8
Vatane wamamo AMISY Po wansatantona rave
1 Masmur Daud po ratoe. Nto irati akari po vatano matayao ukiny maugavo ransyerane rai ai. Mamaisyo ransyeran ‘‘Gitit’’[a] rai.
2 Tugae AMISY, Winyirati reama Akoe,
wakoe, Nya tame ntiti rave no mine tename so!
Nya kovo ntiti mo naume rakivan bintabo.
3 Nde no arikainy tuvan muno arikainyo wisyisyo ukame rai mansai wo nararimbe.
Weye Nyo Nya vambunine ratonamo mansai to,[b]
ti mo Nya marova mapamo muno vatano uparijo Naive mapamo tavon.
4 Wakoe! Syo naume warae ranyanyube,
windanari naneme rai–embae, tume, Winyo ratonami,
5 umba veanimaibe Nyo vatan bayave mansatantona rave?
Muno veanimaibe Nyo arikainyo vatane mayaranande rave tavon?
6 Weramu Winyo manari to kavintare umba wo Nya naito titi‡8:6 Ayao Ibrani naiso mare elohim, ama ino manasyine mamo ‘‘Amisye,’’ yara ama ino jirum mamo ‘‘naito Amisy muno anakotaro ntuna no munijo ntiti.’’ Aneme so ratoe akato no Ibrani 2:7, ama ine no naije mare ‘‘naito Amisy.’’ mansamaisy.
Winyo mansainyave kovo ntiti rai muno Nyo tamo manakoe raugaje mai.
7 Winyo vambunine raunanto mai ti ube akarive anakotaro ndanari rai vintabo.
Nyo raveaje ntuna no majo ate rai:
8 kambine, domba muno sapi
muno maere kotar nsyisyaube ntuna no anoko ayamuga;
9 insani kotar muno jiane kotar
muno anakotar tenambe ntovabe no nawanan.
10 Tugae, AMISY, Winyirati reama Akoe,
wakoe, Nya tame ntiti rave no mine tename so!
<- MASMUR 7MASMUR 9 ->
- a 8:1 Ayao ‘‘Gitit’’ ama ine raene ramu. Kuruno Ayao Amisy inta wo ratantona ware ama ine mare ransyerano munijo Gat, weramu kuruno kaijinta ware omamo ransyerano vatano Israel ukiny dai arono wo anggur ama mane rakugan no mampiriare rai, weye ayao Gat ama ine mare ‘‘mampiriaro anggur.’’
- b 8:3 Matius 21:15-16 mamo Yesus Po aneme so ama ine raura kakavimbe pare Amisye pamo Po arikainye manyao indamu wo ararimbe.
- c 8:6 Ayao Ibrani naiso mare elohim, ama ino manasyine mamo ‘‘Amisye,’’ yara ama ino jirum mamo ‘‘naito Amisy muno anakotaro ntuna no munijo ntiti.’’ Aneme so ratoe akato no Ibrani 2:7, ama ine no naije mare ‘‘naito Amisy.’’