1 Wanhu viwasongile kongezeka muna iisi na kulela wandele, 2 wana wa Mulungu wawona waja iwandele wa wanhu kamba wanoga, avo wamsola yoyose iwamsagule. 3 MNDEWA kalonga, “Loho yangu haikala mzing'huli zidanganhika kipigiti kitali kamba kino, kwavija hewo walumbigwa na nyama, Avo kipigiti chao cha kukala muisi hakibanza milao mia na malongo mabili.” 4 Mkipigiti hicho, na mkipigiti kidodo hamwande, Wanefili[a] wakala muisi, kipigiti wana wa Mulungu viwacholile ha wandele wa wanhu na kulela nao wana. Wakala wanhu magalu na wali na matwaga makulu mkipigiti cha umwaka.

5 MNDEWA kona kamba wiho wa wanhu ukala ubanzile muisi, na kamba mazua gose mbuli ziwakalile wogelegeza na kuzigesa mmioyo yao zikala zihile. 6 MNDEWA kona giogio sama ya kuwalumba wanhu muisi, na moyo wake umema usungu. 7 Avo MNDEWA kalonga, “Nowabananga wanhu iniwalumbile, wahalawe muisi hamoja na wang'onyo wose, na vinhu inivilumbile vili muisi, na ndege wa kuulanga. Kwavija nie nokona giogio sama ya kuwalumba hewo.” 8 Ila Nuhu kanogelwa na MNDEWA.

9 Luno lulo lukolo lwa Nuhu. Nuhu kakala munhu yalibule uzenzeleganye, kakala bule mbuli na munhu mmwanza wa wanhu wa kipigiti chake, na heyo kakala mwende wa Mulungu. 10 Nuhu kakala na wana wa kimbigalo wadatu, Shemu, Hamu, na Yafeti. 11 Mulungu kona kamba isi ibanangika na imema na ukaini. 12 Mulungu kalola na kona vija ulumwengu vuubanangike, kwavija wanhu wose muulumwengu wakala ukazi wa kutenda mbuli zihile.

13 Mulungu kamulongela Nuhu, “Nowabananga wanhu wose walumbigwe, kwavija ulumwengu umemezwa na ukaini sama yao, avo nowabananga hewo hamoja na ulumwengu. 14 Itendele mwenyego safina ya mbamha za m'vinje, tenda magati mgati yake na uibakaze lami mgati na hanze giladi mazi sambigengile mgati. 15 Vino vivo vondauizenge, utali wake meta 133, na ugazi wake meta 22, na wimo wake kuchola uchana meta 13. 16 Itendele kiswili na uleke nafasi ya utali wa sentimeta 44 hagatigati ya ikiswili na iviwambaza. Izenge iwe na golofa ndatu, na uikile na lwivi mkiwambaza. 17 Nogala mmemelo wa mazi muisi kukibananga kila kinhu kili na mhumuzi ya ugima. Kila kinhu muisi chodanganhika, 18 ila nokwika lagano na gweye. Kokwingila muisafina gweye na mtwanzi wako, na wanago, na watwanzi zao. 19 Uvingize muisafina vinhu vose inivilumbile vili na ugima, uvingize vibilivibili, mtwanzi na mbigalo, giladi gweye na hewo muwe na ugima. 20 Wengize muisafina wabiliwabili, mtwanzi na mbigalo, namna zose za ndege, namna zose za wang'onyo, na vinhu vose vili na ugima vitembela muisi, weze kumwako uwemilize sambiwadanganhike. 21 Kosola vakuja va namna zose vija vidigwa na kuvika ngama viwe vakuja venu na vakuja va wang'onyo hiwo.” 22 Nuhu katenda kila kinhu kamba Mulungu viyamulagize.

<- MWANDUSO 5MWANDUSO 7 ->