1 MNDEWA kamgwelela Sala ngekewa kamba viyalongile, na kamtendela Sala kija kiyamwikile kilagano. 2 Sala kapata inda na kumulelela Ablaham mwana mbigalo muuvyele wake, mkipigiti kikija Mulungu kiyamwikile kilagano. 3 Ablaham kamgwelela imwana twaga dikemigwa Isaka,[a] 4 na Isaka viyakalile na mazua manane, Ablaham kamwingiza kumbi, kamba Mulungu viyamulagize. 5 Ablaham kakala na milao mia kipigiti Isaka viyavumbuke. 6 Sala kalonga, “Mulungu kanigalila kiseko, na kila munhu yohulika mbuli ino koseka hamoja na nie. 7 Yalihi yahadahile kumulongela Ablaham kamba Sala yahakong'heze wana? Ila nimulelela mwana muuvyele wake.”

8 Mwana kakula, na kulekezwa kong'ha, na mdizua diyalekezwe kong'ha, Ablaham katenda lusona lukulu.

9 Ila Sala kamona mwanage Ablaham, yalelile na Hajili Mmisili, yotenda uponela. 10 Avo kamulongela Ablaham, “Muwinge nyakadala ino hamoja na mwanage, kwavija mwana wa nyakadala ino halondigwa kuhala hamoja na mwanangu Isaka.” 11 Mbuli ino ikala ihile ng'hani hameso ga Ablaham, kwavija Sumaili vivija kakala mwanage. 12 Ila Mulungu kamulongela Ablaham, “Sambiwone giogio sama ya imwana na nyakadala wako Hajili. Tegeleza kila chondayakulongele Sala mtwanzi wako, kwavija lukolo lwako unikile kilagano nagwe lolawilila kubitila Isaka. 13 Vivija nomtenda mwana wa nyakadala wako yawe undewa. Kwavija heyo vivija mwanago.”

14 Imitondo iyagwe, Ablaham kasola mandia na kibuyu cha mazi kitendigwe na kwembe, kamgwelela Hajili. Kavibasika mmaega gake na kumuleka yachole hamoja na imwana. Kachola na kuzungulukazunguluka mkiwala cha Beeli-Sheba. 15 Mazi vugamalile, kamwika imwana mkitutua 16 na kukala hasi utali wa kwasa msale kulawa haja hayakalile imwana. Kalonga munda kwa munda, “Silonda kumona mwanangu viyodanganhika.” Kipigiti viyakalile haja, kasonga kulila na dizwi kulu.

17 Na Mulungu kadihulika dizwi da immhale, na msenga wa Mulungu wa kuulanga kamkema Hajili kamulongela, “Hajili, kolilila choni? Sambiudumbe kwavija Mulungu kadihulika dizwi da immhale haja hayali. 18 Mwinule imwana, umgoge mkono kwavija kulawa kumwake wolawa wanhu bwando wondawawe undewa mkulu.” 19 Abaho Mulungu kagagubula meso gake, kachona kisima cha mazi. Avo kachola na kukimemeza mazi ikibuyu na kumgwelela imwana yang'we. 20 Mulungu kakala hamoja na ija imwana, kipigiti cha makuzi gake. Kakala mkiwala na kakala galu wa kusaka wang'onyo na mhinde na misale. 21 Viyakalile yokala mkiwala cha Palani, mamaake kamsolela mtwanzi kulawa muisi yake ya Misili.

22 Kipigiti kija Abimeleki na Fikoli, mkulu wa asikali zake, wamulongela Ablaham, “Mulungu ka hamoja na gweye mmbuli zose zuutenda. 23 Avo niduilile hano haulongozi wa Mulungu, kamba hunivwizila nie, ama wanangu, ama lukolo lwangu. Nilagusile nie na wanhu wose wa isi yuukala kamba muhenza unhu uuja unikulagusile gweye.”

24 Ablaham kalonga, “Noiduila.”

25 Abaho Ablaham kamtwanganikila Abimeleki mmbuli ya sima da mazi diwadibokonye watumigwa wa Abimeleki. 26 Abimeleki kalonga, “Simtangile yatendile mbuli ino, gweye hunilongele, uno uwo mwanza wangu wa ichanduso kuihulika mbuli ino.” 27 Abaho Ablaham kamgwelela Abimeleki ng'hondolo, menhe, na ng'ombe, na wanhu wano wabili watenda lagano. 28 Ablaham kabagula mabogwa saba ga ng'hondolo kulawa mdidale jake da wang'onyo. 29 Abimeleki kamuuza Ablaham, “Nhegulo yake choni mabogwa gano saba ga ng'hondolo yuuwabagule?”

30 Ablaham kamwidika Abimeleki, kamulongela, “Wabokele ng'hondolo wano saba kulawa mumkono wangu, wawe usindila kamba sima dino nidihimba nie.” 31 Avo hanhu haja hakemigwa Beeli-Sheba,[b] kwavija wanhu wabili watenda kiduilo.

32 Viweshile kutenda lagano haja Beeli-Sheba, Abimeleki na Fikoli, mkulu wa asikali zake, wabwela kuisi ya Wafilisti. 33 Abaho Ablaham kahanda mdai ako Beeli-Sheba na kumtambikila MNDEWA, Mulungu wa digunge. 34 Na Ablaham kakala kamba muhenza muisi ya Wafilisti mkipigiti kitali.

<- MWANDUSO 20MWANDUSO 22 ->