12
Amisye anajo indamu Po wansapaya irati vatano angkarije mai
1 Masmur Daud po ratoe. Nto irati akari po vatano matayao ukiny maugavo ransyerane rai ai. Kinyo rai itari ama wai kaumandeije raeyan dai.
2 Sya AMISY, syare nde Nyo sopambe rinai,
weye vatane inta ubeta Winai jakato ramu to,[a]
vatano matawandi ti utavondi Winai nawamo mansaumandi vintabo to.
3 Vatan tenambe wayarurijabe taune mai vambinibe,
maunane mamo mansak ti wo vatane maponae ayao manavane rai.
4 AMISY, syare Nyo vatano wo ayao manavane ratore mansopi tenambe,
muno Nyo vatano mawa mbaubu mawa rakuvu vintabo.
5 Onawamo wo raura ware: ‘‘Reama ayao reandatore mirati vatane utaopono rai!
Ana rui vayave reamare reamo raura mamo reandaura kai,
muno vatane inta umamaisyo wo reansansopi rai kakai!’’
6 Weramu AMISY Po raura pare: ‘‘Syo raen, wo vatano awa ana jajewembe matawanto,
weti Syo raura syare:
naije kobeamo Syo kovo sauman, namirati mansanaveano ramene, raunanto mai.’’
7 AMISY Apa urairi mamo mamaisyo anave rai,
muno kakui maisyare peraki kakui ramaisy,
namirati raugasya rauno taname rai susye kaururum indamu mbe peraki kakuive.[b]
8 AMISY, Winyirati ndarino reansaora,
ndarino reansaora irati vatano mamun susyo naiso mai.
9 Weye vatano mamune ntuna mandayano sota sore,
muno awa ana udave ti ngkakainoanive mamo vatan tenambe ukangkamambe rai.
<- MASMUR 11MASMUR 13 ->
- a 12:2 Vatano Pemasmur po maura so onawamo taune apa arakovo Israel nao.
- b 12:7 Mamaisyo vatano Israel awa ana udatantona rai, kaururum omamo vari mamai dave. Ananeneae peraki omamo maisyare vatane wo angkaji rauno mavabe ra ndu rave indamu ama manino ngkov dave obo raen. Anakero peraki rauno taname rai raura kakavimbe no 1Petrus 1:7 ama catatan kaki rai.