San Lucas 20

(Mt. 21:23-27; Mr. 11:27-33)

1 Láani de dxi ni zuguaa Jesús laniudoroo xte Jerusalén, caseedny de bniety, caliuuny de bniety xtiidx Dios. Chiy bdzɨny de bxoz ni rnabee de bxoz cun de maistrɨ ni nán ley, ne cun de gurtisy xte Israel, 2 ax raipdeb laany:

—Gunii dunnɨ, ¿tú xtidxbee runu de cosquɨ? ¿Tú bnɨɨdx liú guelrnabee?

3 Chiy raipy Jesús laadeb:

—Ziyza nare inabdiidxa laat tuby cos. Gulcaby, 4 ¿tú bxiaald Juany Bautist par itiubnisbɨ? ¿Ta Dios bxiaald laab o bniety guɨchliu?

5 Per laadeb guzulo cayueegacdeb diidx cun saadeb ax rniideb: “Belati iniin Dios bxiaald Juany Bautist, laab sniib dunnɨ, ¿xínii quɨt güeldilaaztɨb, pɨs?” 6 Ne quɨtza xo iniitin dec bniety guɨchliu bxiaald laab te pur sguinxú de bɨny dunnɨ cun guia, te iratedeb reldilaazpacdeb dec Juany Bautist guc tuby profet ni gunii pur Dios.

7 Chiyru ax cuaibdeb dec quɨt gántideb tú bxiaald Juany par itiubnisbɨ. 8 Chiyru raipy Jesús laadeb:

—Nicza nare quɨt iniitia laat tú bnɨɨdx nare guelrnabee par runa de cosquɨ.

(Mt. 21:33-44; Mr. 12:1-11)

9 As guzulo caniné Jesús de bniety, benény laadeb cuendré:

—Guu tuby bniety nguiu ni bzu de yag uv lo lliani, chiguld ax bdeedbɨni iruld de bniety ni nán run dzɨɨny xte uv. Chiy zégacbɨ zit rut güeldezbɨ. 10 Chi bdzɨny dxi ni gac iruld uv, bxiaaldbɨ tuby xmosbɨ par challii ni riáldbɨ. Per de bɨnqui btaazdeb mosqui ax bzieecquideb laab sin xíteete. 11 Chiy bniety ni ná xtenni guɨchliuqui bxiaaldbɨ stuby mos. Per ziygac de bɨnqui gudédeb lo mosqui, btaazdeb laab ax bxiaalddeb laab sin xíteete quɨt nideedtideb laab. 12 Bnietqui gubíi bxiaaldbɨ stuby mos, per de bɨnqui baandeb herid laab ax guléedeb laab lo liuqui.

13 ’Chiyru gunii bniety ni rnabee guɨchliuqui: “¿Xa xquel gúna an? Ixiaalda llingaana ni quesentiand rcaaza. Talbelati laab gapdeb didxdoo.” 14 Per chi guná de bɨnqui laab, ax raipdeb saadeb: “Laabɨy ná ni yanné liu rut nuu uvquɨ. Gultoo idinxúnbɨ, par chalee gac guɨchliuc xtennɨ.” 15 Chiy guléedeb laab lo liuqui ax gudinxúdeb laab.

Jesús gunabdiidxny de bniety ni caninény:

—Anre laat, ¿xa rlilot gunné bniety ni ná xtenni guɨchliuqui laadeb? 16 Rguixtiia lot dec laab zeedbɨ par quinxúb laadeb ne sdeedbɨ guɨchliuqui stuby de bniety.

Chi bindiagdeb ziy ax guniideb:

—¡Quɨt cuelaaz Dios gac ziy!

17 Per Jesús bguiaany lodeb ax guniiny:

—Belati gati ziguiy, ¿xi zelo ni cá lo xquiits Dios rut rnii?:

Guia ni aldi guleguun de ni rzuub yuu,

guiaqui ná ni mazru blliú par guzub yuuqui.

18 Tutix ni ldap guiaqui, laab sdeedbɨ guelzii. Per belati guiaqui yabni quia bniety ax snitlotecni bniety.

(Mt. 22:15-22; Mr. 12:12-17)

19 De bxoz ni rnabee de bxoz cun de maistrɨ ni nán ley hóracqui rcaazdeb ninaazdeb Jesús, te pur gucbeedeb dec ni guniiny ná contrɨ laadeb, per bdxibdeb de bniety. 20 Ax bxiaalddeb de ni zeldaats laany, digaizy gúndeb dec laadeb nádeb bɨnzaac, par quíilydeb nez inii Jesús tuby diidx ni chalee gúndeb entriagu laany lo gobernador xte Roma. 21 Chiy gunabdiidxdeb laany:

—Maistrɨ, dunnɨ nánnɨ dec laabiu rniibiu ne rliuubiu zec ni riáld. Te pur nez lobiu tubylote ná bniety ne guldípacbiu rliuubiu bniety xa xquel rcaaz Dios ibány bniety. 22 Guniibiu dunnɨ, ¿ta ná güen idillynɨ xte impuest lo gobernador xte Roma, o quɨt náti güen?

