1 Ka zej Jesúza' na' ble'ile' to beṉ' byo beṉ' golje' nc̱hoḻe'. 2 Na' beṉ'ka' nakgake'ne' txen che'gake'ne':

―Maestro, ¿berac̱he golj beeni nc̱hoḻe', lla? ¿Anc̱hoḻe' ni c̱he saaxya c̱he'na', anti ni c̱he saaxya c̱he x̱axṉeekan', lla?

3 Na' che' Jesúza' ḻegake':

―Aga ni c̱he saaxya c̱he'nan' ni aga ni c̱he saaxya c̱he x̱axṉeekan', san kwenc̱he wli'lawi yeḻ' wak c̱he Chioza' lo yeḻ' mban c̱he'nan' nake' ka'. 4 Shlak ṉaa ni de latj, chiyaḻ' goncho xshin beena' bseḻ' nad'. Ḻa' wllin lla kat' kochno bi gak gon. 5 Shlak ni zoa' yell-lioni nak' beeni' c̱he beṉ' yell-lioni.

6 Na' ka biyoll wna Jesúza' ka', na'ch blle' x̱eneena' lo yona' na' bene' lat' beṉj kon x̱eneena', na'ch wdebe'n jalao beṉ' lc̱hoḻa'. 7 Na' chi'ene':

―Wyaj jadib jalawo'na' cho'a tanga' daa le Siloé ―na' Siloé zejin Beṉ' Nseḻee.

Na'ch wyaj beṉ' lc̱hoḻa' jadib jalawe'na', na' ka bizee na', ba chle'ile'. 8 Na'ch beṉ' wlill c̱he'ka' na' beṉ'ka' ble'gakile'ne' kana' nc̱hoḻe' che'gake':

―¿Aaga beenin chbi'e chṉabe' mecha'?

9 Na' baḻe' che':

―Awe, ḻen'.

Na' zi baḻe' che':

―Aga ḻen', per ka'tekzə nake'.

Na' beena' chi'e:

―Nad'kzan'.

10 Na'ch wṉabgakile'ne':

―¿Nakra gok ba chle'ilo'?

11 Na' chi'e ḻegake':

―To beṉ' le Jesús bene' beṉja' na' wdebe'n jalaw'ki na'ch wne' nad': “Wyaj gana' llia tanga' daa le Siloé na' jadib jalawo'na'.” Na'ch wyaa na' ka biyiba'n, na' gok ble'id'.

12 Na'ch che'gake'ne':

―¿Garaṉ beena' no' ka'?

Na' chi'e ḻegake':

―Bi ṉezid'.

13 Na'ch jwa'gake' beena' gok beṉ' lc̱hoḻ lao fariseoka'. 14 Na' llana' wdeb Jesúza' beṉja' jalao beena' kwenc̱he ble'ile' nakan lla chombaaṉgake'. 15 Na'ch fariseoka' ḻekzka' wṉabgakile'ne' nak gok chle'ile'. Na' chi'e ḻegake':

―Beena' biyone' nad' wdebe' beṉja' jalaw'ki, na' ka biyiba'n gok ble'id'.

16 Na'ch baḻ fariseoka' che'gake':

―Aga Chiozan' bseḻee beena', ḻa' chone' daa bi chiyaḻ' goncho llani chombaaṉcho.

Na' zi baḻe' che'gake':

―¿Nakra gon to beṉ' saaxya gone' yeḻ' wak ka diiki chon beeni?

Na'ch gokgake' c̱hoplə. 17 Na'ch dii yoblə gollgake' beena' gok beṉ' lc̱hoḻ:

―¿Shera li'? ¿Bi iṉo' c̱he beena' ben ka chle'ilo'?

Na' chi'e ḻegake':

―Nad' nia' nake' to beṉ' chyix̱jee daa che' Chioza'ne'.

18 Na' beṉ'ka' chṉabia' beṉ' Israelka' bi wyajḻe'gake' shi dii ḻi gok beena' beṉ' lc̱hoḻ na' ṉaa ba chle'ile'. Na'ch goxgake' x̱axṉeena', 19 na' wṉabgakile' ḻegake':

―¿Abeenin xiiṉlena', beena' nale nc̱hoḻe' ka golje'? Na' ¿nakra gok ba chle'ile' ṉaa, shka'?

