Apocalipsis 5

1 Chiy gunáa dec laany ni zubny lo yallilzaac ni ná zec xte tuby rey, caany tuby guiits lad naldí. Guiitsqui zeclɨ nez loni ne nez detsni cá letrɨ ax duuibni, chiy guiidyni cun gadz sei par quɨt illal loni. 2 Horqui ax gunáa tuby ánglɨ ni quesentiand daan, diip rbɨxtiany:

—¿Tú ná ni riáld idzɨcá de sei ne ixal lo guiitsré?

3 Per niclɨ llayabaa, niclɨ lo guɨchliu, niclɨza láani guɨchliu quɨt bdxialti ni riáld ixal lo guiitsqui, niclɨ par íguiaab xi cá loni. 4 Parzi nare quesentiand ruuna chi gunáa dec ruteete bdxialti par ixal lo guiitsqui niclɨ par íguiaab xi cá loni. 5 Chiy tuby de bɨngulqui gunii nare:

—Quɨtru ruunu. Bguiaa canioo, anuu tuby ni riáld ixal lo guiitsqui ne idzɨcány irate gadz seiqui pur ni abaanny gan lo irate, laany ni nány zecpacza tuby lióny lo xfamily Judá pur guelrnabee ni napny, laany ni zány lo xfamily rey David.

6 Ax chi bguíaa, chiy gunáa dec glay rut zu yallilzaac ni ná zec xte tuby rey, rut zuguaa idapte de manyqui, glay de bɨngul ni zuguaa ruy, zuguaa tuby Corder ni ríeny de seny xte de herid ni gutyny. Ax gadz xcach ne gadz bslo Corderqui nuu, gadz de bslonyqui ná gadz spírit xte Dios ni re iduibte lo guɨchliu. 7 Corderqui gubiiny cuáany guiitsqui laznaa lo ni zub lo yallilqui. 8 Chi cuáany guiitsqui, chiy idapte de many ni zuguaa cuee yallilqui ne irate galdbitap de bɨngulqui guzulliby lony. Tubyga de bɨngulqui caadeb tuby arpɨ ne caazadeb de cop de or ni dxaatec guux ni rldianaxy, guuxqui ná de xtiidx de xpɨny Crist chi rnaabdeb o chi rdeeddeb gracy Dios. 9 De bɨngulqui ruulddeb tuby cant cuby ni rnii:

Laabiu riáldbiu icáabiu guiitsquɨ

ne idzɨcábiu de sei ni guiidyni.

Te pur laabiu gutybiu

ax cun rɨny xtenbiu ni bxíibiu gudillybiu

pur iralote bniety par gacdeb xpɨny Dios,

quɨt xi gúnti xi diidx rueedeb, o calí lo family,

o calí guɨdx, o xi lo nacionza zádeb.

10 Laabiu baanbiudeb tubyzi lo guelrnabee xtenbiu

ne baanbiudeb de bxoz par Xtadnɨ Dios,

chiy laadeb inabeedeb lo guɨchliu.

11 Ziyza gunáa ne bindiaga rsee zienguilliú de ánglɨ iduibrdonte rut zu yallilzaacqui cun idapte de manyqui ne de bɨngulqui. Zienguilliú per zienguilliú de ánglɨqui pur milydeny. 12 Chiy quesentiand diip rniideny:

Corder ni gutyqui

riáldquɨpacny gapny guelrnabee,

riáldquɨpacny gapny de guelnazaac,

guelnán, juers,

didxdoo, diidx zaac ne izubyaanny.

13 Chiyru bindiaga rsee irate de ni banchuu Dios, zeclɨ de ni nuu llayabaa, lo guɨchliu, láani guɨchliu ne lo nisdoo, rniidengui:

Laany ni zubny lo yallily xte guelrnabee ne Corder xtenny,

par laadeny ná:

Didxdoo, diidx zaac, guelrnabee

ne izubyaandeny iduibtiampte ne par chazy.

14 Chi bialo gunii de ni gunii ziy, chiy idapte de many ni zuguaa ruy gunii:

—¡Amén!

Ne irate galdbitap de bɨngulqui guzullibdeb par itodebny, laany ni nabánny iduibtiampte ne par chazy.

<- Apocalipsis 4 Apocalipsis 6 ->