1 Nerleque' con' co' más ndlyazen lil, Timote, bnibe' loo mèn co' ndxela's co' nqueltàa loo cón che'n Diox por cón che'n Crist trè', ña'b mèna loo Diox, no cuez mèna Diox, no teri'th mèna di's loo Diox, no gab mèna: Diox quix U', Diox, loo Diox por cón che'n ryete mèn. 2 Ndxàal cuez mèna Diox por cón che'n ryethe mèn co' ndxàc gobiern chol nación no chol estad par ta' mèna lugar nagàl que tee ban na' no cue na' rye nda na' no rye ndye'th na' no par li mèn cas loo Diox xal ñibe' Diox loo mèn, no thidte que tee ban ndac mèna loo xtàa mèna. 3 Tac con' co' ngue niin loo gu' par li gu' nac thìb con' ndac. No naca thìb con' co' ndxòo lezo' Diox, Diox co' nac xa' co' ntelá' na' loo con' ryes. 4 Diox ndlya's ryete mèn lyá' loo con' ryes. No ndlya's Diox ta' mèn cuent no té'th mèn cón che'n di's ndac co' nac lìcpe'. 5 Tac thidte Diox nzo. No thidte mbi' co' nteri'th di's cón che'n mèn loo Diox nzo. Mbi'a nac Jesucrist co' mbi'th yáal xalque' ndxáal chol mèn loo izlyo'. 6 Leque yub Jesucrist mda' lugar mquée yalguth loo Jesucrist par tataa mod mdix Jesucrist cón che'n xtol mèn loo Diox. Cón che'n xá mod le'le' Jesucrist mdix cón che'n xtol mèn mde'th mèn co' ngòc xin' mté'th Jesucrist co' mtel' Jesucrist co'se' ngolo ngòc yaltìi loo Tad Jesucrist. 7 Par gon yalbàn cón che'n ryete con' co' ngòc loo Jesucrist, Diox mdoo daa no mblec Diox daa par gon yalbàn no par huen di's cón che'n di's ndac che'n Jesucrist loo mèn. Lìcque' nac di's co' niin lool ndxè', Timote. Inquedìiden lùu. Diox mcui daa par nac daa maistr co' ndlu' loo mèn co' nac mèn chol nación cón che'n xá mod ndxela's na' loo cón che'n Diox por cón che'n di's ndac co' nac lìcpe'. Ante ndyoodizen con' lìcpe' ned ngue tee'en tac ndxelasquen loo Crist no loo cón che'n Crist. Indyè'den.

8 Cona, ndlyazen le' mèn co' ndxela's loo cón che'n Diox, mèn co' nqueltàa ryete lugar, cuez mèna Diox. Ndlyazen le' mèna, lìcque', gàc mèn nambìi no mèn nalì loo Diox par gòn Diox di's co' cuez mèna loo Diox. Ndlyazen le' mèna ne'gàcte mèn nayi'. Ne' ne' gàc mèna mèn co' ngyoo no xtàa. 9 Lomisque', ndlyazen ñiil loo mèngot ne'gocte mèngot vestid arid bunch co' nac xab mèngot. Goc mèngot xab mèngot co' be'the. Ne' ne' arid bunch no ne' ne' arid nol'. Nabe'ste goc xab mèngot par gàp mèngot mod loo mèn, co' nee di's, ne'tye'ste mèngot arid. Ne'toxcua'de mèngot arid yéc mèngot. Ne' ne' que' mèngot yi'f or nza mèngot. Ne' ne' co mèngot coral co' anze'f nabe's ñaa yen mèngot. Ne' ne' goc mèngot vestid co' anze'f náp ntac tac ihuente nac con'a par mèngot co' nzo loo cón che'n Tad Jesucrist. 10 Ndxe'leque', lugar de tataa goc mèngot, más huen li mèngota con' co' nac con' ndac, co' nee di's, gàc mèngot mèn co' non carida ñèe xtàa xalque' mèn co' ndlu', lìcpe', ndxela's mèngota loo Diox no ngro xà' mèna loo cón che'n xab izlyo'. 11 Lomisque' ne, ñibe'l co'se' nqueltàa mèn le'n templ, xèe cue mèngota par gòn mèngota co'se' nzi té'th mèngota cón che'n Diox. Nado' gàc mèngota co'se' xèe cue mèngota. 12 Tedib con' ñibe'en lool, ne, Timote: Ne'ta'del lugar gàc thìb mèngot maistr par lu' mèngot loo mènbi' co'se' queltàa mèn le'n templ loo xnaa. Ne' ne' ta'l lugar ñibe' mèngot loo mènbi'. Ndxe'leque', xèe cue mèngota co'se' queltàa mèn le'n templ. Ne'càb rode mèngota loo mènbi'. 13 Tac co'se' mbli Diox ngo ner mbi' loo izlyo', ner Adán ngòcsua'. Ngoloa, mdyoxcua' Ev. 14 Mebizya ne'nquedìide Adán. Ndxe'leque', mquedìi Mebizya Ev. Por cona, ale ner Ev mcua'n xquin Ev no xtol Ev loo Diox. 15 Per mastale' tataa ngòca loo Ev, myen'got lyá' chele' mèngot, lìcque', ngola'sle' loo Diox. Tataa gàca chele' mèngot tyan xin', no chele' mèngota toloque' que' lezo' ñèe xtàa mèngot, no chele' mèngot tolo ryo xà'que' loo cón che'n xab izlyo' par gàc mèngota che'npe' Diox. Tataa gàca chele' mèngota huenque' ñibe' loo xtùuz no lezo' mèngota.

<- 1 TIMOTEO 11 TIMOTEO 3 ->