1 Mkipigiti kino,[a] munhu imwe kulawa mumtala wa Lawi kamsola mtwanzi kulawa mumtala wa Lawi. 2 Viyeshile kulela wana wabili, ija imtwanzi kapata inda iyagwe na kulela mwana mbigalo. Viyamonile kamba kakala mwana yanogile, kamfisa milenge midatu. 3 Ila viyalemelwe kumfisa, kasola kigelo kitendigwe na midete na kukibaka lami. Abaho kamwika imwana mgati yake na kukika ikigelo hagatigati ya imidete mumgwazo wa Ulwanda lwa Naili. 4 Lumbu jake ija imwana kakala hatalitali yone kija chondakimulawilile imwana.

5 Mndele wa Falao kahumuluka Kulwanda lwa Naili yoge, na watumigwa zake wakala wotembela mumgwazo wa ulwanda. Kachona ikigelo hagatigati ya imidete avo kamulagiza nyakadala wake wa kitwanzi yakakisole. 6 Ija imndele wa Falao viyakigubule, kamona mwana. Ija imwana kakala yolila, na ija imndele kamonela bazi, kalonga, “Ino kowa imwe wa wana wa Waeblania.”

7 Abaho lumbu jake ija imwana kamuuza mndele wa Falao, “Nichole nikamkeme imwe wa watwanzi wa Kieblania yakukong'hezele imwana?”

8 Ija imndele wa Falao kamwidika, yolonga, “Ona, genda.” Avo ija ilumbu jake ija imwana kachola na kumkema mama wa imwana. 9 Ija imndele wa Falao kamulongela ija imama wa imwana, “Msole ino imwana ukanikong'hezele, abaho nokugwaa kitumetume chako.” Avo ija imtwanzi kamsola ija imwana na kumkong'heza. 10 Ija imwana viyakulile na kuleka kong'ha, ija imama wa imwana kamsola na kumbwezela mndele wa Falao, na ija imndele wa Falao kamtenda kuwa mwanage. Kamgwaa twaga dikemigwa Musa,[b] kwavija kalonga, “Nimpata mgamazi.”

11 Musa viyakulile, zua dimwe kachola kuwakalile wanhu zake, kawalola vija viwakalile wosang'hanizwa sang'hano ndala. Kamona Mmisili yomtoa Mueblania, imwe wa wanhu zake mwenyego. 12 Kalola kuno na kuno na kona haduhu munhu, kamkoma ija Immisili, na kumfisa mmisenga. 13 Imitondo iyagwe kachola na kuwona Waeblania wabili wogomba. Kamuuza ija imwavu, “Habali umtoa Mueblania miyago?”

14 Ija imunhu kalonga, “Yalihi yakutendile gweye kuwa mtawala na mulamula wetu? Kolonda kunikoma nie kamba vuumkomile ija Immisili?”

Musa kadumba na kugelegeza mmoyo, yolonga, “Yokoneka kija kinhendile kitangigwa na wanhu.” 15 Falao viyahulike mbuli zino, kalonda kumkoma Musa, ila Musa kakimbila kachola kukala muisi ya Midiani.

Musa viyavikile Midiani, kakala hamgwazo wa sima da mazi. 16 Yeslo mkulu wa nhambiko wa Midiani kakala na wandele saba. Weza kudeha mazi na kumemeza via vao va kung'wila wang'onyo, giladi wawang'weze ng'hondolo wa tataao. 17 Ila wachunga wang'onyo wayagwe weza na kuwawinga waja iwandele, ila Musa keza kuwakombola, na kuwang'weza wang'onyo zao. 18 Viwabwelile ha Leueli,[c] tataao, kawauza, “Vilihi, mbona lelo m'bwela hima?”

19 Wamulongela, “Mmisili imwe katukombola kulawa mwa wachunga ng'hondolo wayagwe, katudehela mazi, na kuwang'weza wang'onyo zetu.”

20 Kawauza wandele zake, “Kakwahi? Habali mmulekile? Mulongeleni yeze kuja mandia hamoja na tweye.” 21 Musa katogola kukala na Yeslo, na Yeslo kamgwaa Musa mndele wake yokemigwa Sipola yawe mtwanzi wake. 22 Sipola kalela mwana, na Musa kamgwaa twaga dikemigwa Gelishom,[d] kalonga, “Nie nikala muhenza muisi ya uhenza.”

23 Vukibitile kipigiti kitali, mndewa wa Misili kadanganhika, ila Waislaeli wagendelela kugulila hasi ya zigo da unyakadala wao. Walila wozahila ija wa kuwataza, na kililo chao kim'vikila Mulungu. 24 Mulungu kahulika kugulila kumwao na kakumbukila kilagano chake na Ablaham, Isaka, na Yakobo. 25 Avo Mulungu kawalola Waislaeli na kuyona migayo yao, na kuwonela bazi.

<- KUHALAWA 1KUHALAWA 3 ->