1 Bigueta biiya ru ca discípulu sti Jesús laa. Nuu ca uriá ti nisa ro' rabi cabe Tiberia, ne sicarí uca ni. 2 Nuu Simón Pedru, ne Tomás ni rabi cabe Cuachi, ne Natanael de Caná de Galilea, ne ca xiiñi Zebedeu, ne xhupa de ca discípulu stibe. 3 Biree Simón Pedru na rabi laaca':
―Chaa chi naaze benda.
―Laadu laca ziné du lii, na ca'.
Ne uyuu cabe ndaani canuá, uyé cabe idubi gueela', peru gasti qué ninaaze cabe. 4 Ma zeda yaba biaani bidxiña Jesús ruaa nisa que, peru qué ganna cabe pa laabe ni. 5 Na be rabi be laaca':
―Ma unaaze tu xiixa la? amigu ca'.
―Nin tobi, na ca'.
6 Para rabi be laaca':
―Lausaba starraya tu ladu derechu, zanaaze tu.
Oraque bisaba ca', ne ma qué ñanda nibee ca ni, purti dxá tipa ni de benda. 7 Para na dxa discípulu ni nadxii be que, rabi Pedru:
―Señor nga.
Cadi nacu Simón Pedru lari peru ora gunna Señor ngue la? ucuaa uxooñe xhaba, biaba nisa que. 8 Ca xcaadxi discípulu que bichiña canuá que ruaa nisa, zeda xubi yu ca tarraya ra dxá benda que, purti cadi zitu nuu ca', bia' ti gayuaa metru si de ruaa nisa. 9 Ora biree cabe ndaani canuá que, biiya cabe nuu ti ludé raqué nexhe ti benda lú, ne laca nuu pan. 10 Para na Jesús rabi laacabe:
―Latané caadxi benda ni unaaze tu nagasi ca.
11 Oraque udxi'ba Simón Pedru, ulee tarraya que lu yuxi, dxá tipa ni de benda ngola, bia'si ti gayuaa cincuenta y tres benda. Ne neca stale came, peru qué nireza tarraya que.
12 ―Latá' gue tu, na Jesús rabi laacabe.
Ne nin tobi de laacabe qué ñuni cabe pur ninaba diidxa cabe tu laabe, purti nanna cabe Señor laabe. 13 Oraque bidxiña Jesús ucuaa pan que bidii laacabe, ne zaqueca bi'ni ne benda que.
14 Ndi nga raguionna tiru bidxiña Jesús ra nuu ca discípulu sti' después de bibani.
Jesús ne Pedru
15 Biluxe güe' si cabe, na Jesús rabi Pedru:
―Simón, xiiñi Jonás, nadxiiu naa jma que irá xixé la?
―Nadxiee lii, Señor, lii nannu nadxiee lii, na Pedru.
―Gupa ca dendxu huiini stinne', na be.
16 Bigueta rabi be Pedru:
―Simón, xiiñi Jonás, nadxiiu naa la?
―Nadxiee lii, Señor. Lii nannu nadxiee lii, na Pedru.
―Gupa ca dendxu stinne', na be.
17 Bigueta na be:
―Simón, xiiñi Jonás, nadxiiu naa la?
Ucaná ladxidó' Pedru, purti ma ne nga guionna tiru inaba diidxa be laa pa nadxii laabe, para na:
―Señor, lii nannu irá'. Lii nannu nadxiee lii.
Oraque na be:
―Gupa ca dendxu stinne'. 18 Ne gabe ca' lii, dxi nahuiini lu la? stubu gucu lu xhaba lu', ne uyé lu ratiica gucala'dxu', peru ora ma bio'xho lu la? zusigaa nou', ne stobi tu ugacu lii lari ne ziné lii ra qué racala'dxu cheu'.
19 Ra uní' be zacá, bisihuinni be xi enda guti chi usisaca né Pedru Dios. Biluxe si uní' be nga rabi be Pedru:
―Dananda naa.
Jesús ne discípulu ni nadxii
20 Ora bidxigueta lú Pedru biiya nanda dxa discípulu ni nadxii Jesús laa que, dxa ni gudixhe ique lu xi'que Jesús ra cayó xhi cabe ne unaba diidxa tu chi utoo laabe que. 21 Oraque biiya dxí Pedru laa ne na rabi Jesús:
―Señor, laga ndi ya'. Xi gaca xa de laa.
22 Para na Jesús:
―Pa acaladxe guiaana be de dxi guenda la? cadi xcuenta lu'. Dananda naa lii.
23 Ne bireeche diidxa lade ca hermanu na Jesús qué zati discípulu que, peru cadi na di Jesús qué zati be, sínuque na pa acala'dxi guiaana be de ora gueeda la? cadi xcuenta Pedru.
24 Ne discípulu que nga cayuí' irá ndi', ne cucaa irá ni, ne nanna du dxandí irá ni na be.
25 Nuu ru stale ni bi'ni Jesús, pa nicá cada tobi ni la? rabe nin qué nugaanda guidxilayú nidxá irá gui'chi ra nicá ni.
