San Marcos 3

(Mt. 12:9-14; Lc. 6:6-11)

1 Stuby güelt deni biiu Jesús láani tuby yudoo, ax laniudooqui zuguaa tuby bniety nguiu ni gubiz tuby lad naani. 2 Chiy de bniety ni nuu laniudooqui caldaatsdeb dún la siac Jesús bnietqui dxi ni rzilaazdeb par gúndeb contrɨ laany. 3 Per Jesús raipny bniety ni gubiz naani:

—Güesuldí chiy guzuguaa glayre.

4 Chiyru gunabdiidxny de bnietqui:

—¿Xi ná par gún bniety dxi ni rzilaazni? ¿Ta tuby cos güen o tuby cos mal? ¿Ta gacné bniety guelnabány o idzɨcá bnietni?

Per laadeb quɨt xi cuaibtideb. 5 Chiy bguiadxiich Jesús lo iratedeb ne quesentiand nalas bziienny te pur quɨt rgátideb saa bnietdeb. Chiyru raipny bniety ni ná naani ziy:

—Bldí noo.

Ax bldí bnietqui naani ne hóracqui biac naab. 6 Chiy deni bdiia de fariseu ax bdxadiidxdeb cun de xpɨny Herodes par quinxúdeb Jesús.

7 Per Jesús zégacny cun de xpɨnny nez ruu nis xte Galilea. Ne zieny bniety guzanald laany, zeclɨ de bniety Galilea, de bniety Judea, 8 de bniety Jerusalén, de bniety Idumea, de bniety ni rbez dets gueeu Jordán, de bniety Tiro, ne de bniety ni rbez nez Sidón. Quesentiand ziendeb güe rut zuguaany pur ni gucbeedeb de milagrɨroo ni cayunny. 9 Pur ningui, gunabee Jesús de xpɨnny chacáadeb tuby barcu par chúuny láanqui te par quɨt itaagu de bniety laany. 10 Te pur la zieny de bniety absiacny. Parzi irate de bniety racxú rbinuu laany par iguaalddebny. 11 Chiy de bniety ni nuu bɨndxab láanni chi rniádeb Jesús, rzullibdeb lony. Ax rbɨxtiadeb:

—¡Laabiu nábiu Lliin Dios!

12 Per laany gunabeeny irate de bɨndxabqui par quɨt iniidengui tú laany.

(Mt. 10:1-4; Lc. 6:12-16)

13 Chiyru güe Jesús láani tuby dany ax gurɨdxny de bniety ni rlilony. Laadeb güedeb, 14 ne de lo iradeb laany bcuabeeny tsɨbtiop de ni sanépac laany, ne par inabeeny laadeb chatɨɨchdeb xtiidx Dios. 15 Ax bdeedny laadeb guelrnabee par isiacdeb de bniety racxú ne par cuéedeb bɨndxab láani de bniety. 16 De bnietré ná irate tsɨbtiop de ni bcuabeeny: Simóny ni gulelány Bed, 17 Jacob cun Juany de llingaan Zebedeo de ni gulelány Boanerges zelo diidxqui de lliin guziuu. 18 Chiy néza Andrés, Liby, Bartol, Madeu, Mally, Jacob lliin Alfeo, Tadeo, Simóny ni bdxaa lo de cananista, 19 ne cun Judas Iscariote ni baany entriagu laany.

(Mt. 12:22-32; Lc. 11:14-23; 12:10)

Chi gulull bcuabeeny laadeb chiyru biecquinény laadeb yuu rut guzuguanédebny. 20 Ne ruy gubíi bdxasaa zieny de bniety, axt niclɨ quɨt nialeeti niquinnény de xpɨnny. 21 Chi gucbee de xfamily Jesús ziy, ax beeddeb par chanédeb laany te pur rnii de bniety dec laany aruuch xquelrienny.

22 Ne ziyza de maistrɨ ni nán ley de ni zá Jerusalén nézadeb rniideb:

—Bnietquɨ rbéeb de bɨndxab láani de bniety pur lagac guelrnabee xte Beelzebú ni rnabee lo de bɨndxab.

23 Chiyru gurɨdx Jesús laadeb, raipny laadeb:

—¿Xólesa cuée Satanás lagac saa bɨndxabbɨ? 24 Zecquɨ belati tuby naciony gac gubiernɨ tiop cuaa, ax sdildpacdeb ne quɨt xo güelaazti guelrnabee xtendeb. 25 Ziyza belati tuby family tilddeb cun lagac saadeb, ax ziub ldasaadeb ziy. 26 Anre ziytiziaczaquɨy belati Satanás gúniy contrɨ lagac saa bɨndxabɨy, ruytisdxa agulullza guelrnabee xteningui.

27 ’Ne ruteete quɨt tu chaleeti yiiu liz tuby ni quesentiand daan par cúaandeb xixtenbɨ belati quɨt ildiibxgadeb laab. Ziytisy par chalee cúaandeb xixtenbɨ.

28 ’Ne nare rguixtiia lot dec nuu perdón par irate duld ni run bniety, ne nuuza perdón par irate diidx mal ni rnii bniety pur tutix. 29 Per elquɨ ni rnii diidx mal contrɨ Spíritu Sant, quɨt chúuti dxi gapbɨ perdón sino que abnitbɨ lo Dios.

30 Jesús guniiny ziy pur ni caniideb dec rbeznény bɨndxab.

(Mt. 12:46-50; Lc. 8:19-21)

31 Horqui bdzɨny xnan Jesús cun de betsny yuu rut zuguaany, per quɨt nialeeti níiudeb ax bxiaalddeb ni chatɨdx laany. 32 Chiy de bniety ni zuguanény gudixteedeb lony, raipdebny:

—A xnanbiu cun de betsbiu zuguaa detsquɨ caguíilydeb laabiu.

33 Per laany cuaibny:

—¿Tú rac xnana ne de betsa?

34 Chiyru bguiaany lo irate de ni zub ruy ax guniiny:

—A xnana ne de betsa ré, 35 te pur tutix bniety ni run zec ni rcaaz Dios, laadebɨy rac betsa, bzaana ne xnana.

<- San Marcos 2 San Marcos 4 ->