23 Per Jesús gucbeegacny de mal xgab xtendeb ax raipny laadeb:

24 —Gul liuu nare tuby mɨly. ¿Tú lon cá loc, ne tú láng cá loc?

Laadeb cuaibdeb:

—Xte rey César.

25 Chiy raipy Jesús laadeb:

—Guldeed César ni ná xte César, ne guldeed Dios ni ná xte Dios.

Ax quɨt xi dixúti bdxialdeb nicuaquiadeb laany pur de ni guniiny nez lo irate bniety. 26 Rdxalotisdeb zec ni cuaibny lodeb, ax quɨtru xi guniitideb.

(Mt. 22:23-33; Mr. 12:18-27)

27 Chiguld tuby tiop de bɨny saduceu güeguiaadeb Jesús. Ne de saduceuqui quɨt reldilaaztideb dec sbány de bɨnguty stuby. Pur ningui raipdeb Jesús:

28 —Maistrɨ, ley xte Moisés rnii dec belati gaty tuby bniety nguiu ne isáanbɨ chialbɨ sin quɨt niactideb de family, chiy bets bniety ni gutyqui ná par guchnaab viudqui par gacdeb de family xlat betsbɨ ni gutyqui. 29 Ne guu tuby family rut gucdeb gadz bets. Ni ná guloqui bichnaab, per gutybɨ sin quɨt niactib de family cun chialbɨ. 30 Chiyru ni rrop betsbɨqui bichnaab viudqui per quɨtiac guctideb de family. 31 Chiyru bichnaa ni rionqui cun viudqui, ziytec xquel bichnaa viudqui cun irate gadzdeb, ne iratedeb gutydeb sin quɨt niactideb de family cun viudqui. 32 Pur lúltmɨ ax guty gunaaqui. 33 Pur ningui dxi ni ibány de bɨnguty, ¿de lo ira gadz betsdeb tú rac chial gunaaqui te pur iratecdeb bichnaa gunaaqui?

34 Chiy raipy Jesús laadeb:

—Lo guɨchliuré ruchnaa bniety ne rdeedzadeb lliindeb guchnaa. 35 Per de ni riáld gap stuby guelnabány cuby de ni ibány stuby, zeclɨ nguiu ne zeclɨza gunaa aquɨtru guchnaatideb. 36 Te pur aquɨtru gatytideb, sino que laadeb agacdeb zec de ánglɨ xte Dios, ne anágacdeb de lliin Dios pur agubánydeb stuby. 37 Dunnɨ nánnɨ dec sbány de bɨnguty stuby. Te pur axt Moisés gunii ziy tuby lat lo xquiits Dios rut rnii dec gunáb yag ni cayaaicqui. Ax ruy rnii dec Xtadnɨ Dios, laany nány Dios xte Abraham, xte Isaac, ne xte Jacob. 38 Ne Dios quɨt nátiny Dios xte de bɨnguty, sino que xte de ni nabány, te pur par laany irate bniety nabány.

39 Chiy nuu de maistrɨ ni nán ley raipdeb laany:

—Güenquɨ guniibiu Maistrɨ.

40 Ax aquɨtru xi nialltideb ninabdiidxdeb laany.

(Mt. 22:41-46; Mr. 12:35-37)

41 Per laany raipny laadeb:

—¿Xínii rnii bniety dec Crist rac lliin rey David? 42 Ne lagac David guniib lo librɨ xte Salmos:

Dios raipny Dad ni rnabee naa:

“Guri lad naldí xtena

43 axtquɨ gúna gan inabiiu lo de ni rdxichné liú.”

44 Pur ningui belati Crist rac lliin David, ¿xínii raipy David laany, Dad?

(Mt. 23:1-36; Mr. 12:38-40; Lc. 11:37-54)

45 Irate de bniety cacuadiag, ax raipy Jesús de xpɨnny:

46 —Gulcualo cun de maistrɨ ni nán ley. Te pur laadeb riulaazdeb candzadeb cun lady zaac xtendeb, ne riulaazzadeb gap bniety didxdoo laadeb lo nez. Chiy láani de yudoo rguíilyzadeb subdeb lo de bangu rut rbe de ni mazru sac, ziygacza rundeb rut requiindeb. 47 Ne ziyza rdzɨcádeb liz de gunaa viud chiy parlesa ná bniety dec güen nádeb, ax xipal ziuul de ldee ruulddeb. Per laadeb ná ni mazru castiguroo yálddeb.

<- San Lucas 19 San Lucas 21 ->