20 Na' x̱axṉeena' billiigake' xtilleeka':

―Ṉezinto' beenin xiiṉnto'na' na' golje' nc̱hoḻe'. 21 Per aga ṉezinto' nak gok chle'ile' ṉaa, ni bi ṉezinto' non biyon ḻe'. Ḻi iṉabile', ḻa' aga nake' bi'do' iṉacho bi gak iṉe' non biyon ḻe'.

22 Goll x̱axṉeena' ka' daa chllebgake' beṉ'ka' chṉabia' beṉ' Israelka', ḻa' ba bgaaṉgake' dill' nottezə beṉ' iṉe' Jesúza' nake' Crístona' bi wlebgake'ne' gana' chdop chllaggake' choe'ḻwillgake' Chioza'. 23 Daan golltezə x̱axṉeena': “Ḻi iṉabile', ḻa' aga nake' bi'do' iṉacho bi gak iṉe' non biyon ḻe'.”

24 Na'ch dii yoblə goxgake' beena' gok beṉ' lc̱hoḻ, che'gake'ne':

―Bzoashki Chioza' de tasc̱hiw shi leilo' choo dill' ḻi, ḻa' ṉezinto' beena' biyon li' nake' beṉ' saaxya.

25 Na'ch golle' ḻegake':

―Bi ṉezid' shi nak beena' beṉ' saaxya. Ḻete dii ṉezid', golj' nc̱hoḻ' na' ṉaa ba chle'id'.

26 Na'ch che'gake'ne':

―¿Beran benile' li'? ¿Nak bene' kwenc̱he chle'ilo'?

27 Na' chi'e ḻegake':

―Ba wniakz' le', na' bi chzi'le cho'a xtillaana'. ¿Bic̱he cheenzile iṉia'n dii yoblə? ¿Anti ḻekzka' lenle ba cheenile gonlene' txen?

28 Na'ch wṉegake'ne' zibia', che'gake'ne':

―Lin' nako' beena' txen, san neto' Moisézan' naknto' txen. 29 Ṉezinto' Chioza' wṉie' Moiséza', san beena', ni bi ṉezinto' ga zee.

30 Na'ch beena' gok beṉ' lc̱hoḻ chi'e ḻegake':

―¡Nakkzan dii yibanicho daa bi ṉezile ga za' beena' na' ba bene' ka chle'id'! 31 Ṉezkzicho aga chzenag Chioza' c̱he beṉ' saaxyaka', san chzenague' c̱he beṉ'ka' choe'la'ogake'ne' na' chongake' daa chazlallee. 32 Dezd ka wxe wzil yell-lioni biṉ' yenicho shi zoa beṉ' chak chone' ka chle'i to beṉ' golje' nc̱hoḻe'. 33 Sheḻ' beeni bi nake' to beṉ' bseḻ' Chioza', ni to yeḻ' wak bi gak gone', sheḻ'ka'.

34 Na'ch che'gake'ne':

―Dezd ka goljo' nako' beṉ' saaxya. ¿Ana' chakilo' wli' wsedilo' neto'?

Na'ch bibejgake'ne' ladje'ka'.

35 Na' wṉezi Jesúza' bibej fariseoka' beena' gok beṉ' lc̱hoḻ ladje'ka', na' ka billague'ne' na'ch chi'ene':

―¿Achonḻilalloo Beena' Bseḻ' Chioza' Yell-lioni?

36 Na' beena' chi'ene':

―Beṉ'do', wnashki nad' nora beena' kwenc̱he gonḻilallaane'.

37 Na' che' Jesúza'ne':

―Ba ble'kzilo'ne', na' ḻekzen' chshaljleno' ṉaa.

38 Na'ch lii bc̱hek'te xibe'na' lao Jesúza', na' chi'ene':

―Chonḻilallaa li', X̱an' ―na'ch be'laweene'.

39 Na'ch che' Jesúza':

―Ba bid' yell-lioni kwenc̱he wc̱hogloa' c̱he beṉ' yell-lioni. Zaa kwenc̱he beṉ'ka' nak ka beṉ' lc̱hoḻ ile'gakile', na' beṉ'ka' chakgakile' chle'gakile' yiyakgake' ka beṉ' lc̱hoḻ.

40 Na'ch baḻ fariseoka' lle' na', ka bengakile' chi'e ka', che'gake'ne':

―¿Achakilo' lennton' naknto' beṉ' lc̱hoḻ?

41 Na'ch che' Jesúza' ḻegake':

―Sheḻ' nakle beṉ' lc̱hoḻ, aga bi xtoḻ'le de, sheḻ'ka'. Per daa nale chle'ile, daan de xtoḻ'le.

<- San Juan 8San Juan 10 ->