San Lucas 4

(Mt. 4:1-11; Mr. 1:12-13)

1 Jesús quesentiand rbeznény Spíritu Sant chi bzany ruu gueeu Jordán, ne Spíritu Sant güené laany nez lo yiubiz rut quɨt tu rbezti. 2 Ruy guzuguaany cuarent dxi ne guxin ax güegaany bɨndxab prueb laany. Xíteete quɨt xi bquiintiny irate dxiqui, chiyru bldiaanny. 3 Chiy raipy bɨndxab laany:

—Belati guldípacu noo Lliin Dios, gunabee gac guiaré guechtily.

4 Jesús cuaibny:

—Lo xquiits Dios rnii: “Gati púrzi pur guechtilti ibány bniety sino que néza pur xtiidx Dios.”

5 Chiy güené bɨndxab laany yaa quia tuby dany ax horqui bliuungui laany irate de naciony xte lo guɨchliu 6 ax raipy bɨndxab laany:

—Nare inɨɨdxa liú guelrnabeeré ne de guelnazaac ni nuu lo de nacionquɨ te pur xtena nádeni. Ne nare sdeedani elquɨ ni icaaza. 7 Belati sullibiu luaa ne itoo nare, irateni gac xtenu.

8 Per Jesús cuaibny:

—Lo xquiits Dios rnii: “Bto tubyzi Xtadu Dios ne tubyzi lony baany sirvɨ.”

9 Chi gudeedqui, chiy güené bɨndxab laany guɨdx Jerusalén ax biepnéngui laany quia yudoroo xte Jerusalén, raipiy laany:

—Belati guldípacu noo Lliin Dios, biab desde ruuc axtquɨ niguét 10 te pur lo xquiits Dios rnii:

Dios sxiaaldny de ánglɨ xtenny par icualodeny liú.

11 Sldiasdeny liú cun naadeny

par quɨt gunna guia de niiu.

12 Jesús cuaibny:

—Ziyza rnii lo xquiits Dios: “Quɨt gúntiu prueb Xtadu Dios.”

13 Ziy xquel guc, chi quɨtru bdxialti bɨndxab xa xquel gúnbɨ prueb Jesús, ax gubicáb rut zuguaany. Canuutisbɨ xi dxi chaleeru gúnbɨ pruebny.

(Mt. 4:12-17; Mr. 1:14-15)

14 Jesús biecquiny nez Galilea quesentiand napny guelrnabee xte Spíritu Sant ne iduibte de nezqui zaaiby xtiidxny. 15 Rseedny de bniety láani de yudoo irate de nezqui, ne iratedeb rniideb diidx zaac pur laany.

(Mt. 13:53-58; Mr. 6:1-6)

16 Chiy Jesús güeny Nazaret guɨdx rut guroony. Ne dxi ni rzilaaz de bniety ax biiuny láani yudoo zec ni guc xmodny, chiy guzuldíny par biildyny lo xquiits Dios. 17 Bdeeddeb laany librɨ xte profet Isaías. Ne chi bxalny láani librɨqui, bdxialny tuby lat rut rnii:

18 Spírit xte Xtadnɨ Dios zuguané nare

te pur abanldeeny quiaa par iniia de didxzaac xte Dios lo de bniety ni ná prob.

Abxiaaldny nare par gacnía de bniety ni nuu nalas,

par quixtiia lo de bniety xa xquel ldádeb, laadeb ni rnabee duld lodeb,

par ixala de bslo de bniety ciagu

ne par gacnía de bniety ni cadeed guelzii.

19 Ne par quixtiia dec abdzɨny dxi ni arbez Xtadnɨ Dios par gunldeeny quia de ni quíily laany.

20 Chiyru bchii Jesús lo librɨqui ax bdeedny librɨqui bniety ni racné láani yudooqui ax guriny. Ne irate de ni nuu láani yudooqui güelaaru bguiaadeb laany, 21 chiy laany guzulo caninény laadeb, guniiny:

—Andxigacré aguzub zec ni rnii lo xquiits Dios ni abindiagtɨ.

22 Iratedeb guniideb de diidx zaac pur Jesús, ne quesentiand rdxalodeb pur de diidx zaac ni rniiny ax guzulo rnabdidxsaadeb:

—¿Ta gati laabɨy llingaan Gusé?

23 Jesús raipny laadeb:

—Nare nánpaca dec laat teru iniit nare diidx ni rnii: “Doctor, baany rmɨdy lagac liú”, ne sniizactɨ nare: “Ni bindiagnɨ baaniu guɨdx Capernaum, baanza ziy ladxu.”

