5
Jon da papia kɨnda kɨlɨ sopgwit kagɨt
1 Amɨn uŋun kɨla amɨn madep yɨtyɨt tamokon yɨkgɨt uŋun kɨsitni amɨn tet do papia gɨroŋɨkbi kɨnda taŋban kagɨm. Papia uŋun terɨ terɨ kɨldani toŋ, ae kendol pakbi baŋ kosirɨ 7 kabɨ aŋteban abi.
2 Ae aŋelo tapmɨmɨ toŋsi kɨnda kaŋapbo gen papmon da yaŋ tɨdaŋek yaŋ yagɨt, “Namɨn amɨn kɨlegɨsi kɨnda dasi kendol pakbi baŋ paŋteban abi pakdegek papia tagɨ wɨtdaljak?” 3 Mani amɨn Kwen Kokup ekwaŋ, bo ae mɨktɨmon ekwaŋ, bo ae mɨktɨm da mibɨlɨgwan ekwaŋ kɨnda da papia uŋun arɨpmɨ dɨma wɨtdaljak bo ae arɨpmɨ dɨma kosak. 4 Nak papia uŋun amɨn kɨnda da arɨpmɨ dɨmasi wɨtdaljak bo ae kosak yaŋ kaŋek kunam madepsi saŋbek saŋbek morapmɨ takgɨm. 5 Yaŋ aŋapbo kɨla amɨn kabɨkon da kɨla amɨn kɨnda da yaŋ nayɨgɨt, “Gak kunam dɨma takgi. Koki! On Laion Juda amɨn kabɨkon altagɨt, uŋun Dewit dakon babɨnikon gugɨ uŋun da don noman taŋ wɨgɨt. On Laion emaron teban tagɨt. Yaŋ agɨt do uŋun da papia kendol pakbi baŋ kosirɨ 7 kabɨ paŋteban abi uŋun pakdegek tagɨ wɨtdaljak.”
Jon da Sipsip Monɨŋ kagɨt
6 Yaŋ nayɨŋakwan Sipsip Monɨŋ kɨnda akban kagɨm. Uŋun paret ak do si aŋakba kɨmakgɨt yombem. Uŋun kɨla amɨn madep yɨtyɨt tamo da binapmon agakwan yo 4 kabɨ egɨp egɨpmɨ toŋ gat ae kɨla amɨn gat da aŋgwasɨwit. Sipsip Monɨŋ uŋun jomni 7 kabɨ, ae dabɨlni 7 kabɨ. Dabɨlni uŋun Piŋkop dakon wupni 7 kabɨ. Uŋun Piŋkop da yabekban mɨktɨmɨ mɨktɨmɨ kɨŋ mudawit.
7 Kɨlɨ Sipsip Monɨŋ da kɨla amɨn madep yɨtyɨt tamokon kɨŋ Amɨn yɨkgɨt da kɨsirɨ amɨn tet do papia tagɨt uŋun abɨdagɨt.
8 Papia uŋun abɨdaŋakwan yo 4 kabɨ egɨp egɨpmɨ toŋ, ae kɨla amɨn 24 kabɨ gat da Sipsip Monɨŋ da kapmatjok maŋ pakgwit. Kɨsisi kaloŋ kaloŋ gita monɨŋni gat ae gol ɨdapni gat tɨmɨk tɨmɨk awit. Gol ɨdapmon yo kɨbaŋɨ tagɨsi tugawit, uŋun Piŋkop dakon mɨŋat amɨn kabɨyo dakon bɨsitni.
9 Yaŋ aŋek kap kalugɨsi kɨnda yaŋ yawit,
“Gak da papia gɨroŋɨkbi abɨdaŋek kendol pakbi baŋ paŋteban abi uŋun arɨpmɨ tagɨ pakdekgi.
Nido gɨkba kɨmagek yawigo naŋ mɨŋat amɨnyo Piŋkop do ɨm do aŋek yumaŋ nagɨl.
Asi, amɨn mibɨlɨ mibɨlɨ ekwaŋ,
ae geni mibɨlɨ mibɨlɨ,
ae gɨptɨmni mibɨlɨ mibɨlɨ,
ae mɨktɨmɨ mɨktɨmɨ ekwaŋ kɨsi yumaŋ nagɨl.
10 Yumaŋ naŋek amɨn kɨla ani do manjɨŋ yopgul,
ae nin dakon Piŋkop dakon oman ani do mukwa sogok amɨni manjɨŋ yopgul.
Uŋun da kɨla amɨn madep egek mɨktɨmon amɨn kɨlani akdaŋ.”
Sipsip Monɨŋ dakon man aŋkɨsiwit
11 Kɨlɨ aeno kaŋ egapbo aŋelo morapmɨsi dakon geni nandagɨm. Uŋun aŋelo dakon tɨlakni milion morapmɨsi ae tausen morapmɨsi da arɨp. Uŋun aŋelo kɨla amɨn madep yɨtyɨt tamo ae yo egɨp egɨpmɨ toŋ ae kɨla amɨn kabɨ baŋ paŋgwasɨŋek akgwit.
12 Yaŋ tɨdaŋek kap kɨnda yaŋ yawit,
“Sipsip Monɨŋ on kalɨp aŋakba kɨmakgɨt.
Uŋun da man madep gat,
ae yo tagɨsisi morap gat,
ae nandak nandak tagɨsi gat,
ae tapmɨmɨ wukwisi uŋun kɨsi tagɨ tɨmɨtjak.
Amɨn morap kɨsi da mani aŋenagek kɨsɨk kɨsɨk aŋ ɨmɨŋek ya yaŋ iyɨni kaŋ uŋun kɨlegɨsi.”
13 Ae yo morap Piŋkop da wasagɨt uŋun dakon geni kɨsi nandagɨm. Yo morap Kwen Kokup ekwaŋ, ae mɨktɨmon ekwaŋ, ae mɨktɨm kagagwan ekwaŋ, ae tap kaga ekwaŋ kɨsi dakon geni nandagɨm. Uŋun da yaŋ yawit,
“Amɨn uŋun kɨla amɨn madep yɨtyɨt tamonikon yɨkdak,
ae Sipsip Monɨŋ gat kɨsi,
nin jil dakon tɨlɨm gat ae tapmɨm gat pɨndagek kɨsɨk kɨsɨk aŋek dagok dagogɨ mɨni man madep damamaŋ.”
14 Aŋakwa yo 4 kabɨ egɨp egɨpmɨ toŋ uŋun da yaŋ yawit, “Uŋun asi.” Yaŋ yaŋakwa kɨla amɨn kabɨ da maŋ pagek gawak yomgwit.
<- Paŋalon Abi 4Paŋalon Abi 6 ->
5:1:
Ais 29.11; Esi 2.9-10
5:5:
WW 49.9; Ais 11.1,10; PA 22.16
5:6:
Sek 4.10; Jn 1.36; PA 13.8
5:8:
Kap 141.2; PA 8.3-4
5:9:
Kap 33.3; 40.3; 96.1; 98.1
5:10:
TP 19.6; Ais 61.6; PA 1.6; 20.6
5:11:
Dan 7.10; Ibr 12.22
