1-2 Wanhu wa Islaeli walawa Lefidimu, na mdizua da ichanduso da mulenge wa ikadatu songela viwalawile muisi ya Misili, wavika Muluwala lwa Sinai. Hanhu haja weka ng'hambi hasi ya Idigongo da Sinai. 3 Musa kakwela uchana kuiting'hana na Mulungu.

MNDEWA kamkema kulawa mdigongo na kulonga, “Kino kicho chondauwalongele Waislaeli, lukolo lwa Yakobo, 4 ‘Mweye wenyego muchona kija kiniwatendele Wamisili, na vija viniwapapile mweye kamba kimhungu viyowapapa wanage mzimbawa, na kuwagala kumwangu. 5 Kamba muhanitegeleza na kudigoga lagano jangu, mweye mowa wanhu zangu mwenyego mmwanza wa wanhu wose wali muisi. Kwavija isi yose yangu nie, 6 mweye mowa wanhu zangu, undewa wa wakulu wa nhambiko, na undewa ung'alile.’ Zino zizo mbuli zondauwalongele Waislaeli.”

7 Avo Musa kabwela, kawakema wavyele wa wanhu, na kuwalongela mbuli zose MNDEWA ziyamulagize. 8 Wanhu wose wedika, walonga, “Totenda kila kinhu MNDEWA kiyalongile.” Avo Musa kamulongela MNDEWA mbuli ziwalongile waja iwanhu.

9 MNDEWA kamulongela Musa, “Nokwiza kumwako mdiwingu titu, giladi wanhu wahulike vondanilonge na gweye, na kusongela sambi na kugendelela, wakutogole.”

Abaho Musa kamulongela MNDEWA mbuli ziwalongile iwanhu, 10 na MNDEWA kamulongela Musa, “Genda ha wanhu ukawalongele lelo na mayo waing'alize, na wasuluze vivalo vao. 11 Waisasale sama ya zua da ikadatu, kwavija mdizua hijo nie, MNDEWA, nohumuluka Mdigongo da Sinai hameso ga wanhu wose. 12 Ika mbaka kuzunguluka idigongo, na uwalongele, ‘Teganyeni sambimkwele uchana ya idigongo ama kukwasa haja hajotele. Munhu yoyose yondayadikwase idigongo kolondigwa yakomigwe. 13 Kotoigwa na mabwe ama kuhomigwa na misale, haduhu mkono wondaumkwase. Munhu ama mng'onyo yondayadikwase idigongo kokomigwa.’ Ila mhalati ihatoigwa, wanhu wose wolekigwa wadikwenhukile idigongo.”

14 Avo Musa kahumuluka kulawa mdigongo na kuwalongela wanhu waing'alize, na hewo watenda kamba Musa viyawalongele. Na vivija wavisuluza vivalo vao. 15 Abaho kawalongela, “Isasaleni sama ya zua da ikadatu, na sambimuwase na watwanzi.”

16 Imitondo zua da ikadatu kukala na midumo na mimwemwe, wingu titu uchana ya idigongo, na dizwi kulu da mhalati. Wanhu wose wakalile haja hana ing'hambi wagudema. 17 Abaho Musa kawalava iwanhu kulawa mng'hambi giladi waiting'hane na Mulungu. Wema hasi ya idigongo. 18 Gongo da Sinai digubikwa na yosi, kwavija MNDEWA kahumuluka uchana ya idigongo kuno yali mgati ya umoto. Yosi dikwela uchana kulawa Mdigongo kamba yosi da tanuli, na gongo jose ditigisika ng'hani. 19 Dizwi da imhalati vudibanzile kongezeka ng'hani, Musa kalonga, na Mulungu kamwidika mkuduma.

20 MNDEWA viyahumuluke uchana ya Idigongo da Sinai, kamkema Musa uchana ya dija idigongo, na Musa kakwela uchana ya idigongo. 21 Abaho MNDEWA kamulongela Musa, “Humuluka hasi ukawazume wanhu, sambiwaloke imbaka giladi weze kunyona nie. Kamba wahatenda avo, wanhu bwando wodanganhika. 22 Hata wakulu wa nhambiko, awo wonikwenhukilaga, waibagule sama yangu nie, ama sio, nowabananga.”

23 Musa kamulongela MNDEWA, “Wanhu wano hawadaha kukwela na kwiza kuno uchana ya Idigongo da Sinai kwavija gweye mwenyego kutuzuma ulonga, ‘Ikeni mbaka kuzunguluka idigongo giladi mditende ding'ale.’ ”

24 MNDEWA kamulongela, “Humuluka hasi ukamsole Haloni wize nayo. Ila wakulu wa nhambiko na wanhu wayagwe sambiuwaleke weze uchana kunili nie, ama sio, nowabananga.” 25 Avo Musa kahumuluka hasi hawakalile iwanhu na kawalongela gose gayalongeligwe na MNDEWA.

<- KUHALAWA 18KUHALAWA 20 ->