24 Ziyza raipy Jesús laadeb:

—Nare rguixtiia lot nic tuby profet quɨt rcaaztideb laab ladxbɨ. 25 ¿Ta quɨt renelaaztɨ chi guu profet Elías? Gulalqui zieny gunaa viud guu lo naciony Israel chi quɨt biabti nisguia chon iz iruld ne iduibte nezqui guu gubiny. 26 Per Elíasqui quɨt bxiaaldti Dios laab par gacnéb tuby viud ni rbez Israel sino que par tuby viud ni gulez guɨdx Sarepta, ni ná gax guɨdx Sidón. 27 Ziyza guu zieny bniety Israel ni guc guelguidx ni lá lepra chi beed profet Eliseu, per nic tubydeb quɨt bsiactib sino que laab bsiacbɨ Naamán tuby bɨnzít ni zá nez Siria.

28 Chi bindiagdeb de diidxré, irate de ni nuu láani yudoo quesentiand bdxiichdeb. 29 As güesuldídeb par guléedeb Jesús láani guɨdxqui ne quia tuby dany ná guɨdxqui. Chiy güenédeb laany ruxchu guɨdxqui par nizáalddeb laany desdɨ ruy. 30 Per Jesús gudeedny glaydeb ax zégacny.

(Mr. 1:21-28)

31 Chiyru zé Jesús Capernaum tuby guɨdx xte Galilea. Ruy, dxi ni rzilaaz bniety, laany bseedny laadeb. 32 Quesentiand rdxalodeb xquel ni rliuuny laadeb te pur rninény laadeb cun guelrnabee.

33 Láani yudooqui nuu tuby bniety nguiu ni nuu tuby bɨndxab láani lazdooni ax gurɨxtiab:

34 —Bsaanbiu dunnɨ, Jesús de Nazaret. ¿Xínii riutébiu cun dunnɨ? ¿Ta zéedbiu par initlobiu dunnɨ? Nare rumbiia laabiu, ne nánna dec laabiu nábiu Bniety sant xte Dios.

35 Jesús byaynény bɨndxabqui guniiny:

—¡Dxichgaruu, bdiia láani bnietquɨ!

Chiy bɨndxabqui bzáaldiy bnietqui nez lo iratedeb ax bdiiangui láani bnietqui sin quɨt xi niactib. 36 Iratedeb bdxibdeb ne bdxalozadeb ax guzulo raipdeb saadeb:

—¿Xi de diidxquɨ? ¡Bnietré napbɨ guelrnaberoo ne rnabeeb de bɨndxab par rdiiadeb láani bniety!

37 Ne iduibte de nezqui rueedeb diidx pur Jesús.

(Mt. 8:14-15; Mr. 1:29-31)

38 Chiyru güesú Jesús bdiiany laniudoo zény liz Simóny. Xnansuegrɨ Simóny racxúb quesentiand nuub xliaa, ax gudiindeb lo Jesús pur laab. 39 Jesús guzurlony ax gunabeeny ibicá xliaaqui ax gubicá xliaaqui. Hóracqui güeste bnietqui ax guzulo bíub laadeb.

(Mt. 8:16-17; Mr. 1:32-34)

40 Chi bieezy gubidx, irate de bniety ni racxú de xfamilni, güenédeb de bniety ni ráp iralote guelguidx lo Jesús ax bzubnaany quia cad tubydeb ziy xquel bsiacny laadeb. 41 Zieny bniety racxú, nuudeb bdiiaza bɨndxab láani lazdoodeb rbɨxtiadengui:

—Laabiu nábiu Lliin Dios.

Per Jesús gudildnény de bɨndxabqui ne quɨt bsaantiny niniidengui te pur de niy nándengui dec laany nány Crist.

(Mr. 1:35-39)

42 Chi bragueel stuby dxi, Jesús bdiiany láani guɨdxqui par güeny tuby lat rut ná dxiruzi. Per de bniety gudíilydeb laany ax bdzɨndeb rut zuguaany. Ne raipdeb laany dec suguanény laadeb quɨt chiatiny. 43 Per laany raipny laadeb:

—Ná par chatixtiia xa ná guelrnabee xte Dios lo de bniety stuby de guɨdx te par ziy bxiaald Dios nare.

44 Ziy xquel cuandzá Jesús guniiny xtiidx Dios láani de yudoo nez Galilea.

<- San Lucas 3 San Lucas 5 ->