Apocalipsis 15

1 Chiyru gunáa stuby senyroo llayabaa, tuby seny ni idxalocpac bniety: Gunáa gadz de ánglɨ cun gadz guelzii. De guelziiqui ná lúltmɨ ni gac te pur cun de guelziiqui, yalo gún Dios castigu xtenny.

2 Ziyza gunáazaca zec chi ri nisdoo, per lazu tuby vidrɨ culory xte bal. Chiy loqui zuguaa de ni baany gan lo monstruo, lo figur ne lo númbrɨ xtenmɨ, caadeb de arpɨ ni bdeed Dios laadeb. 3 Ax cayuulddeb cant xte Moisés xpɨny Dios ne cant xte Corder xte Dios, cantqui rnii:

Quesentiand guroo ne ni idxalocpac bniety de cos ni runbiu,

Xtadnɨ Dios ni nap irate guelrnabee.

Xnezquɨpacni ne zecquɨpac ni riáld runbiu,

laabiu ni rnabeebiu lo irate bɨnguɨchliu.

4 Ax, ¿túlesa quɨt idxiby laabiu?

¿Túlesa quɨt inii de diidx zaac pur laabiu, Xtadnɨ Dios?

Laatisbiu nábiu sant

ax irate bniety guɨchliu gueed ito laabiu

pur ni abliuubiudeb dec xnezquɨni cayunbiu.

5 Chi gulull gunáa ziy, chiyru gunáa bllal rut mazru nadá laniudoo xte Dios llayabaa. 6 Chiy laniudooqui bdiia gadz de ánglɨ ni zedné gadz de guelzii: Nacudeny lady nguits ni rcuabcháa, ax llii tuby cinturon de or nez rulazdoodeny. 7 Chiyru tuby de lo idapte de many ni zuguaa nez rut rbez Dios, bdeedmɨ de ánglɨqui tubyga cop de or ni dxaatec castigu xte Dios ni nabány iduibtiampte ne par chazy. 8 Chiy gudxatec yudooqui guux xte guelrcuabcháa ne guelrnabee xte Dios. Quɨt tu nialeeti níiu laniudooqui axtisy chi abialo guc irate gadz de guelzii ni zedné de ánglɨqui.

<- Apocalipsis 14 Apocalipsis 16 ->