WAEBLANIA 10

1 Kwavija Malagizo ga Musa gakala sisila da vinhu vinogile vikwiza na sio vinhu venyego. Sama ya kilamso kino havidahika kuwatenda wawe bule vilozo awo womkwenhukila Mulungu na nhosa zizija ziibwelela bila kuziga mulao kwa mulao havidahika kusuluzwa! 2 Kamba wanhu wakalile womtambikila Mulungu wakala wang'alizwe kweli kulawa m'vilozo vao, sambiwaiyone wana vilozo, na nhosa zose zihazigile. 3 Ila nhosa zino zowakumbusa vilozo vao mulao kwa mulao. 4 Kwavija mulopa wa songolomi wa ng'ombe na menhe haudaha kusegeza vilozo.

5 Avo Kilisto viyezile muulumwengu uno, kamulongela Mulungu,

“Nhosa za kuchinja wang'onyo na nhosa za vinhu huzilondile,

ila lukuli luunigwelele lulo luulonda nikulavile.

6 Hunogeligwe na nhosa za kulukuza,

na hunogeligwe na nhosa za kusegeza vilozo.

7 Abaho nilonga, ‘Nabaha, Mulungu,

kugatenda gaja gakunogele,

kamba vinyandikiligwe Mzinyandiko Zing'alile.’ ”[a]

8 Tanhu kalonga, “Nhosa za kuchinja wang'onyo na nhosa za vinhu, nhosa za kulukuza na nhosa za kusegeza vilozo huzilonda tena hunogelwe nazo,” hata kamba ving'hali vilavigwa kulingana na Malagizo ga Musa. 9 Abaho, kongeza, “Nabaha, niza kusang'hana gaja goulonda.” Avo Mulungu kosegeza Lagano da Umwaka na hanhu hake kokwika lagano da sambi. 10 Kwavija Yesu Kilisto kasang'hana gaja gayamulondile Mulungu kutenda, tweye tose tung'alizwa kulawa m'vilozo kubitila nhosa ya lukuli lwake ilavigwe mwanza umwe sama ya wanhu wose.

11 Kila mkulu wa nhambiko kotenda sang'hano yake kila zua, na kulava nhosa iilingile mianza bwando, ila nhosa zino hazidaha kusegeza vilozo. 12 Ila Kilisto viyailavile mwanza umwe nhosa imwe ikala ilumbile milao yose sama ya vilozo, kakala hasi kumkono wa ukulume wa Mulungu. 13 Songela kipigiti kija kobeta Mulungu yaweke wadumuka zake hasi ya magulu gake. 14 Kwavija sama ya nhosa imwe kawasuluza awo wasuluzwe vilozo vao.

15 Vivija na Loho wa Mulungu kolava usindila wake mmbuli ino. Tanhu kolonga,

16 “Dino dijo lagano dondanitende na hewo

kipigiti chondakize.

Nokwika malagizo gangu mmioyo yao,

na kugandika mnzonzi zao,” Mndewa kalonga.[b]

17 Abaho, kongeza, “Sikumbukila vilozo vao na mbuli zao zihile.”[c] 18 Avo vilozo na mbuli zao zihile vihageligwa kumgongo, nhosa ya kusegeza vilozo hailondigwa.

Natumkwenhukile Mulungu

19 Avo, ndugu zangu, tuna ugangamalo mkulu wa kwingila Hanhu Hang'alile Ng'hani sama ya ifa ya Yesu. 20 Kubitila ifa yake, Yesu kavugula nzila ya sambi ilava ugima kubitila guo ditungikigwe Mng'anda ya Mulungu, ichola Hanhu Hang'alile Ng'hani. 21 Na avija vituli na mkulu wa nhambiko mkulu yotawala ng'anda ya Mulungu, 22 avo natumkwenhukile Mulungu na mioyo ilibule uzenzeleganye na nhamanila ituitangile goya, na mioyo yetu ing'alizwe kulawa muudaho wetu wihile wa kusambula gehile na ganogile, na tuzisuluze ng'huli zetu na mazi gang'alile. 23 Natudigoge ng'hani tamanilo dituditogole bila kudungwadungwa, kwavija Mulungu itwikile nayo kilagano kabule uzenzeleganye. 24 Na tugelegeze vija vitudaha kuiswagiza twetwe kwa twetwe kuwa na noge na kutenda ganogile. 25 Sambimuleke kuiting'hana, kamba viwotenda wanhu wayagwe, ila natuigangamize, kamba vumkona zua da nhaguso da mmabehi.

26 Tuhagendelela kutenda vilozo giladi kuno twishile kuibokela ilimu ya kweli, haduhu nhosa iyagwe yoyose yondaisegeze vilozo, 27 ila kinhu kisigale kicho kino, kubeta na kingudemo nhaguso yondaize na moto ukalika awo wondauwalambite wadumuka wa Mulungu. 28 Munhu yoyose yagadulukile Malagizo ga Musa hameso ga wasindila wabili ama wadatu kakomigwa bila koneligwa bazi. 29 Mokwagiza nhaguso ng'hali kiasi gani yoolondigwa yaipate munhu yam'bojage Mwana wa Mulungu na magulu gake, ayo yaautendile mulopa wa lagano uja umng'aliza heyo uwe kamba kinhu haking'alile, na ayo yamuligile Loho wa Mulungu ayo yotonela bazi tweye? 30 Kwavija tumtanga ija yalongile, “Sang'hano ya kubwelezela si yenu mweye, ila yangu nie, noliha,”[d] na vivija ilongigwa, “Mndewa kowatagusa wanhu zake.”[e] 31 Munhu kamba ino yahalagalila mmakono ga Mulungu yali na ugima, kodumba ng'hani!

32 Gelegezeni gaja gawalawilile mweye umwaka kipigiti vum'bokele Usenga wa Mulungu, mgazigwa na vinhu bwando, ila mweye mgangamala. 33 Kipigiti kiyagwe mkala muligigwa hameso ga wanhu na kugazigwa, na kipigiti kiyagwe hamudumbile kukala hamoja na awo wawatendele mbuli hizo. 34 Muwonela bazi waja wakalile mkifungo, na vum'bokonywe vinhu venu, mwazaganya mkudeng'ha, kwavija m'vitanga kamba mng'hali na vinhu bwando va muloho vinogile ng'hani vondavikale milongo yose. 35 Avo sambimuuleke mgangamalo wenu kwavija wowagalila nhunza ng'hulu. 36 Kwavija molondigwa mwazaganye, giladi mgatende gaja gamnogele Mulungu na kubokela gaja Mulungu gayailagane namwe. 37 Kamba Nyandiko Zing'alile vuzilonga,

“King'hali kipigiti kidodo,

na ayo yokwiza kokwiza,

na hakawilila.

38 Ila wanhu zangu walibule uzenzeleganye wokala mnhamanila,

na munhu yoyose yobwela kukisogo,

moyo wangu haunogelwa nayo.”[f]

39 Tweye hatuli mmwanza wa awo wobwela kukisogo ama awo wapotele, ila twa mmwanza wa awo wali na nhamanila na wakomboligwe.

<- WAEBLANIA 9 WAEBLANIA 11 ->