ngòc rye con'a, no com le' Jesús nanee le' ryete con' co' naquin gàc loo Jesús ngòcle' no mdyaale' no par tolo gàcque' no tyaaque' di's co' ndub loo libr co' nac xti's Diox, Jesús ndxab láth ngue Jesús loo cruz:

―Ndxec lezon, yey.

29 No le'pe' ndoo thìb bote vin co' nac nítguy. Yende izlyo', ngua tegaz thìb xa' thìb sponj con vina. No mdub xa'a sponja loo thìb bar che'n thìb loo yaa co' lèe hisop par mda'i mod mzii xa' sponja ro Jesús loo cruz. 30 Ngolo ngu Jesús vina, ndxab Jesús:

―Nase ngolole' mdyaa no ngòcque' no mdubque' di's ryethe con' naquin gàc loon.
No ngoloa, site mbi's yen Jesús. Nguth Jesús.
Thìb solndad che'n gobiern co' ndub ciuda Rom mdid lans cho Jesús.
31 Huiz co' mque' mèna Jesús loo cruz ngòc huiz vispr che'n lni pasc. Indlya'ste mèn co' ñibe', no co' ndyoo ner, no co' ndyoo naa loo mèn nación Israel yan' yon xa' loo cruz huiz sabd co' nde nquea tac huiza nac huiz co' nac más huiz roo huiz xèn che'n lnia. Por cona, ngua na'b mèn co' ñibe', no co' ndyoo ner, no co' ndyoo naa loo mèn nación Israel di's loo Pilat par ñibe' Pilat ya lé' solndad zith cor nii yon xa' co' ngue loo cruz par gath xa'. No yiloa làa mèn yon theboola loo cruz. 32 Sya, ngua thi's solndad zith cor nii thìb xa'. Ngoloa, ngua thi's solndad zith cor nii tedib xa' co' mquée no Jesús loo cruz. 33 Per co'se' mbii gax solndad loo Jesús par qui's solndad zith cor nii Jesús, gunèe solndad le' Jesús nguthle'. Ne'ngui'ste solndad zith cor nii Jesús.

34 Per mastale' nguthle' Jesús, thìb solndad co' nzo làtha ngua thid lans ro costi Jesús. Co'se' mblo' solndad lans ro costi Jesús, ante nde bèe nde yax loo ren no loo nít co' ngro' ro costi Jesús. 35 Mbi' co' nda' cuent con' ngòc loo Jesús ngòc thìb mbi' co' gunèepe' ngòc con'a loo Jesús. No nda' mbi' cuent co' nac lìcpe'. Mbi'a nanee le' mbi' ngue ta' cuent co' nac lìcpe' par yila's gu' cuenta. 36 Tac ngòc con'a loo Jesús par ngòcque' no par mdyubque' di's co' ndub loo libr co' nac xti's Diox co' mbez:

Ne'lé'de mèn no ne'qui'ste mèn nec thìb zith co' nac zith lad mbi'.
37 Lomisque', ndub di's loo libr co' nac xti's Diox tedib lugar co' mbez:
Le' mèn hui' loo mbi', mbi' co' mdid mèn lans no clav lad yiloa.
Chop mbi' ngua ca's thebol Jesús le'n thìb ye'r quèe.
(Mt. 27.57–61; Mr. 15.42–47; Lc. 23.50–56)

38 Ngolo ngòc ryethe con'a loo Jesús, ngo thìb mbi' co' lèe Chè. Chèa ngòc mèn thìb yèez co' lèe yèez Arimate. Chèa, ne, mque tee no Jesús. Per xexte mque tee no Chè Jesús tac mzyeb Chè gunèe Chè mèn co' ñibe', no co' ndyoo ner, no co' ndyoo naa loo mèn nación Israel. Ngua nee Chè loo Pilat ta' Pilat lugar làa Chè thebol Jesús loo cruz. Pilat mdyalque' par làa Chè thebol Jesús loo cruz. Sya, nda Chè. Ngua làa Chè thebol Jesús loo cruz. Mbye' Chè thebol Jesús. 39 Làth xtau'a, mzin Nicodem, ne, co' ngua toodi's no Jesús thìb yál' ndoore'. Nde no Nicodem gal psi' kil dii co' nos thìb loo dii co' lèe mirr no tedib loo dii co' lèe áloes co'te' nzo no Chè thebol Jesús. 40 Sya, mxen Chè ryop Nicodem thebol Jesús. No mxob Chè ryop Nicodem dii perfuma loo thìb le' sab. No mchì'x Chè ryop Nicodem saba lad thebol Jesús xal nac costumbr che'n mèn nación Israel co'se' nca's mèna xtàa mèn. 41 No gaxte co'te' mque' solndad Jesús loo cruz nziri' thìb huert. No le'n huerta ndub thìb quèe rhue'. Lad quèe rhue'a ndub thìb ye'r co'te' tarte yòo ga's nec thìb thebol. 42 Ale tyate mca's Chè ryop Nicodem thebol Jesús tac gaxte co'te' mque' solndad Jesús loo cruz mdub ye'r quèea. No nde nxon', mdub bixle' huiz huiza no ngulàale' yál' huiza no mtlole' huiz co' ngòc huiz descans che'n mèn nación Israel tiempa.

<- SAN JUAN 18SAN JUAN 20 ->