1 Yakobo kalola na kumona Esau yokwiza na wambigalo mia nne, avo kawagola wana wa Lea, wana wa Laheli, na wana wa waja watwanzi zake wabili wa kunze. 2 Kaweka haulongozi waja iwatwanzi zake wabili wa kunze hamoja na wana zao, abaho Lea na wanage, abaho Laheli na Usufu kuchugu chao. 3 Heyo mwenyego kalongola haulongozi wao, kafugama mavindi, kainamila mbaka hasi mianza saba mbaka viyavikile behi na mkulu wake. 4 Ila Esau kamkimbilila Yakobo, kamkumbatila na kumnonela. Abaho wose wabili walila. 5 Esau kawalola waja iwatwanzi na iwana, kauza, “Wano uulinao iwo wanhu walihi?”

Yakobo kedika, “Wano wao wana Mulungu iyanigwelele nie, mtumigwa wako.” 6 Abaho waja iwatwanzi zake wa kunze na wana zao wawakwenhukila behi na wamfugamila mavindi na kumwinamila mbaka hasi. 7 Vivija weza Lea na wanage wamfugamila mavindi na kumwinamila mbaka hasi. Hakimambukizo, weza Usufu na Laheli, na hewo wamfugamila mavindi na kumwinamila mbaka hasi.

8 Esau kauza, “Madale gano ganiiting'hanile nago nhegulo yake choni?”

Yakobo kamwidika, “Madale gano gago nhunza ha mndewa wangu giladi mhate ngekewa hameso gako.”

9 Ila Esau kalonga, “Nna vinhu bwando, mdodo wangu, vino vuulinavo viwe vako mwenyego.”

10 Yakobo kalonga, “Si vivo, kamba nitogoligwa hameso gako, bokela nhunza ino kulawa kumwangu. Kwavija kona kihanga chako kumwangu nie ilinga na kona kihanga cha Mulungu, avija viunibokele na noge. 11 Nokuyalalila, bokela nhunza ino inikugalile. Mulungu kanyonela bazi kangwelela kila kinhu kinilonda.” Vino vivo Yakobo viyamgong'ondeze Esau, na Esau katogola.

12 Abaho Esau kalonga, “Tuchole, nie nolongola haulongozi.”

13 Ila Yakobo kamulongela, “Uvimanye, mndewa wangu, wana wano wang'hali wadodo na vivija nolondigwa niwaseseze ng'hondolo na ng'ombe awo wokong'heza. Kamba wahasosozigwa mdizua dimwe, wang'onyo wose wofa. 14 Avo nokuyalalila, mndewa wangu, longola haulongozi wa mtumigwa wako, nie nokwiza mholemhole hamoja na iwang'onyo na iwana mbaka vondatuvike Seili.”

15 Esau kalonga, “Beta nikulekele wanhu zangu kidogo.”

Yakobo kamulongela, “Sambiutende hivo, mndewa wangu, kinilonda nie mhate ngekewa hameso gako.” 16 Avo zua didija Esau kafunga mwanza wa kubwela Seili. 17 Ila Yakobo kachola Sukuti ako kuyazengile ng'anda yake na banda da wang'onyo zake. Kino kicho kilamso hanhu haja hakemigwa Sukuti.[a]

18 Yakobo kasegela Padani-Alamu, na kuvika na upile mdiwambo da Shekemu muiisi ya Kanaani, na keka ng'hambi yake behi na idiwambo. 19 Hanhu kuyekile ng'hambi kahagula kulawa ha wana wa Hamoli, tataake Shekemu, kwa vidanga mia va feza. 20 Haja kazenga kilingo cha kulavila nhosa na kukikema Mulungu iyo Mulungu wa Islaeli.

<- MWANDUSO 32MWANDUSO 34 ->